¹ Ke lómón yó se kemò któbóng Dwata tekuy, tódô henlel tekuy ne kô mò salà anì hol temnù kbongen yóm tóbóngen tekuy? ² Là kô yó du. Igò tekuy deng matay bè yóm óyô tekuy mò du yóm salà. Yó gónóhem men, là bud tekuy gefét lemen ne yóm salà. ³ Gotu tengón ye se yóm tehe kehbabtays tekuy mò ilô yóm deng kesesotu tekuy bè Krays Jisas. Bè yóm kehbabtays tekuy yó, hol lómón ke deng tekuy gomong bè Jisas bè yóm tehe katayen. ⁴ Duhen yó, bè yóm kehbabtays tekuy, hol lómón ke deng tekuy gomong lebeng béléen. Yó gónó tekuy gomong bè yóm katayen anì gomong tekuy snéen bè yóm bud kehlowil Maen du gu lem hatay, ne anì homong benlay Dwata tekuy lomi klowil. Bè yóm tehe kehlowil Dwata ke Krays, yó gónó tekuy mton du yóm tey kegbek Dwata. ⁵ Ke gomong tekuy matay béléen, gomong tekuy snéen bè yóm bud kehlowil Dwata du. ⁶ Tngón tekuy se yóm gna klowil tekuy gu laan tekuy là deng hemtahu, tu se yóm klowil deng gomong bè Jisas bè yóm ktutuk le du bè kros, anì gomong tekuy matay ne laen dù bud kegbeken bélê tekuy yóm óyô mò sidek, ne là bud tekuy genu lem salà.  Abay se ke deng matay yóm tau, là buden gfét du ne yóm óyóen mò sidek. ⁷ a ⁸ Ke deng tekuy gomong matay bè Krays, tódô tngón tekuy se bud tekuy gomong mowil béléen. ⁹ Tngón tekuy snéen yóm deng bud kehlowil Dwata ke Krays, là kóen bud matay ne. Laen bud gmoen béléen yóm hatay. ¹⁰ Tek suléken matay anì matù bè salà. Ne bud mowil mò gónón megdóyón Dwata. ¹¹ Yó gónóm mon du, yu yó kem deng ssotu bè Krays hol ndà ye yóm klaen dù bud gmoen bélê ye yóm óyô ye mò sidek. Ne yóm klowil ye mò hol gónón tendo megdóyón Dwata. ¹² Hol kenbê ye yóm salà anì là bud ye gemung bè yóm sidek knóyô lówó tau. ¹³ Hol béen wen bè yó kem nô bè lówó ye mit kuy mò sidek. Hol hogot ye ke Dwata yóm klowil ye, yakà deng lenwaen kuy gu lem hatay, ne deng blayen kuy yóm klowil lomi, anì hol gmò ye yóm tedeng gónón megdóyón Dwata. ¹⁴ Yake bê ye bud galak du ne yóm óyô mò sidek, abay se là bud tekuy galak bè yóm hlau gnan, okóm deng tekuy gnô lem yóm kun tóbóng Dwata. ¹⁵ Déke wen mon du, “Hyu ne ni, là bud tekuy gfét du ne yóm tehe hlau gnan. Anien ke senflós tekuy mò salà abay se wen Dwata fen gel tmóbóng.” Tey sekban ke lómón yó kehedem ye. ¹⁶ Tódô tngón ye se ke tedu yóm gel nélék ye mò lolò ye deng yó se gónó ye gemong. Ke mò salà se yóm nmò ye, bè salà se gónó ye gemong ne yó nefeten yóm yó hatay. Okóm ke tendo nimón ye Dwata, yó se gónón tedeng ktonen kuy. ¹⁷ Tehe ye gemong bè yóm óyô ye mò sidek, okóm ni gónóhu hol dmóyón ke Dwata abay se deng hol nô bè nawa ye mimón du yóm ktahuhen lemwót gu bè Dwata. ¹⁸ Ni deng ye gewà gu lemen yóm salà tehe gónó ye gemong. Ne deng ye gemong bè yóm kmò yóm tedeng. ¹⁹ Yó gónóhu hmingón du bè kegehesek nim toloku kuy ni anì mahil ketngón ye yom lanen. Tehe yu teganay, gemong ye bè yóm óyô ye mò sidek, abay se tódô bayà ye lówó ye mò du, ne sónmoen minut temnù yóm ksidek nmò ye. Okóm ni yake hol hogot ye ke Dwata yóm lówó ye anì gemong ye bè yóm tedeng, ne anì laen dù boolen yóm kmò ye. ²⁰ Bè yóm tehe kegen ye gemong bè yóm óyô ye mò sidek yó, balù udì ke wen nawa ye lemolò du yóm tedeng. ²¹ Tulón ye do kun, wen kô ofol ye du yó kem sidek tehe nmò ye gónó ye myak? Yó nefeten yóm nmò ye yó, duhen hatay. ²² Okóm ni, deng ye gewà bè yóm óyô mò sidek, baling ye gemong bè Dwata. Yó uléken, baling ye tedeng bè ktonen kuy, ne angat blayen kuy yóm klowil laen dù sónen. ²³ Yó bayad salà, hatay. Okóm wen yóm tódô blay Dwata, duhen yóm klowil laen dù sónen, hlanen bè yóm deng kessotu tekuy bè Krays Jisas, yóm gónó tekuy mogot.