¹ Ne'againa mbana kedde we kareba ne'e tana Kanaan, na' Yakub na'pande ngge ne'e Mesir mba' wai'ndi pare. Nyaka na Yakub na' panewe ndeng'ngadi ana na, "Appa ka'nee'nda a' mandi'i ka'dai'ko papawilli nda"? ² Ku reng'ngewe wai'ndi panga'a pabatta'nda ne'e Mesir. Kako'mi ne'e ka'wo'i panga'a ga'i ka'enga toleka'nda monno kadata matekana." ³ Mbaka a' kako hidda kabullu angu'nguwa na Yusuf ne'e Mesir mba wo'i panga'a. ⁴ Yakub ndana patuka'ki na Benyamin mbana ndeku'ndi angu'nguwa na. Orona Benyamin nyawai'kina angu'nguwa na Yusuf. Na' Yakub na madauta mbana marawiwe nda'pa pande'dengnga tou'ndeta na Benyamin. ⁵ Kareba lagare, na' eka'gaiwe ne'e tana Kanaan, kana luwana ata Kanaan a' kako ne'e tana Mesir a'wo'i panga'a. Ne'e tillu nda wa'ikaidi ana na Israel. ⁶ Na' Yusuf gubernur wa ne'epona ne Mesir. Nya'bana a' paretawi panga'a pabatta'nda barra nda ata a' ammina ne'e Mesir. Angu'nguwa na Yusuf ammi'ndi barra'na monno a' kawodo barra'na. ⁷ Na' Yusuf na'etawi angu'nguwana monno na'tadawi, takka nya narawi wekki'na ka'nda pandekaga hinna, nya kana rai'wekkina mbana pa'katto nda'we aro'nda mbana panewe ndeng'ngadi. Kahinna'ndi, "Ngge wali 'nyamiwe yemmi?" Kawale'we, "Yamme, wali mawe tana Kanaan. Yamme mai'mawe newe mawo'i panga'a." ⁸ Yusuf na pande'di angu'nguwana, takka hidda dapande kiwi garrainya. ⁹ Mba hinnawe, Yusuf na lolowi kanaga nippi na tuba'da angu'nguana. Kahinna ngge Yusuf barra nda, "Yemmi mba ammi migi nda' maikime mawo'i panga'a! Yemmi ata patuka ulluda migi apandena padou. Yemmi mba ammi migi kapande ullu wa'ige peina kadukka'ma." ¹⁰ Takka, hidda ngge angu'nguwana barrana, "Indaki, mori, ne mbama maiya againa ata papawedemu. Ne mbama maiyama wo'i takka mawe panga'a. ¹¹ Yamme ngarra kuwa pa'angu'nguana, yamme iya kidu ama'ma. Yamme ata lurutama monno maitakkama wo'i panga'a". ¹² Lango'kahinna ko, Yusuf kana panewe barra'nda, "Indaki, mbi maiya'mi ullu wa'ime wai'ge pakambumi"! ¹³ Nyaka hidda'ngge, "Indaki, mori, yamme mbama mai tudda papawede wama wali Kanaan. Ngara kuwana mapa angunguana, iya wi ama'ma. Yamme kabullu duada'ma apa'angungua'na. Na iya allikama engawi barra ama'ma, monno angu'nguwama waddeka na'madoi bana mate". ¹⁴ Takka, kahinna ngge Yusuf barra'da, "Indaki! Ne mbaku etami ata amaiyami a'etawe ne wanno. ¹⁵ Ne'la kupakalokomigi mbiana panewe'mi. Demi Firaun, ku aura waga yowa daku ngga'ikimigi mbikako mbadangindi belli kowa angu'nguwami kamurri barra nggu. ¹⁶ Iya ata wali barrami na kako wali mbali kana renggawa angu'nguwami kamurri, takka hidda wadeka dangngimi nera ne gollu ndana. Nepahinnawe, yamme mapandengge appawe nepatekkimi hinatakkana ato indaki. Takka, mbala wolo kumiwe, orro Firaun, ku'aura ngga ne yemmi ullu wa'ime mba ellewe wanno'ma." ¹⁷ Mbaka, na Yusuf, kana patama ngarra kuwadi ne gollu ndana touda loddona. ¹⁸ Nama lawiwe a touda loddona, kahinna ngge Yusuf barra'da, "Yowa iya ata amadauta langutakkawi Maromba Allah. Rai'ngge ne, mbaka kaku pakalokomigi mbi toleka. ¹⁹ Ne yemmi mba ata a luruta'kumi, iya ata olle mi na dangngi ne gollu dana, monno yemmi wadeka kakomi wali monno kangindi'ndi panga'a hidda ndu'dadimi. ²⁰ Takka, mi'ngindiwa na angu'nguwami kamurri barra nggu. Nya' kaku pande ngge mbahinna takkana