¹ Mbage, Yakub napa maiwi anana kahinnadi, " Ana-anagu pakuwana nembaranggu. Ne Yowa kalunggumi mba wa'ige a 'nda'di mbarami nemi aro. ² Kapa kuwana anana Yakub, renggewe patekkina israel, amami." Ruben ³ "Ruben, Yo'u ana bodigu, yo'u pawessigu uwa kawungngana akabola. Yo'u papa mboto monno papa aka'da ngara kuwa ana'gu. ⁴ Takka, ne'buttu atemu napa ga'ige wee bonnu ndapa pande paba'ka. Nyaka, ne yo'u ndanna mandekiwi ba ana papa mbotowu. Ne Yo'u mu dou'ge pando'u durana amamu, monno badura dengngani aia mawinnegu. Ne Yo'u mu rawingge adirraka ne pando'ugu mbappa nga'ige panda'u bei'kamu." Simeon monno Lewi ⁵ "Simeon monno Lewi alli ka'ada. Numbu teko pambani waida enga'di ti'di'nda. ⁶ Ndaku pangngu dengngaki'ge pakuwa akabuni monno ama burri. Ne yowa ndakku deku kige nepa rawi abokala. Ne buttu ateda apamate dengnga'ge ata, monno a ndoro ranga ba kala'da ate dengngage. ⁷ Mi meli dengngage ne mbuttu ate oro mbuttu ate apa kori. Mi meli dommona orona mbarawige ne parawi a eka nga'i. Ne yowa ku po'uwarawi ne hikda wali ana-ana Yakub. Monno Ne yowa Ku ya dommo wi hikda ana-anada Israel. Yehuda ⁸ " Yehuda, angnguwa-angnguwamu ade'ikawu. Limmamu a essela bukkuna ngo'bamu. Angnguwa-angnguwa mu kawodo barramu. ⁹ Yehuda a ga'i i'na Kabon'di Singa. Anagu, ne yo'u angngu singawu a dede ponnu kamateda apaga'i Singa, na Yehuda na nga'u monno na beika, dakki ata ama'i papa kedewa. ¹⁰ Tokko mboto na Yehuda enga ge mbarrana. Tanda paretana ndanna ndi'ki kiwe mbarra wa'i na, nadukkiwe ba nya atoduge nemi papareta a amina monno mbarrana ngara kuwa sangadi aka wodoni. ¹¹ Yehuda na pa'gu ana darana ne pola Anggura monno Keledaina ne pola Anggura a duwa langgu takka. Monno na tokba wawa'i ndi kalambena monno jubana ne'e wee Anggura dana a duwa. ¹² Matana ara'rana oro enuna anggura. Monno Ngunduna akakana oro enuna susu." ¹³ "Zebulon na moripa wa'i ne mbarra bonnu. Niri lai'ngo ba nyawe pando'u a rammi tutuda kapal-kapal dana. Tana na napawatte dengnga'ge tana wanno Sidin." Isakhar ¹⁴ " Isakhar na pa nga'ina Keledai apawessi, abe'ika wa'i pando'u a mamuta. ¹⁵ Takka mbanna etawe ne pando'u anduwa nga'u waina anduwa monno nepando'u pamalena ate dengngana. Nyaka na mbukku dengngage mawona bana deitowe tangguna amboto; monno napa ga'i ata pawedena ne'e pawilli ro 'ndi." Dan ¹⁶ " Dan naka loko'ndi ana allina bana pa ga'i na ia ata awalina kabissu-kabissu Israel. ¹⁷ Dan, napa ga'ina nippe nirri lara, monno napa nga'ina nippe amagu bisa na ne kadanga lara, akati nan'di waina ndara, nyawe nyaka tonggo ndarawa kana kabukkita hetti lira. ¹⁸ Mori, ku remanggu ne pa so'u dengngaga." Gad ¹⁹ "Gad ake'deni ata bokala, takka ne nya na windo da ndi eru wa'i da." Asyer ²⁰ " Tana Asyer napa timbuge aluwana pa ga'a a nduwa ne nya na mangnguna pa ga'a atuba na ia toko." Naftali ²¹ "Naftali napa ga'ina a ia Rusa papa sella, monno apa nda'di ana-anada akabola." Yusuf ²² " Yusuf angai nai pola Anggura aka podaka, Pola Anggura aka podaka mbarra mata wee, monno kara'a-kara'a da lolo rindi deta. ²³ Ngara ata bani bake'nde paba bani wawi ka burrana bata'iwewi pana pama dawu dengnganawe. ²⁴ Takka, Pana na Yusuf engnga mandungkona monno kasi'u napa wessi pu. Nepa wessina walina mbarra abibita amboto apa mawo wa Yakub, orona Maramba Allah ba nya watu pawessi Israel. ²⁵ Bana ma pandeko Maramba Allah amamu engage bana tulugu. Bana ma pandeko Maramba Allah napa maringngiwu len'dena ura awalina langita ne bo'do, monno pala mata wee wali tana dana, Monno kanurru kanengga awalina sussu monno pado'u ata. ²⁶ Ama- Ina kawedamu napamaringngiwu parawida aduwa. Takka ne yowa, amamu, na louka ki'apo bana pamaringngiwa'ga. Bana ma pandedo ngara kuwa weemaringngi kanna mburruwe ponnu katowana Yusuf. Monno tanda mbotona a louka eka wali angnguwa-angnguwa na." Benyamin ²⁷ " Benyamin aga'inani seigala aka reba. Ne kappu gedde, napa matewi pawukku panga'ana ne'e gedde, kanna bawe-bawewi hikda pakolena." ²⁸ Hikda dona akambullu dwada kabissu Israel. Monno hikda patekkida ata Israel hetti pamaringngida. Napa maringngidi a hinna na a tuba mbarra'da. ²⁹ Mbage, Israel na nyadi paretah mbarrada, kahinnadi, ne baku mateko, kumbe'ige marengngadi ana-anlingngu. Monno ku be'ige tane wa'i'ga mbarra inna-ama kawedagu ne'e lambonga oma dana Efron ata Het. ³⁰ Ne la bonga ne'e ge oma dana Makhpela mbarra Mamr, Ne'e tana Kanaan. Abraham na wo'i we ne oma wali Efron ga'i kaku douge ne pando'u rate bahinna. ³¹ Abraham monno Sara, Mawinnena, atane wa'i ndi lambonga dana. Ishak bada Ribka, mawinnena atane wa'i ka ndi lambonga dana. Ne yowa ku tane wa'i kaini Lea, mawinnegu, ne lambonga dana. ³² Ne lambonga ni'i ge oma dana pa wo'ina wali ata Het." ³³ Ne banna pa dukkage panewena Yakub mbara ana-anana, nyaka kanna be'i ka, kanna ta'i ni wak'i na ne ponnu pando'u, mbage kanna mate.