¹ Ne gaina rapa patalira mba, a tekkina Yusuf, "Ne'i amamu a ngangnga." Nyakana ngindiwi anana a ndua'nda, Manasye monno Efraim, monno na kako tabbokka amana. ² Tengngarra ndukkina Yusuf, pirra ata ammindi a tekkina Yakub, "Anamu, Yusuf,ammiwi a elletawu." Israel na ndakke langu takka, takka na mandi'i ponna pandou ndetana. ³ Mbage, Yakub hinnawi Yusuf, "Maromba Allah a 'bi'ba a 'boto na m'bo wekkina mbara nggu ne'e Lus, ne'e tana Kanaan. Maromba Allah na pamaringi wa'iangga ne'e, . ⁴ Lunggu hinnage Maromba Allah mbarra nggu, 'Kurai nggu bangsa a kalada. Youwa ku yagu ne tana a tu'mbawe umbu ai'mbamu ka 'ndoungge wali murri-wali murri." ⁵ Nembahinna, wa'indi ndwa nda anamu a 'da'di wa'i newe mba nda ammi pongga. Hidda anamu a ndwa nda, Efraim monno Manasye, na'tuddawai ana ndou nggu, ke hidda natudawaini Ruben monno Simeon mbarra nggu. ⁶ Takka, wa'i ommo pongngukupudi anamu, tora 'mbammundi. Tumbana i' umma hidda ndi ngarana Efraim monno Manasye. ⁷ Ne'e lara ndana wali Padan-Aram, mate mbanna Rahel ne tana Kanaan, ndanna marroke wali Efrata. Na malangi pongngu we ate nggu. Ku tane wa'ini, ne karape lara a sangga Efrata (ne mbahinna Betlehem). ⁸ Kambage, Israel na etawi ana kambani Yusuf a ndwa nda. Hinnage Israel, "Ngrra ndi haida?" ⁹ Na wale Yusuf mbarra aman, "Ana gundi. Hidda ndonna lakawa payanangga Allah ne'e Mesir." Hinnage Israel, "Ngindiwi nemi mbarranggu. Kaku pamaringindi." ¹⁰ Na kaweda mbanna Israel monno matana a wawwura mbanna. Yusuf na ngindiwi haida anana mbarrana amana. Israel na ndekkiwi monno na gollopandi. ¹¹ Hinnage Israel mbarra Yusuf, "Ndakku pangeda pongngukingge mba kakku eta ommu ponggo matamu. Takka etawe! ¹² Yusuf na nde'ndewi anana wali 'ba'ba 'ndetana amana monno na kawodo ne arona amana. ¹³ Yusuf na ta'iwi Efraim tu'ba kawanana monno Manasye tu'ba wellona. Nyaka, ne'iwi Efraim tu'ba wellona Israel, monno Manasye tu'ba kawanana." ¹⁴ Takka hinna, Israel napa sila 'ndi limana monno na ta'i limma kawanana katowa 'detana Efraim, ana kamurrina Yusuf. Mbage, na ta'i limma wellona katowa 'detana Manasye, langngokopo Manasye ana ka'mbodinai, ¹⁵ Israel napa pamaringiwi Yusuf monno hinnawi, "Ku sabbaya ngga mbara Allah a panungnga waingga wali mbara ina-amagu, Abraham monno Ishak; Mbara Allah nggu a kalokongga ndukki ne loddo, ¹⁶ Papalewa a lissu angga wali a ndengnga, pamaringigandi naida lakawa a mbo'u. Mbanna mapandedowe wali hidda ata a lolo gawe ngara nggu monno ngara ina-ama kaweda nda, Abraham monno Ishak. Ku tabayya ngga ne tana kanna mbonnu uwara rangge ndukki umbu ai'mba nda." ¹⁷ Yusuf na etawa amana mbanna mbondala limma kawana na ne katowa ndetana Efraim. Yusuf ndanna mbeikingge ne a hinnana. Yusuf na terrenai limmana amana kanna pandikkiwi wali katowa ndetana Efraim monno na ta'i katowa detana Manasye. ¹⁸ Kahinna ngge Yusuf mbarra amana, "Ama, limma kawanamu ne'i mbarra ana a salah. Manasye ana 'mbo'diwa. Mbondala lima kawanamu ne katowa ndetana." ¹⁹ Takka, na amana ndanna ndeibake monno hinnangge, "Ku pande ngge, ana. Ku pandengge. Manasye ana mbodi. Mba enga matto ndonna monno enga ama ndo'ndai ata mangeda. Takka, Efraim a mbo'upo mba na louka kalada ponna wali nanya. Monno, mburru 'da'dina Efraim na louka pakalada pongge ." ²⁰ Nyaka, Israel napamaringiwi ne loddo. Ka hinna ndi, "Ana allina Israel a waingge ngaramu mba pamaringiwa ata. Enga hiddangge, 'Mbanna ma pande dowe na Allah napakalada nggu appa nggaina Efraim monno Manasye." Nyaka Israel nakeketa Efraim louka pakaladana indapi'apo Manasye. ²¹ Mbage, Israel hinnawi Yusuf, "Etawe, loddo mategu na tukke mbawe, takka na Allah na pamaringiwu. Na ngindi mbali mi ne'e tana ina-ama kaweda. ²² Ku yagu mbarramu a louka pakaladana inda pi'apo angua-anguamu, ne pandou paparewo nggu waige teko monno numbu wali ata Amori."