¹ Yake hol hendem tekuy yóm tehe Abraham teganay, yóm tehe teme tekuy kem Ju. Tedu but gónón tedeng kton Dwata du? ² Ke lemwót bè yóm kmoen du yóm hyu, wen gónón hton salù. Okóm là gbeken du hton salù bè solu Dwata. ³ Wen monen bè sulat Dwata gbak ebè Abraham, yó monen, “Tódô hentahu Abraham yóm fasad Dwata du, ne yó se gónón baling tedeng kton Dwata du.” i ⁴ Ke wen tau mò nmò bè dumu tau, sal gel wen sukéyen. Ne yóm sukéyen yó, là kô nem e mon du basa le du, igo bayad litegen. ⁵ Okóm tólóng kun yóm tau hemtahu bè Dwata. Tódô hentahuhen yóm kegbek Dwata hmifót salà yó kem tau gemsalà. Lemwót bè yóm kehetahuhen, yó gónón tedeng kton Dwata du yóm tau yó. Là lemwóten bè yóm gel nmoen. ⁶ Ni se yóm tehe tulón Dabid tganay. Tulónen yóm tey keheyu nawa yóm tau là snaligen du yóm kun nmò mò gónón tedeng kton Dwata du, okóm tódô snaligen yóm deng nmò Dwata béléen. ⁷ Ni se yóm tehe udél Dabid, monen, “Tey keheyu nawan yóm tau ke deng hnifót Dwata béléen yóm salaen, ne ke deng tódô kóhen tahen. ⁸ Tey kehyu nawan yóm tau ke là bud snolò Dwata du béléen ne yó kem salaen.” j ⁹ Bè yóm kehyu nawa tulón Dabid yó, són ebè yó kem Ju deng tnulì kô gónón e gebak yóm udél yó? Là kô yó du. Bud gebak ebè yó kem tau là tnulì le snéen. Yó gónó tekuy temngón du nim ni, lemwót bè yóm Sulat Dwata deng tulónu kuy yó koni, yóm monen, “Tódô hentahu Abraham yóm fasad Dwata du, ne yó gónón baling tedeng kton Dwata du.” ¹⁰ Kilón de kmò Dwata du bè Abraham nim ni? Yó kemoen du, là deng blayen du he yóm hlau bè kehetulì yó. Deng sana tedeng ne kton Dwata ke Abraham. ¹¹ Deng gena ne yóm kehetahu Abraham ke Dwata ominen yó he hetulì. Hmò Dwata du yóm yó mò ilô yóm deng ktedeng ktonen du lemwót bè yóm deng kehtahu Abraham béléen. Ne duhen yó, lemwót bè yóm kehetahu Abraham ke Dwata, yó gónóhen baling mà kdéen tau hemtahu bè Dwata, baluen he ke là Ju le, ne baluen he ke là henlel le. Tódô lemwót bè kehtahu le gónón tedeng keton Dwata kul. ¹² Ne senged se yó kem Ju deng hemtahu bè Dwata, yó kem tau deng henlel, Abraham se mà le. Là lemwóten bè yóm klolò le yóm kehetulì Abraham, okóm lemwót bè yóm kedalang le yóm kehetahuhen gu laanen là deng henlel. ¹³ Tehe yu teganay, wen fasad Dwata ke Abraham ne bè yó kem semfu gu béléen. Yó fasaden kul, lu enget mogot yóm klamangen benwu. Là kóen melan bè kelolò Abraham du yóm hlau Musis gónó Dwata helan du béléen yóm fasad yó. Okóm melan bè yóm kehtahuhen ke Dwata. Són yó se gónón tedeng keton Dwata du, són bè yóm kehtahuhen. ¹⁴ Ke són yó kem tau lemolò yó kem hlau Musis enget gemuta yóm fasad Dwata yó, ilóem laen kô dù muhen yóm kehtahu tekuy, dalang se yóm tehe fasad Dwata tekuy. ¹⁵ Lemwót bè yóm kewen hlau gónón wen tafak gu bè Dwata abay se là glolò tau du. Ke laen dù hlau laen se dù tau gemsalà. ¹⁶ Yó gónóm mon, tek sotu gónó tekuy gemuta du yóm fasad Dwata tekuy, són bè kehetahu tekuy béléen. Yóm fasad Dwata yó, tódô basahen yóm kdéen tau semfu gu bè Abraham. Là són du yó kem tau gel lemolò yóm hlau Musis, okóm gotu gomong snéen yó kem tau hemtahu lómón yóm tehe kun kehetahu Abraham. Abay se yóm Abraham, hol mà kdéen tau hemtahu bè Dwata. ¹⁷ Deng hesulat Dwata yóm tehe udélen ebè Abraham teganay, yóm monen, “Deng nemou uu mà yó kem tey dê kay but tau bè klamangen benwu.” k Ne tahu se yó. Bè keton Dwata yóm kdéen tau hemtahu béléen, deng le gotu menmà bè Abraham ne. Nim Dwata gónó Abraham hemtahu ni, balù yóm tau deng matay, gbeken bud hlowil du. Balù kihu dlimunen, gebeken. ¹⁸ Bè Abraham kun, balù yóm là keglileben du yóm kehelan Dwata du béléen yóm fasaden yó, tódô hentahuhen, ne henlelen hemdón du yóm kdohoen ebéléen. Yó gónóm mon, du se baling “mà yó kem tey klasehen but tau bè klamangen benwu.” Hol lómón yóm monen bè Sulat Dwata, yó monen, “Enget dê semfu gu béléem, hol lómó kewen le blotik bè longit.” l ¹⁹ Bè yóm kdaw kfasad Dwata ke Abraham yó, móyónen gefet bè lematu ne halay Abraham, ne tódô tngónen là buden mengà. Lelen atil he Sara, yóm tuha libunen. Ewenem là kóen monol yóm kehtahuhen du yóm fasad Dwata du bè yóm enget kwen ngaen. ²⁰ Tódô henlelen hemtahu du, ne là kóen megewu nawan du snéen. Sónmoen minut temnù yóm kehtahuhen, ne tódô senfelósen dmóyón ke Dwata. ²¹ Tey ken-gel nawan yóm kegbek Dwata demohò du yóm fasaden béléen. ²² Lemwót bè yóm kehtahuhen, “yó gónón tedeng keton Dwata du.” ²³ Bè yóm tehe kehesulat Dwata du yóm yó, là olon hemdem ke Abraham, ²⁴ okóm mò gónó tekuy demalang se. Yó gónón tedeng keton Dwata tekuy ke deng tekuy hemtahu béléen. Du se fen deng helowil ke Jisas gu lem hatay yóm gónó tekuy mogot. ²⁵ Deng fen tódô hamà Dwata Jisas mò matay bè salà tekuy, okóm deng bud hlowilen gu lem hatay. Yó se yóm deng nmò Dwata mò gónón tedeng ktonen tekuy.