¹ Yusuf na kako pa arrowi Firaun, hinnage, "Ama monno 'du'da'di nggu ammi mbandi wali Kanaan monno enga 'ndi tana Gosyen mbahinnane'e. A ngindi kuwawi ranga monno ndou'da wali nemmi." ² Yusuf na pedewi limma ata wali 'du'da'di na monno na ngindi wa arona Firaun. ³ Hinnage Firaun mbarrada, "Appawe papawilimi?" A walewa, "Mori, ne yamme ata dawa rangama, hinna kaina inna-ama kaweda ma a to'ina." ⁴ Hinnage patekkidai Firaun, "Rapa kareba ndandua ne'e Kanaan. Nda'iki oma a mangu rutana panga'a da rangama. Nyaka ammimangga kamma ndangngi wa'i ne wannomu. Ma ndengngiwe mbarramu mori, ngga'i kamma ndangngi wa'iama ne'e Gosyen" ⁵ Hinnage Firaun mbarra Yakub, "Amamu monno 'du''da'dimu ammi mbandi mbarranggu. ⁶ Tanah Mesir na mawukke ne mbarramu. Pedekowe padou a ndua tora amamu monno anguamu. Ngga'i kundi ka ndangngi wa'i ne'e Tanah Gosyen. Nyaka wa'ikundi a pande limana ngga'i kundi ka karawagandi ranganggu." ⁷ Mbage, Yusuf na kandengngawi yakub, amana, ngga'i kanna aro mbarrana Firaun. Monno, Yakub napamaringiwa na Firaun. ⁸ Kahinnawi Firaun, "Pirra ndoumbammu?" ⁹ Kahinnangge Yakub mbarra Firaun, "Ne tolekanggu papangaina ata a lenana ngau touda kabullu ndouna mbana. Ndou-ndou tolekanggu na katonduwe monno na mbonnu ngge randena, louka pakatondupo wali ndou-ndou pali nda ina-ama kawedanggu." ¹⁰ Yakub na pamaringiwa Firaun monno na ndun'dakangge ne pakuana. ¹¹ V 11 Mbage, na ta'indi amana monno anguana ne tanah a ndua pongngu ne'e Mesir, ne'e tanah Rameses, a hinnana paparetana Firaun mbarrana. ¹² Yusuf na yadi panga'a amana, anguana, monno ngara kuwa ata a ndangngi mbara amana. Yusuf Nawo'i Tanah Tumbana Firaun ¹³ Na 'da'diwe kareba kalada. Nda'iki panga'a iya pandou-iya pandou. Mesir monno Kanaan nakka mbali milla orona ne a marawi. ¹⁴ Yusuf napa kuadi ngara riti wellinda mba mbattana panga'a, langngo kanya Mesir ndukki Tanah Kanaan. Monno, Yusuf na ngindi kuwawi riti ne'e ummana Firaun. ¹⁵ Tengngarra mba mbawi riti nda ata Mesir monno Kanaan mba wo'i waina panga'a, nya ka ammindi mbarra Yusuf ka hiddangge, "Ya kaima panga'a yamme. Mba indako, ne yamme mate mbamma aromu oro na mba ndai mbanna ritima." ¹⁶ Nyaka, na wale Yusuf, "Ne mbi 'mbaku ritimi, yaga'ndi rangami, kaku yaminggi panga'ami" ¹⁷ Mbage, hidda ata-ata a ngindiwi ranganda mbarra Yusuf monno Yusuf na yadi panga'a wellinda mbembe, ndara, monno ngara kuwa ranga pawukkunna payada. Etti ndouna Yusuf na yadi panga'a mbarrada wellida ranga-rangada. ¹⁸ Nemmi ndou aro, ngara kuwa ata nda'i mbanna ranganda monno da wo'i mbanna panga'a. Nyaka, ka nettindi mbarra Yusuf kahiddangge, "Ne yo'u pandengge ne yamme mba nda'i mba ritima monno ngara kuwa rangama tora kuamundi. Nyaka ne yamme nda'i mbanna apa-apama, nyakido touma monno tanama. ¹⁹ Kangngu hinna lolokowe mbamma mate aromu,louka yamme monno tanama? Wo'i amma monno tanama monno panga'a, monno parai ata na mangga Firaun. Ya kimmangga winni kamma todaka ngga'i kamma toleka monno tanam kandanna marokotaka." ²⁰ Nyaka, Yusuf na wo'iwi ngara kuwa oma ne'e Mesir torana Firaun. Ngara kuwa ata a wa'ina ne'e Mesir a mbattandi omada mbarra Yusuf orona kareba kalada. Nyaka, ngara kuwada tana tana nandi Firaun. ²¹ Monno, Yusuf napa ndikindi netti iya pandou, a walina a iya watte ndukki watte wadeka ne'e Mesir. ²² Tana ndappa wo'ina Yusuf, nyakido tanah ndounda imam. Orona,imam a kolena poko a walina mbarra Firaun monno nya katoleka. Nyaka, imam nda mbatta kindi oma nda. ²³ Nya kahinnangge Yusuf, "Youwa ku wo'i mbammi monno tanami torana Firaun. Ne mbahinna ku yami winni mbarrami, monno ki toda kawi omami. ²⁴ Mbarapa konna makeni , yemi kiyani papalimmami ne pakenimi mbarrana Firaun. Ne papatakambullumi pakeni ndoumindi mbi pawinindi pa todakamme omami monno ne wadde panga'a mi monno 'du'da'dimi monno ana-anami." ²⁵ Nya ka wale, "Ne yo'u mu gata mbamma tolekama. Ma senango mbanna rai atama Firaun." ²⁶ Mbangge, kanna rainngge li'i ukkuna a atuma tana mesir, monno hidda li'i ukkuna a atura we ngara kuwada pakoleda awalina oma ndana torana Firaun. Nyakiddo tana imam ndapapa tanana Firaun. Ummana Patanega ne Mesir ²⁷ Israel engawa'i ne Mesir. Na ndangngi wa'i ne'e tanah Gosyen. 'du'da'dina a matamba kaladana. Hidda mori tanana Mesir monno appawili panduangge ne tana. ²⁸ Yakub enga wa'i ne Mesir kambullu pittu ndouna, nyaka ngau pata kambullu pitu ndouna. ²⁹ Mbanna dukke we rapana mbanna mate, Israel na kandengngawi Yusuf, anana, ka ammiwi mbarrana. Hinnangge, "Mbaku kolekongge manawara atemu, ta'iwi limamu ne mbarra kenganggu monno ku aurawu. Aurawu mbaragu mbane wo'u mbamu manawarangga mbaragu. Mbakku mate kowangga, ndu tane wa'ikangga ne Mesir. ³⁰ Tane waingga ne pandou pa tane wa'idandi ina-amanggu. Ngindi wangga makku louso wali Mesir monno tane wa'ingga ne'e odi 'du'da'dinda." Hinnangge Yusuf, "Ku aurangga mba ne youwa ku ndekungge apawe ne patekinggu." ³¹ Mbage kahinnangge Yakub,"aurawu mbaragu." Monno Yusuf na aura mbana ndekukuangge pateki 'ndai. Israel na mbondala mbali katowana ne pandou ndeta.