¹ Duhen ni, deng baling tedeng ne keton Dwata tekuy melan bè yóm kehtahu tekuy. Deng tekuy semyu ke Dwata mlan bè Jisas Krays yóm gónó tekuy mogot. ² Lemwót bè yóm kehtahu tekuy béléen, deng wen ne lan Dwata tmóbóng tekuy. Tey kligal tekuy yóm enget kwen kut du yóm kun keheyu Dwata sok tekuy gefet bè longit. Yó se hendón nefet nawa tekuy nim kmoen ni. ³ Là kô són du yó gónó tekuy hligal bè yóm enget kwen guta tekuy, okóm hligal tekuy du snéen yó kem gónó tekuy glayam. Yó uléken yóm keglayam tekuy yó, duhen yóm kegebek tekuy hebala. ⁴ Ne yó bud uléken yóm kehbala tekuy yó, duhen yóm kehyu nawa Dwata ebélê tekuy. Ne ke hyu nawa Dwata bè yóm kmò tekuy, yó gónón temnù kegel nawa tekuy du yóm hyu hendón tekuy yó. ⁵ Enget dohò keguta tekuy du yóm hendón tekuy yó, abay se deng gotu gnóm tekuy ne yóm kebong nawa Dwata tekuy, hlanen bè yóm Tulusen deng basahen tekuy. ⁶ Yóm tolo knô tekuy lem salà, là kô gbek tekuy lemwà knô tekuy. Okóm bè yóm keheto yóm buteng Dwata du, fen tódô matay bélê tekuy Krays.  Bélê tekuy, balù sentenga ktedeng kmoen yóm sotu tau, tey megel ke fen tekuy tô matay béléen mò leyu lówóhen. Là tengón tekuy du, déke wen se tau gembek mò du. ⁷ a ⁸ Okóm ke Dwata kun, deng hegfanen yóm tey kebong nawahen tekuy bè yóm tehe le khógówen ke Krays edini, mò fen matay bélê tekuy igò tekuy tolo gemsalà. ⁹ Ke deng fen hamà Jisas yóm kun litô anì baling tedeng keton Dwata temno, milud he yóm enget kehewaen tekuy gu lem yóm tafak Dwata bè yóm hol són kdaw. ¹⁰ Tey tehe kesefehon tekuy ke Dwata, okóm kun, niten tekuy sefyu hlanen bè yóm le katay yóm Ngaen. Duhen ni, bè yóm deng kesefyu tekuy ke Dwata, temno he bud któbóngen tekuy hlanen bè yóm deng bud kehlowilen ke Krays. ¹¹ Okóm là sónen du yó gónó tekuy hligal. Hligal tekuy bè yóm deng nemò Dwata hlanen bè yóm gónó tekuy mogot Jisas Krays, duhen yóm deng kesefyuhen tekuy ne Dwata. ¹² Bè hol kebuten, lemwót bè kegsalà Adam gónón wen salà lem benwu. Lemwót bè kegsalaen gónón wen hatay. Ne yó gónón lemwót matay kdéen tau abay se gotu le gebót gemsalà. ¹³ Gu laanen là deng wen hlau hlolò Dwata kul, deng kem gegena ne yóm kegsalà tau. Okóm là deng snolò Dwata du bélê le he yóm kegsalà le yó, abay se là dengen wen hlau hloloen kul. ¹⁴ Okóm nebuten bè kun kdaw Adam tganay efet kól bè kun kdaw Musis, gotu le matay yóm kdéen tau lemwót bè yóm kegsalà le. Yóm tehe kun salà nemò Adam, nuléhen yóm hlolò Dwata du. Baluen he ke là sengeden yóm kul salà nmò yó kem dumu tau, senged gotu katay le snéen. Bong ke Adam kun, lómón ke olung yóm tau hendón nangat le, duhen Krays, abay se seket wen guta tau bélê le. ¹⁵ Okóm là sengeden yóm guta tau bélê le. Yóm tey hyu guta tau lemwót bè yóm tódô basa Dwata, duhen Jisas Krays, okóm tólóng se guta le lemwót bè kun kegsalà Adam, duhen hatay. ¹⁶ Ne sotuhen, là senged nefeten yóm tóbóng Dwata ne yóm là kimón Adam. Yó nefeten yóm ke Adam, duhen yóm tafak Dwata laen kô dù tul sónen. Okóm yó nefet yóm kun tóbóng Dwata hlanen bè Jisas Krays, duhen yóm kehelifóten salà yó kem tau, balù yóm tey kdê salà nemò le. ¹⁷ Tahu se, lemwót bè yóm salà yóm sotu tau, yó gónón wen hatay. Okóm yóm kun nmò yóm sotu tau, duhen Jisas Krays, tódô kedéen tau gemuta yóm tey basa Dwata duhen yóm ketedeng kton Dwata kul. Blayen kul yóm klowil laen kô dù tul sónen, ne enget le gomong bè Krays mogot benwu. ¹⁸ Ne duhen yó, lemwót bè yóm sotu salà, yó gónón megtafak kdéen tau. Okóm bud lemwót bè yóm sotu nmò hyu, yó gónón mekó ta le yóm kegtafak le yó, ne bè yó se gónó le gemuta yóm klowil laen kô dù tul sónen. ¹⁹ Lemwót bè yóm là kimón Adam gónón baling gemsalà kdéen tau. Ne lemwót bè kimón Jisas, yó gónón tedeng keton Dwata kul. ²⁰ Bè yóm tehe kehesulat Dwata du ke Musis yóm hlauhen, yó muhen mò fen hdilô du bè kem tau yóm salà le. Balù tennga kbongen yóm salà kem tau, mom temno he kbongen yóm kun tóbóng Dwata. ²¹ Duhen yó, yóm kegsalà tekuy, newiten tekuy elem hatay. Okóm yóm kun tóbóng Dwata, newiten tekuy tedeng anì helós tekuy ebè yóm klowil laen kô dù tul sónen, hlanen bè yóm gónó tekuy mogot Jisas Krays.