¹ Béem tódô gel tendok kun kmò kem dumum. Laen dù lasunem mò du, balù sentnga se yóm kóm ktau. Ke wen tendokem bè dumum, ne ke bud gel nmoem se kóm, ten-geedem tmuled knóem. ² Tódô tngón tekuy se lemwót bè yóm ktedeng Dwata gónón tmafak yóm tau mò du yó kem sidek monu yó koni. ³ Yó kô hendemem, tnafak Dwata yó kem tau gel mò du yó kem sidek yó koni, ne là dog tnafaken kóm bè yóm kóm kmò du snéen? ⁴ Déke yó hendemem là kô tnafaken elo, abay se tey hyu nawa Dwata, là lakoen tmakas, ne tey manay nawahen. Là kô yó du. Igò yó gónó Dwata hemyu kmoen ebéléem anì wen lanen mit kóm hegsel. ⁵ Okóm balù udì ke lako i hegsel, deng mom hgelem kuluhem. Yóm nmoem yó, deng mom eles hlinokem yóm gónó Dwata angat tmafak kóm bè yóm kdaw kehegfanen yóm kukum tedeng nogoten, ne yóm tey kebuten yó kem sidek gel nmò tau. ⁶ Bè yóm kdaw yó, angat tódô blay Dwata bè kem tau balà yóm tehe kun gel nmò. ⁷ Klowil laen dù sónen angat blayen bè yó kem tau tódô henlel le mò du yóm hyu lemwót bè hol ketngon le yóm kdóyón Dwata kul ne yóm kadaten kul, ne yóm keblayen kul yóm klowil la bud le katay le du. ⁸ Okóm yó kem tau són ktes le kul knóyô, kenbê le yóm hyu ne són nmò le yóm sidek, angat hotu Dwata eta le yóm tey sidek keheloboen kul. ⁹ Angat tey tendo keglayam le yó kem tau gel mò sidek, lenwóten bè yó kem Ju kkólen bè yó kem tau là Ju le. ¹⁰ Okóm kul yó kem tau mò du yóm hyu, angat tey kdóyón Dwata kul, ne tey kadaten kul, ne heneken nawa le, lenwóten bè yó kem Ju kkólen bè yó kem tau là Ju le. ¹¹ Abay se yóm Dwata, laen kô dù mtukul nofinen bè yóm kkukumen tau. ¹² Bè yóm angat kkukum Dwata kem tau, angat tnafak Dwata yó kem tau là Ju le ke gemsalà le balù yóm là knóen bélê le yóm hlau deng hsulaten. Ne bud angat tnafak Dwata snéen yó kem Ju ke gemsalà le abay se bélê le gónón nô yóm hlau Musis. ¹³ Là kô bè ketngón tau du yóm hlau gónón tedeng kton Dwata kul, okóm bè kimón le du gónón tedeng ktonen kul. ¹⁴ Balù yóm là knóen bè yó kem tau là Ju le yóm hlau Dwata, ewenem sana kul klolò du lemwót bè yóm kdilô le du lem hendem le yóm hyu lemolò du skil bè yóm hlau. ¹⁵ Tódô dilô bélê le deng eles nô lem hendem le yóm deng monen bè hlau Musis. Lemwót bè yóm kehedem le du, tódô gnóm le ke hyu yóm nmò le duhen ke sidek. ¹⁶ Duhen yó, ni se kmoen bè yóm kdaw angat kehkukum Dwata ke Jisas Krays yóm kdéen tau. Angat knukumen yó kem deng tehe nmò le, balù yó kem gebnos. Ni se hol nô lem yóm Tulón Hyu gel nwitu. ¹⁷ Bélê ye kuy, kem dumuhu Ju, tey ksalig ye du yóm hlau Dwata, ne gel ye heklabak lemwót bè yóm ketngón ye ke Dwata. ¹⁸ Tahu se deng hónô tngón ye yóm kun kóyô Dwata bè tau. Deng dilô ye se yóm hyu ne yóm sidek lemwót bè yóm dnalang ye bè kun hlau. ¹⁹ Bè kuy kehedem du, yu fen malak yó kem tau butô ne yu henged layag yó kem tau tolo nô lem gónón kmifu, ²⁰ ne hulung ye tmolok yó kem tau là hulungen hedem, ne yó kem tau laen dù tngónen, abay se nô bélê ye yóm hlau Dwata, yóm hol gónón lemwót yóm ketngón tau ne yóm ktahuhen lemwót bè Dwata. ²¹ emwót yóm ketngón tau ne yóm ktahuhen lemwót bè Dwata. ²² Ke yu se yó kem tau gel tmolok kem dumu tau, moen de ke là tolok ye du yóm kuy knô? Gel mon ye, “Bê ye abay mnagaw” igò sem yu yóm gel mnagaw. 22 Gel mon ye, “Bê ye ndà yehen ye” igò sem yu mdà yehen. Tey kenbe ye yóm dwata kéng lenbù nmò le. Ke kebe ye, moen se ke deng ye mom mnagaw kimu lem yó dum gónô gónó le hemsù kul? ²³ Tey gel keheklabak ye bè yóm hlau Dwata deng tngón ye. Okóm mò ye là dog mimón du du? Bè yóm là kimón ye du, yó gónó ye hemne ke Dwata. ²⁴ Wen tehe hsulat Dwata teganay, yó monen, “Tey sidek kehnê le ke Dwata yó kem tau là Ju le, abay se lemwót bélê ye.” ²⁵ Bélê tekuy kem Ju, wen yóm hlau bè kehtulì. Són gónón wen muhen ke nimón tekuy yóm hlau Dwata. Bede ke là nimón tekuy du yóm hlau Dwata laen kô gónó tekuy mkel be yó kem tau là Ju le duhen yó kem tau là tnulì. ²⁶ Baluen ke là Juhen yóm tau, okóm ke nimónen yóm hlau Dwata, nofin Dwata ne blayen du yóm kwalis baling hol kun tau yóm tau yó. ²⁷ Lemwót bè yóm fen kimón le yóm hlau Dwata yó kem tau là Ju le anien he ke là tnulì le, yó se gónó le angat lonole kuy yu kem tau Ju bè yóm kulé ye yóm hlau deng snulat ye, igoen yu se yó kem tau deng nfun Dwata. ²⁸ Bè ktahuhen, yóm hol tahu tau Ju là lemwóten bè yóm deng kehtulien ne là yó du lewót gónó Dwata smakof du. ²⁹ Yóm hol tahu tau Ju, duhen yóm tau hol nô bè nawahen yóm kimónen ke Dwata. Là lemwóten bè yóm kwen kenleng bè lówó, bede lemwót bè yóm keteles kehedemen mlan bè Tulus Dwata. Yóm tau lómón ni keteles hendemen, hnebelen yóm kdóyón Dwata du, là hnebelen du yóm kdóyón kem dumu tau du.