¹ Ango eyaandongbali iwo ahue e Yelusalama, waumia la Betefage, ngambo e mokoli mo Oliva Yesu atomia watutiani wande waale. ² Awaaselia: kekeni la moki mungo modjei liwoso lanu; okogboto punda eesi wamonangi ebete kikima la enge ekeke; motokolani pe djaka la ewo atie mbai. ³ Inga moto aohuelani, mowongoselani ate: Likumu adjei la posa eho. Ndji ango akoodheni ate oete. ⁴ Kaikoase djinge sambo kpaa ikelamia laate linge likpomaate mosakoli likokesame. ⁵ Mwaaselia mana o moli o siyona: dhenga likumu la owe akodjaka atie owe, atumi la olamu pe ateli likolo la punda eesi. ⁶ Watutiani wakia okeli ndenge enge ewatomi Yesu. ⁷ Wadjia la punda eho e moli la punda enge keke, wabata isindje djawu likolo, pe Yesu ayabatelia. ⁸ Wato ngbii wabatili isindje djawu la mboka, waeti watenia ite dja mite, waandali djaho la mboka. ⁹ Wato wango wasombali liwoso la wango wa mbuse e Yesu wadjali ohumbi pui la lembo: Ozana monga Davidi! opambwe ongo okodja la kombo e likumu! Ozana ongo oyeti likolo! ¹⁰ Ango e lingelia inde la Yelusalema, egbala gbata kpa edudumali, wadjali oasi ate: wandai wango? ¹¹ Ebiba e wato waasali: edjei Yesu, mwaaseli e Nazaleta la Galileya. ¹² Yesu alingelia la Tepelo e Mwengei; awumbia la wato kpaa wadjali otambi la ndondo e Tepelo; alumbia mesa dja wakukoli wa waambele pe la ibete ewatambi wa wilua. ¹³ Awaaselia: edhingami ate Tepelo e mbai ekowelama ate monguta mowaatati kasi ino, oekukolia ebete e wato wa iwa. ¹⁴ Wato wagui maiso la wango wakotengulaka wadjia atie nde la Tepelo, awaakalesia ¹⁵ Kasi makumu mawa nganga wa Mwengei la wa bimianeli wa mibeko wamemelia la tina e sambo ndamu djinge ikeli inde, wana wadjaakali ohumbi pui la Tepelo: Ozana la monga Davidi! ¹⁶ Wamoaselia ate: okokokaka djinge ekwasaka iwo? Yesu awawongeselia: eee. Otitangeni dji sambo: okeli ate monoko mo wana la wana wango wakonungaka mawele e otemeye? ¹⁷ Mbuse eho awadheiya pe apumbia la gbata la oki la Betania ongo elangalali inde. ¹⁸ Ekundu boo, ango ewongoiya inde la gbata, ndjiala e mohelia. ¹⁹ Aenia mote mo Figi kelekele e mboka pe ayandongbia, agbotia ndji ngasi, aasali la mote moho: te lisiyo otiwotakine mbuma! Mote mo Figi moomia ndji enge engele. ²⁰ Oeni ndjongo, watutiani wakamweiya, waasia: nda ndenge egbenelia mu mote mo Figi la mbala kikima? ²¹ Yesu awaaselia: iwowaselini meemene, inga odjaa la oyambi pe obatiti kokeeya, okokelani te ndji linge likelami la mu mote mo Figi, te ate inga oasani la mu mokoli: longwa ango alumba la ewale, enge ekokelama. ²² Linge likohongo ino la oyambi ndondo eyaakongi okototani eho. ²³ Yesu akiya ndondo Tepelo; ango edjali inde otiesakoli akoli; wiloko dja wanganga Mwengei la wiloko wa wato wakadjia omowaseli: nda ndenge e okumu okokelaka owe dji sambo, alidji ndai a ohi ehele okumu? ²⁴ yesu awaongweselia: mbai pe ikohuelani poopo esi, inga