¹ Déke wen bélê ye hemdem du, laen dù muhen yóm ktau tekuy Ju ne yóm ktau tekuy tnulì. Là kô yó du. ² Igoen tey bong muhen yóm ktau tekuy Ju. Yó hol tanayen, tekuy se fon gónó Dwata hogot du yóm kun sulat. ³ Anien he ke wen bélê tekuy là mimón du yóm sulat yó, okóm ke Dwata, là kô tenlesen du yóm deng tehe fasaden tekuy. ⁴ Baluen he ke kdéen tau lem benwu gotu mò kéng, là kun ke Dwata, hono tahu yóm kun gel mon. Lómón ni se yóm sotu monen bè sulat Dwata, yóm monen, “Bè kudélem, Dwata, hol gónón gfan yóm ktedengem. Baluen ke wen tô lunon le kóm, yake uu matù bélê le.” c ⁵ Okóm ke mem yó udél yó kem dumu tau, ke mon le là sideken kun ke mò salà yóm tau anì gdilô yóm kun ktedeng Dwata. Yó gónóm mon, là hyuhen kun ke tnafak Dwata yóm tau mò sidek. (Déke wen se mon du nim ni.) ⁶ Tey sekeban yóm mon le yó. Ke là tmafaken yóm Dwata, là kóen tedeng yóm kun kmò. Ne ke là tedengen, là se kô gbeken kmukum yóm kdéen tau talak tonok.  Okóm ke mem yó bud udél yó kem dumu tau, ke mon le là sideken kun ke mò tekuy kéng anì gdilô yóm klaen dù kéng Dwata, ne bud bè yó se kun gónón megdóyón Dwata. Yó gónóm mon, là hyuhen kun ke tnafak Dwata tekuy ke mò tekuy kéng. ⁷ a ⁸ Hyu kun ke tódô henlós tekuy ne mò sidek anì hol megdóyón Dwata. Tey sekban yóm mon le yó. Deng wen se kem tau dmelem do lómón yó kun gel toloku. Yó kem tau mon du yóm yó, tey hyu ke hol tnafak Dwata lu. ⁹ Duhen yó, tekuy kem tau Ju, lemwa tekuy kô senta yó kem tau là Ju le? Là kô yó du. Deng tulónu kuy se koni, tódô kdéen tau gotu gemsalà, tau Ju duhen tau là Ju le. ¹⁰ Lómón yóm deng monen bè Sulat Dwata, monen, “Laen kô dù tau tódô tedeng kmoen, balù sotu. ¹¹ Laen kô dù tau ke hol hulung hedem, duhen ke hol móyô tmaba ebè Dwata. ¹² Deng gotu knogol le Dwata. Deng le gotu hetlas. Laen kô dù tau ke tedeng kmoen, balù sotu. d ¹³ Hono sidek yóm gel kebekó le, hol lómón ke boo bolok lemwót gu lem lebeng. Yóm gel kudél le hono kéng. Tey malas kudél le, lómón kalas yó kem ulal. e ¹⁴ Tey gel keles nawa le kem dumu le. f ¹⁵ Són nawa monok nô bélê le. ¹⁶ Nô gónó le e solu, tey wen gel hensidek le, ne wen gel hnayam le. ¹⁷ Là kô tngón le du yóm gónón menek nawa le. g ¹⁸ Ne laen kô klikò le ke Dwata.” h ¹⁹ Nim udél Dwata ni koni, deng tngón tekuy se yóm kegbaken ebélê tekuy kem Ju, kem tau gónó Dwata hemsù yóm hlauhen. Angat gotu hdaen bè soluhen yóm kdéen tau bè klamangen benwu. Yó gónóm mon, laen dù lan tekuy kembê du ke tnafak Dwata tekuy bè yóm kulé tekuy yóm kun hlau. ²⁰ Abay se laen dù tau tedeng kton Dwata du lemwót bè kloloen yóm hlau. Yó muhen yóm hlau mò hdilô du bè tau yóm kegsalaen. ²¹ Okóm ni ne, deng mtukul kehetngón Dwata du yóm lan nmoen mò gónón baling tedeng ktonen tekuy. Là kô hlanen du bè yóm klolò tekuy yóm hlau Musis. Okóm nim lan nmò Dwata ni, deng tehe eles hsulaten ke Musis ne yó kem dumu tau tugoden teganay. ²² Yó gónón baling tedeng kton Dwata tekuy, duhen yóm kehetahu tekuy ke Jisas Krays. Tu se nmò Dwata bè kdéen tau hemtahu bè Krays, laen kô dù mtukul néléken. ²³ Tódô kdéen tau gotu gemsalà bè Dwata. Yó gónóhen laen dù tau semkel du yóm tey kun kinggel nawa. ²⁴ Okóm tódô lemwót bè yóm tey któbóng Dwata tekuy, yóm tóbóng là dog bnayad du, yó gónón tedeng ktonen tekuy hlanen bè Krays Jisas, yóm deng lemwà tekuy gu lem salà. ²⁵ Deng hógów Dwata Jisas mò ne e matay bè salà tekuy. Hamaen litóen anì wen lan Dwata hmifót salà tekuy ke deng tekuy hemtahu bè Jisas. Ni se nmò Dwata anì hegfanen bélê tekuy yóm tey kun ktedeng. Bè gnan kdaw, tódô henbala Dwata yóm salà tau, tódô hiusen. ²⁶ Okóm ni kmoen ni, là gbeken du ke là tnafaken du yóm salà. Yó gónóm mon, umuen Jisas fen megtafak. Bè yóm ktafaken salà, yó gónó Dwata hegfan du yóm tey ketedengen. Ne yóm tau hemtahu bè Jisas, baling tedeng kton Dwata du yóm tau yó. ²⁷ Yó gónóm mon, laen bang gónó tekuy heton salù. Abay se là kóen lemwót bè klolò tekuy yóm hlau Musis gónón tedeng kton Dwata tekuy, okóm tódô lemwót bè yóm kehetahu tekuy ke Jisas. ²⁸ Bud nulitu yóm monu yó koni, són yó gónón baling tedeng kton Dwata tekuy ke hemtahu tekuy bè Jisas. Là kóen lemwót bè klolò tekuy yóm hlau. ²⁹ Déke wen mon du, són kem tau Ju nogot Dwata, fen là yó kem tau là Ju le. Là kô yó du. ³⁰ Tek sotu se yóm Dwata. Ne tek sotu gónón tedeng kton Dwata yóm kdéen tau, són bè yóm kehtahu tekuy bè Jisas, tau Ju duhen ke tau là Ju le. ³¹ Déke bud wen tau mon du, “Ke mlan bè kehtahu tekuy ke Jisas, laen dù bud muhen ne yóm klolò tekuy yó kem hlau Musis.” Là kô yó du. Mem temnu milud he klolò tekuy du yóm hlau lemwót bè yóm deng kehtahu tekuy ke Jisas.