¹ Kilisito alongosi iso lakita djongo owamalini njwi aseko olingele aleeti ndondo la ehelami la motuke te. ² Ndenga mbai Ppo idjei owasi ino ate inga otitenameni ngenga, kilisito atidja la ino litombate. ³ Idjei aleeti owaseli moto la moto owongo akotenama ngenga ate awongi la inde, okeli mibeko mobimba. ⁴ Ino paa obali olongisami la mboka la mibeko, okowani la kilisiti, bopengwi longwe la ngolu. ⁵ Laate la mboka la molimo ase ndondo la ondimi todjei ondengi elikia la boyengebeni. ⁶ Aseko ate ndondo kilisito Yesu, otonami ngenga inga esute edjei la tina te, ase ndindjongo ondimi ohongo ekokelaka otomo la libalano. ⁷ Odjei osombi olau, ndai otekesi ino ate otosi sambo la sembo te? ⁸ Ogulani edi nda ngambo la owelani la ino. ⁹ Mo mokeke la owukei eko mbekesa mapa misungi. ¹⁰ Indimi ndondo la Engali ate okokanisi la mungoli etite ndidjongo ongo: nde indongo adjei otungisi ino akokwa elingi lande, inga ndai. ¹¹ Wa manima, inga mbai idjei aleeti osakoli sambo la oteni ngenga, aseko lande idjei la ondindi? inga djongo, ekulusu edjei liwuli alete te. ¹² Aseko la wanyokoli wanu ikobala ate watene wenge kpaa! ebete kikima la libalano. ¹³ Laate, owolani ate odjei wasomi wa manima ate ndenite ate libalano lanu ohekele mboka la ehoho la wange ate okelelani ndenge watuke la libalano. ¹⁴ Aseko ate mibeko kpaa iyengelesami la owasi mwesi ate moto mangwa owe nda owe amene. ¹⁵ Dhee inga oswanani ase okolakesanaka, okobe ate otibitesane te. ¹⁶ Iyasi ate sombani la molimo ase ohekeleni ehoho la wenge mboka te. ¹⁷ Ate ehoha la wenge ekohitanaka la ehoha la molimo la ehoha la wenge kpaa wale ekowamalelaka, otekisi ino ate odjange okeli eho akani ino. ¹⁸ Nde inga okawani la molimo, odjei la sese la libeko te . ¹⁹ Sambo la wenge eyeneni ohola, ehohele: ekobo, sambo la osoto, okobokani, ²⁰ Asambeli itota, ndiwa owelani ndiwa, omemeli, oluleli, okawani, owandongbi ndongbii. ²¹ Owoli wato, olangwi masanga, ilambolite la sambo la mumotindo eho idjei okebesi ino ndenge ekewisali mbai ino liwoso ate wango wakokelaka sambo eho wati toto likumu la Engali. ²² Nde mbuka la liwoso idjei ndjo: libalano, mwemu, longo motema petee, la boboto, olamu, ondimi. ²³ O polo la owanangi motema la mibeko owamaleli sambo eho edjeti. ²⁴ Wango wadjei wato la kilisinto Yesu wasili obakesi wenge la ekulusu ebete mwesi la ewodje la ehoha la eho. ²⁵ Inga todjei okali ase la molimo, tosambaka mpe la molimo. ²⁶ Totidja la elolo te, totitungeseni, totilulanake te.