olimbolani mbai, mbai pe ekoowaselani nda okumu ekokelaka mbai dji sambo. ²⁵ Patisa e Yoani, edji eni ? likolo , inga etie wato ? kasi wabundoiya iwo amene: inga towongosa ate: la likolo, akotowasela ate: ndandenge etimondimalini ? ²⁶ Inga towongosa ate: la wato, tokowangaka ebiba eehele wato, a loyi iwo kpa wakomototaka Yoani nda mosakoli. ²⁷ Wamowongoselia yesu : toyewiti. inde pe awawongoselia: mbai pe itiowaselani nda okumu ekokelaka mbai dji sambo. ²⁸ Obundoyini woni? moto mwesi adjaali la wana wande wa pele wale. Akia atie ongo o liwoso, amoaselia: mana o mbai keke okeli keke la elanga e mbai e Vino. ²⁹ Inde awongosia: ibaliti, kasi mbuse aokia magba akia okeli. ³⁰ Sangbau akia atie ongo o wale, amoaselia ndenge kikima. Mana oho amowongoselia: ikoke, likumu la mbai, kasi akiti. ³¹ ndondo ewu wale ndai okeli mokano mo wawa ? Wamowongoselia : ongo o liwoso. Yesu awaaselia: Iyowaselini meemene, waputesi mamelo la wali wa ndumba wakoke liwoso lanu la okumu wo Mwengei. ³² Laate Yoani adjali ootiesakoli mboka e meemene, kasi ino otimondjimalini. Kaikonde waputesi mamalo la wali wa ndumba wamondjimali, kasi ino, wango waenali, otiyokeni magba la omondjimi. ³³ Okani eeti lisekpe. Memene monguta mwesi , aonali elanga ende e vino. Alingali eho la mite, atongia liwela; ase amaiya ebete eisake pukapuka, aawahia watuke wande wa elanga e vino, akia okendo. ³⁴ Ango ewumia engele ebukake, awatomia watuke wande atie watuke wa elanga e vino, laate wamohekele mogono monde. ³⁵ Kasi watuke wa elanga e vino wawahelali watuke wande, wamobinga mwesi, wamoolia o wale, wamobingi ongo o sato mabukeli. ³⁶ Atomia wadji watuke, motango mosungu oeti wango wa liwoso, wawakelali ndenge kikima. ³⁷ Gboo awatomelali mana onde, aasia: Wakomotosa mana o mbai. ³⁸ Ango e moeneli iwo mana oho, watuke wa elanga e vino wayaselia iwo amene: dhenda moto okotikala la ogumake; djakani tomoole, ogumake ekototikalela! ³⁹ Wamototali, wamolumbia saa e elanga evigno,alidji wamoolali. ⁴⁰ sikalandjo, ango memene elanga e vino akodja, akokela nde la watuke wa elanga? ⁴¹ wamowongoselali: akoyawolakola meemene, alidji akodhe elanga e vino la weeti watuke , wango wakomohekele esuki e mogono monde. ⁴² yesu awaaselia: otitangali te wuse ndondo e madhingo: libukeli enge elumbali wamai ndji eho nde ewumali likule e lilome; edjei otomo olongoyi atie likumu, kasi edjei ema ekamwake la maiso masu? ⁴³ Edjei eho nde, ikowaselakani, wakolongola okumu o Mwengei atie ino, wakoha eeti moki enge ekowota pukapuka. ⁴⁴ Ongo akokwa likolo la libukeli akobukia, alidji ongo libukeli likomokwele, ekomwandjakola. ⁴⁵ Mbuse e ooki maloba mande, iloko e wanganga Mwengei la wafalizeyo wayewali ate edjei iwo nde Yesu awaaselaka. ⁴⁶ Walukali o moheli, kasi wawangali ebiba e wato, aloyi ate iwo wadjali omototi Yesu ate adjei mosakoli.