¹ Nduada dou'na a'malawi, na' kanang'ga nippi na Firaun ne'i a' ndede ne mbarra Sungai Nil. ² Ne' kanang'ga nippi na wa'indi a' pittu sapi a' louso wali loko nda'na monno a' ndede ne'e mba' nga'a ruta. Hidda sapi na'nduwa wekki nda monno a' morru. ³ Mba'ka a' lousa pi'a ammo pittu sapi wad'ndeka wali ne'e loko nda'na monno a' ndede kaina ne uppu loko mbarra nda' hidda sapi a' morru. N'takka hidda sapi a' kareko monno a' karodduka. ⁴ Hidda sapi a' kareko nena a' nga'andi hidda pittu sapi a' morru. Mba'ka na' nradana Firaun wali ndura na. ⁵ Mba'ka na ndura mbali monno na' kanang'ga nippi pi'a dommo. Hinna ne'e na' kanang'ga nippi na etawi pittu gasu kalaki pare a timbu ne'e iya pola pare. Na' kalaki pare na'nduwa monno na'bonnu na uwa pare. ⁶ Mba'ka na' eta pi'awi pittu gasu kalaki pare a timbu, takka a' kareko monno a' mawola orona paring'ngi monno bangata. ⁷ Hidda kalaki pare a' kareko a' nga'andi hidda a' pittu kalaki pare a' nduawa. mba'ka na' nrada pia'na Firaun wali ndura na wuddi na' pande ngge mba' kanang'ga nippi na. ⁸ Koka kappungedde na Firaun na karod'duka ate ndeng'ga ngge ne kanang'ga nippi na. Nya'kana kadengnga ngarra kuwa'ndi ata pande a' wa'i na ne'e Mesir. Na' Firaun na'palara ngge ne kanang'ga nippi na mbarra'nda, takka nda'i pong'nguki iya ata wali mbarra'nda a' pande ngge i'na ne' kanang'ga nippi. ⁹ Mba'ka na' ata pawede na Firaun, na lolo'wa na Yusuf, kahinna ngge mbarra na Firaun, "Ku lolo'we ne a' ndadi barra nggu. ¹⁰ Wa'i ngge a' iya pami'a mbu mba'ni ata mbatta roti monno yowa, monno mu'patama'ma gollu nda'na. ¹¹ Ne a' iya gedde'na ma' kanang'ga nippi. Ne' kanang'ga nippi 'ma mang'ngu i' ndou'na. ¹² Wa'i iya ata Ibrani ne'e gollu nda'na olle'ma. Nya' ata papawede nai kepala pengawal. Ma' palara ngge ne kanang'ga nippi ma' mbarra na' monno na tekki'we i'na mbarra ma. ¹³ Ngarra kuwa patekki'na a' nda'di takka. Hinna ngge mba'na tekki'we ne' yowa mba'ku kalogaba'dona ku'pawilli mbali ngga, monno na' nda'di takka we. Hinna kai'ngge mbarra na ata batta roti mu'mate'wu monno na nda'di takka 'we. ¹⁴ Na' Firaun ka'na kadeng'ngawi Yusuf wali gollu nda'na. Na' Yusuf na pawenna we'kina kalambe a'ndua mba'ka na kako arowi Firaun. ¹⁵ Ka'hinna ngge Firaun mbarra 'na Yusuf, "Ku' kanang'ga nippi wa'ga, takka da'iki a' pande palara ngge ne' kanang'ga nippi barra nggu. Ku' rengngewe yo'u mu' pande palara ngge kanang'ga nippi, mba'tekki gowe ata ne kanang,ga nippi nda' mbarra'mu." ¹⁶ Na' walewe Yusuf, "Nda'ku pande'ki! Takka na' Maromba Allah Nya' apalara ngge mbarramu mori nggu Firaun." ¹⁷ Kahinna ngge na Firaun barra'na Yusuf, "Ne' kanang'ga nippi nda'na nggu, nei'ngga a' ndede nti'di Sungai Nil. ¹⁸ Pittu sapi a' louso wali loko ndana monno a' ndede ne'e mba' nga'a ruta. Hidda sapi a' morru monno a' ndu'wa. ¹⁹ Mba'ka ku'eta pi'a dommo pittu sapi waddeka a'lousa wali loko nda'na, takka hidda sapi a' kareko monno a' karodduka. Hidda sapi pa'eta nggu hidda mbana sapi nda'dalina ne' ngarra'ndukka na tana Mesir! ²⁰ Hidda sapi a' kareko monno a' karodduka a' nga'a ndi