¹ Rhurhonderage buhyahya kuchijirira ama maruba g'obuhamiriza rhwenyine? changwa rhukenere kuguma n'abaguma, amaruba g'okuchihamir'embere zenyu changw'okulunda lwenyu? ² Mwabo muli maruba gerhu, mayandikirwe omu mirhima yerhu, mayinjikene n'okusomwa n'abantu boshi. ³ Mubonekene muli maruba ga Kristu, mayandikirwe kweyinjira y'akasi, arhali okubwino, changwa kugerera oku Muka gwa Nyamuzinda olamire, nanga arhali oku meza g'amabale, s'aliko oku meza g'omubiri omu mirhima. ⁴ Nechi chinihirizo, rhuchigwerhe kugerera Kristu embere za Nyamuzinda. ⁵ Kurhali kuderh'okurhwakagala rhwenyine ku ganiz'echintu chirhenger'emwerhu rhwenyine. S'aliko obushobozi bwerhu burhenger'e mwa Nyamuzinda. ⁶ Arhujirire nerhu kuba baganda bage omu bunvikane buhyahya, kurhali kugerer'amaruba s'aliko oku Muka, bulal'amaruba gayirha s'aliko Muka analamya. ⁷ Akab'akasi k'olufu, kashomekerhwe haguma n'emyandiko oku mabale, kabere k'obukuze kugerer'abana b'e Israeli barhachigalaga kulola omu malanga ga Musa, enyanya z'obulangashange bw'amesho gage, nachiro akaba obulangashane bwali bw'akachanji kageke. ⁸ Nkagurhe akasi ka Muka karhankaba kabukuze bwenene? ⁹ Akab'akasi kukuhanwa kakuzizwe, akasi k'okunali kab'enyanya bwenene omu bukuze. ¹⁰ Nachirw'akaba, aka kasi kakuzizwe karhabaga n'obukuze bunene, enyanya z'obukuze burhalukire bwenene. ¹¹ Nantyo, akab'echaliri chabichanji bigeke chakuzizwe, echebichanji by'esiku zoshi nji chakuzwa bwenene. ¹² Bulala rhuherh'echinihirizo, rhukoles'obushobozi bunene. ¹³ Rhurhanajiraga nka Musa, wahir'echirezi omu malanga y'abana b'e Israeli barhabonag'obuzinda by'ebyo bichanji bigeke. ¹⁴ Aliko bakomez'emirhima yabo. Bulala echochirezi chinachiliho, eyibasoma endagano ya Mira, echochirezi chibaho, bulala barhafunuliragwa oku chirhega kugerera Kristu. ¹⁵ Kugera buno, eyibasoma Musa echirezi chakabwirwe omu mirhima yabo. ¹⁶ S'aliko ey'omuntu ayemera Kristu, echirezi chanarhenga. ¹⁷ N'obo, Nahano ali Muka; nah'Omuka gwa Nahano guli, hali obushwekule. ¹⁸ Aliko rhwabo rhweshi abamalanga gashwekwirwe, rhuli rhwalola nk'omuchiyo obukuze bwa Nahano, rhwahindamwirwe mw'echochishushanyo kurhenger'obukuze kuhiko omu bukuze, nka Nahano, oli Muka.