ne patekkimi, monno ndimi mateki." Nyaka, o'o ngge. ²¹ Kahidda ngge iya ata-iya ata, "Ne nyabawe ndeluna parawi'nda ndaduwa barrana angu'nguwa'da Yusuf. Ne itto ta'etawa mbanna poddana mawilla, na dengngiwada patulu moripa'na, takka ndata rengeki'wa. Ne mbahinna'we neibada padu'adana". ²² Kahinna ngge, Ruben barra'da, "Kalunggu'migi nda'rawi kage ndaduwa mbarra'na nati lakawa, takka ndi' rengnge kiwaga. Hinna ne'e tawena ndaduwa oro mate'na." ²³ Hidda'da pandekiwe, mbana Yusuf napande dawe patekki'nda orona Yusuf nawaina ata a'palalipa panewe mbapa newe denga'di. ²⁴ Na Yusuf na dommuwe ne'papanewe'nda, nyawe kana tippu ngi'o. Kana madikira, na ndundakage ne koro. Ne mbana wali Yusuf, na'ndekewa Simeon monno na'kettewi, hidda wadeka angu'nguwa'na apa serawi. ²⁵ Kahinna ngge Yusuf barrada ata papawedena kataudi pare hidda karungo'da. Hidda angu'nguwana, a yabana riti barrana Yusuf welli'da pare, takka ndana ndekekiwi hidda riti. Napatama mbalida'di karungo pare dana'da. Kana yadommo' atuba pangaa'da lara'ndana. ²⁶ Nyaka, hidda kabotiwi pare ne ponnu keledai monno ka'kako. ²⁷ Ne' gedde ka'ngau ne iya padou mba taddona. Iya ata olle'nda na'wukkewa karunga'na kana ndeke pare a'tuba keledai'na. Takka ne karungo'dana, na'etawi riti'na! ²⁸ Kahinna ngge barra angu'nguwana, "Etawi! Newe wa'idi riti pabayara'wai pare. Wa'ibana iya ata apatama mbalidi riti ne karungadana nggu. "Nyaka madauta langu takka. Kahidda ngge iya ata-iya ata, "Appako parawina Maromba Allah barra'da"? ²⁹ A'paangu'nguwana awali barrana Yakub, ama'da ne tana kanaan. Kapa mudu larana'di Yakub appawe amarawi. ³⁰ Kahidda ngge, "Gubernur ne wanno napa pakattona mbana panewe barra'ma. Napa ngedda'ma mba maiyamawe pa'eta ullu wa'iwe wanno'na! ³¹ Kalimma'ngge barra'na, "Yamme ata lurutama, monno nda'ata a'maieta ulluwe ne wanno'mu. ³² Yamme kabullu nduada ndadi'ma, monno iya'wi ama'ma. Nyakido na iya angu'nguwa'ma namado'i bana mate, monno iya angu'nguwama a'mbo'upo engawi ne Kanaan." ³³ Mbapa hinnawe, gubernur ne'e wanno hinna ngge barra'ma, "Kuyamigi iya papa'ngedda mba ata luruta takka kumi: Ga'ikuwi iya angu'nguwami ne barra nggu. Ngindiwi pare barra'da ndu'dadimi. ³⁴ Takka, ngidiwa angu'nguwami akamurri barra nggu ga'i kaku pande'ngge mba ata luruta takkami. Ne mbitekki'ko a hinna takka'na, ku'pasella migi na angu'nguwami monno mi'kalogana mbimawo'i panga'a ne wanno'ma." ³⁵ Mbapa hinna'we, kandekewi pare wali karungodana'nda, monno iya ata-iya ata a'tambokawi riti'da ne karungo pare dana'nda. Nya'kabaetawi monno ama'da hidda riti, amadauta ngara'kuwa. ³⁶ Kahinna ngge Yakub barra'da, "Peinawe yemmi mibeige mbamua kuana ana nggu? Yusuf ettibawi. Simeon ettibawi. Monno, hinna nee mibeige mbi ngindi dommowa na Benyamin"? ³⁷ Takka, kahinna ngge Ruben barra ama'na, "Ama, pamategadi ana'nggu a'duada mba daku walingindi kowa Benyamin barra'mu. Waiga yoga! Yowa a'ngindi mbaliwa barra'mu." ³⁸ Takka hinna ngge Yakub, "Daku palokokiwi Benyamin kako palolo dengnga nggu. Namate bana a'ngunguwa'na monno nyakidona iya lakawa a engapona wali barra mawinne nggu, Rahel. Mba wa'i koge amarawi barra'na netti laradana mba kako ne Mesir, ne nyabawe apaoro yowa a'kaweda'ba baku burru ne rate'ndana ngindi mangeli."