hidda sapi a' nduwa, ²¹ Takka hidda sapi e'nga'ndi mba' kareko monno karodduka. Monno da'i pongngi'ki a' mawung'nga ne wekki ndeta'nda. Mba'pahinna'we ku' rada,na wali ndura nggu. ²² Mba'ka ku kanang,ga nippi pi'a ngga, ku' etawi pittu gasu kalaki pare a' timbu ne'e iya pola pare. Na' kalaki pare na' nduwa monna a' bonnu na' uwa pare. ²³ Mba'ka a' timbu pi'a dommo pittu kalaki pare waddeka, takka a' kareko monno a' mawola oro paring'ngi bangata. ²⁴ Hidda kalaki pare a' kareko monno a' mawola a' nga'a ndi hidda kalaki pare a' nduwa. Ku'palara ngge ne' kanang'ga nippi nggu barra'nda ata pande ne' wanno nggu, takka da'i pongnguki iya ata a' pande papalara ngge i'na we ne kanang'ga nippi nggu. Appa ko' kambu'na ne kanang'ga nippi nggu? ²⁵ Kahinna ngge Yusuf barra na' Firaun, "Hidda kanaga nippi a'nduada a' sama i'nda. Na Maromba Allah na'tekki gowe barra'mu appawe a'wukkuna pa'ndadi. ²⁶ Pittu sapi monno pittu kalaki pare a nduwa i'na we pittu douna a nduwa. ²⁷ Monno hidda pittu sapi nda'duwa monno a' karodduka monno pittu kalaki pare a' lomba monno a' mawola i'na we mba'lage pittu ndauna we kareba a' nda'di ne wanno'mu. Mba' lage na nda'di we kareba e'kagai pittu douna, balinawe pittu douna a ndu'wa. ²⁸ A' hinna na patekki nggu barra'mu patekki' nggu barram, na Maromba Allah napatutugo barramu appa we a' wukkuna pa'ndadi. ²⁹ Ne' pittu ndouna na'luwa'ndi pa'nga'a ne'e Mesir. ³⁰ Mba' lage na nda'di we pittu douna kareba. Ammi mbage kareba nda'duwa a' nda'uwe ne tana wanno. ³¹ Na palalli we ne kareba, lappata hidda ata Mesir a' bullangge hetti pona mba' luwa'ndi pa'nga'a nda. ³² Mori nggu Firaun hidda kanaga nippimu a' nduada a' mangu i'nda a' sama. Ne' nyawe na Maromba Allah, Na'beige mbana tekkigowe mbalage a' nda'di takka hidda patekki'Na, monno na tukke mbawe ukkupa'ndadi. ³³ Nya'ka mori nggu Firaun, pede'wu iya ata a' maneilo a' manganne monno a' pande, mu'keketawi ga'i kana atura we ne tana wanno. ³⁴ Mba'ngge, pedewu waddeka ata kapa'kuwana panga'a a wali barra'nda ata Mesir. Ne pittu douna a nduwa, hidda ata a yawi seperlima panga'a nda wali ngarra kuwa panga'a patodaka'nda. ³⁵ Kahinna we kapakuwa mema'na panga'a ne pittu ndouna a nduwa ka'nbondala memawi a tu'nbawe ne pittu douna nda'nduwa. Yo'u a paretawi ngara kuwa panga'a. ³⁶ Ne bahinna'we lage, wa'i mbana panga'a a tubawe ne pittu douna kareba eka'gai ne'e Mesir. Monno ne Mesir danna moddakiwe orona kareba eka'gya. ³⁷ Mba'na etawe Firaun monno ngarra kuwa ata pareta'na nya'bawe pata pangedda a louka nduwa pong'ngu, nyaka a' waige. ³⁸ Nya'ka hinna ngge Firaun barra'nda ata papareta'na, "Itto ndata tabbokaki ata a'louka nduwa wali barra Yusuf a' pande papawilli ngarra kuwa ngge! Ngau Amatuwa wa'ige barra'na nyaka suppu maneilo manganne na"! ³⁹ Nya'ka hinna ngge Firaun barra na Yusuf, "Na Maromba Allah na'patutubage barramu ngarra kuwa a' wukkuna pa'ndadi. Nya'ka ku pangedda ngge dai'bana ata waddeka a louka maneilo manganne wali barra'mu. ⁴⁰ Ku keketawu langge ata papamboto nda'nggu ne tana Mesir. Ngarra kuwa ata papareta nggu a ndeku ngge ne patekkimu. Yowa kina iya ata a louka mboto wali barramu". ⁴¹ Kahinna ngge Firaun barra na Yusuf, hinna ne'e ku'keketawu gubernur ne ngarra kuwa tana Mesir. ⁴² Mba'ka na Firaun kana kaiwi tawurru wali wolla limma nde'tana kana patau'nai wolla limma nde'ta na Yusuf. Nta'da sangadi wa'i ngge ne tawurru ndeta. Na Firaun na'ya ammowi Yusuf kalambe a nduwa monno na'patauwi rewa ndoka mbukku ndeta na. ⁴³ Nya'kana Firaun kana yanawi Yusuf na dokara a' ka nduada pakaletena. Ata papambotona tokko a' kako ullu ne'e aro dokara monno hidda ngge, "Ruka'ndi kundomi! ruka'ndi kundomi!" nya'kahinna we Yusuf mba' keketawa gubernur ne'e ngara kuwa pa'dou ne tana Mesir. ⁴⁴ Kahinna ngge Firaun barra na, "Yowa ndo'na Firaun, tokko nda ngarra kuwa ata ne'e Mesir, takka ndai'ki iya ata ne'e Mesir a' keketagu limma atau appa kawoddeka ndi' wa'i na mba'nda yo'u'ko a'paloko'ndi. ⁴⁵ Mba'ka na' Firaun kanna pangara pi'awi Yusuf, Zafnat-Paaneah. Monno na' yadommo wi Yusuf iya mawinne a ngara na Asnat. Nya' ana nai Potifera, imam ne'e Kota On. Nya'ka gubernur'wa na Yusuf ne'e ngarra ndukka na tana Mesir. ⁴⁶ Na Yusuf touda kabullu douba'na mba'na pawilli barra na tokko Mesir. Na'woleta ngge kirradekka'na tana Mesir. ⁴⁷ Ne' pittu ndouna a' nduwa, a' makeni tetakka hidda ata Mesir. ⁴⁸ Na' Yusuf napakuwa ngarra kuwa'ndi panga'a ne'e tana Mesir pittu douna a' nduwa monno na mbondala panga'a ne'e iya tana wanno iya tana wanno. Ne' iya tana wanno, na mbondala pare a' timbu omadana ne'e ntidi wanno. ⁴⁹ Na Yusuf na mbondala pare mange'nda a' gaina laingo bonnu ndana, lappata ndapa pandeki mba'kirawi mange'nda na. ⁵⁰ Na mawinne na Yusuf, Asnat, ana nai Potifera, imam ne'e Kota On. Mba' danna ndukki'po kareba, Yusuf mbada Asnat wa'i ba'ndi ana kabani nda a' nduada. ⁵¹ Na' Yusuf kana pangarawi ana mbodi'na Manasye. Hidda'wi mba pangarawi orona Yusuf hinna ngge, "Na Maromba Allah na rai'ngge mbaku bulla ngarra kuwa'ndi karodduka nggu monno ngarra kuwa a'wa'ina umma na ama nggu. ⁵² Na' Yusuf napangara'wi ana ka'nduada na Efraim. Na yawe ne' ngara orona hinna ngge mbana tekki we, "Yowa mang'ngu karodduka kalada nggu, takka na Maromba Allah na'raiga mbaku kolengge ngarra kuwa na." ⁵³ Ne pittu ndouna, hidda ata wa'i ngarra kuwa'ndi panga'a nda, takka ne ndou pakolle wai'nda nama'mbaba. ⁵⁴ Nya'ka ne pittu ndouna kareba mba'na nda'di we a' hinna na patekki na Yusuf. Na' nda'ndi we kareba ne ngarra kuwa pa'dou, takka ne'e Mesir mang'ngu panga'a nda ata orona Yusuf na bondala mbana pare. ⁵⁵ Ne' wulla kareba, hidda ata Mesir a' kandeng'nga barrana Firaun mba' deng'ngi panga'a. Hinna ngge Firaun barra'nda, " kako monno tuwa Yusuf appawe ukkupa rawi'mi". ⁵⁶ Mbana, matallarawe ne kareba, na Yusuf na ya'ndi pare wali ammi kapettela ndana mbarra'nda. Na' batta'di pare pa'moddala'na barra 'nda ata Mesir. Kareba a'pakori ekagai'na ne'e Mesir. ⁵⁷ Ne' kareba a'pakori ekagai'na na nda'di kaiwe ne'e ngarra kuwa pa'dou, hidda ata a' wali tana wanno ne ntidi ndo'nga na Mesir ammi ndi ne'e Mesir a' wo'i pare.