¹ Deng homong Dwata tekuy ne bè yóm tehe kehlowilen ke Krays gu lem hatay. Yó gónóm mon, yake hol hendem tekuy dé yó kem gel nô bè longit. Bè yó se hol gónóhen nô Krays, deng myón fi bè kwanan Dwata. ² Yake bè yó dé hol gónóhen nô nawa tekuy, là bè yó du kem kdéen ton te tonok. ³ Abay se hol lómón ke deng tekuy gomong matay bè yóm tehe katay Krays, ne wen lomi klowil tekuy là dengen gfan he nô ditu bè Krays, bè hol gónóhen nô Dwata. ⁴ Yóm lomi klowil tekuy yó, lemwót bè Krays. Ke bud semfulék edini, angat tekuy gmung béléen bè yóm alì kegetahen bè yóm kdaw yó. ⁵ Yó gónóm mon, gotu kó ye ne yóm kdéen sidek knóyô lówó ye. Béen abay wen bélê ye mò samuk, ne yó kem dumu nmò gónó hemyak knô. Hol kenbê ye yóm knawa mò du yó kem yó. Kó ye snéen yóm nawa seglom, abay se yóm gel sen‑glom ye yó, deng duhen yó se dwata ye. ⁶ Lemwót bè ni kem nmò sidek ni gónó Dwata tmafak yó kem tau mò du. ⁷ Tehe gel nmò ye snéen kuy ni kem ni yóm kegen ye là deng hemtahu. ⁸ Okóm ni, gotu kó tekuy kdéen sidek. Kó tekuy ne yóm kesefebut ne yóm ksunget ne yóm ksutó nawa. Hol bê tekuy abay hebtang bè sumóng te yóm udél semdekà, ne yóm udél là mólósen. ⁹ Bê tekuy abay gel mò kéng, yakà deng kó tekuy tum tehe gna klowil mahil mò sidek. ¹⁰ Deng wen ne yóm lomi klowil tekuy lemwót bè Dwata. Ne yó nmò Dwata, tódô senflósen hembaling du nim lomi klowil tekuy ni efet te baling hol skél bè kun kmò, anì hol tilob kesetngón tekuy ebéléen. ¹¹ Yó nefeten nim lomi klowil ni, laen dù bud gónón stólóng ne yóm tau Ju ne yóm tau là Juhen, yóm tau tnulì ne yóm tau là tnulien, yóm tau tólóng udélen, ne yóm tau laen dù tngónen, yóm tau klifen ne yóm tau là klifenen, abay se Krays yóm alì bong muhen bè kdéen, ne du se tendo nô bélê tekuy. ¹² Yu se yó kem tau Dwata, kem tau kenbong nawahen, kem tau deng néléken mò kun nfun. Duhen yó, hol dnalang ye yóm nawa skodu ne yóm nawa sbasa, ne yóm keheglaan ye bè kem dumu ye. Ne hol dnalang ye snéen yóm kganag nawa ne yóm khanay nawa. ¹³ Yake hol ye sadat dé, ne hol ye seflifót ke wen gónó ye seglius. Lómón yóm deng kehlifót yóm gónó tekuy mogot yóm kut salà, hol lómón yó se kmò keseflifót tekuy. ¹⁴ Ne yó hol tnù ye du yóm kdê deng monu yó koni, duhen yóm kesbong nawa. Lemwót bè yóm kesbong nawa ye gónó ye baling hol ssotu. ¹⁵ Wen yóm kenek nawa deng blay Krays. Nim kenek nawa ni mò gónó tekuy milô du yóm kun kóyô bélê tekuy Dwata. Yakà ni du gónón tmaba kut anì wen kenek nawa tekuy yóm kdê tekuy mò lówóhen. Ne hol gel dóyón tekuy dé Dwata. ¹⁶ Hol sù ye bè nawa ye yóm tey hyu gel dnalang ye gbak ebè Krays. Hol ye gel stolok ne seflau lemwót bè yóm khulung ye hedem. Ne gel sngal ye dé yó kem lingón nô bè bok Lingón, dalang se yó kem dumu sngal Dwata. Semngal ye ebè Dwata, hol hmung ye du snéen yóm alì kdóyón ye du. ¹⁷ Duhen yó, bè ket nmò ye duhen ket benkó ye, hol na ye na hlan bè boluy yóm gónó tekuy mogot Jisas. Bud béléen snéen gónó ye hlan du yóm kdóyón ye ke Dwata yóm Mà tekuy. ¹⁸ Yu kem libun deng myehen, hol ye gel heglaan bè kem kuy tuha logi, yakà yó du yóm hol knóón bè yóm libun deng hemtahu. ¹⁹ Ne yu kem logi deng myehen, hol kenbong nawa ye yó kem kuy tuha libun, ne bê ye abay hkosut knawa ye ebélê le. ²⁰ Ne yu kem ngà, lemwót bè yóm deng kehtahu ye, hol gel nimón ye kem tuha ye anì hyu nawa Dwata ebélê ye. ²¹ Ne yu kem tuha, bê ye abay nmò gónó le meklit kem ngà ye, kô hlós sidek nawa le. ²² Ne yu kem tau klifen, hol gel nimón ye yó kem tau mfun kuy. Bê ye olo hton du ta ke wen nmò ye mò tô gónó le dmóyón kuy. Yake hol hewót ye lem but blutut ye yóm gel nmò ye lemwót bè yóm kadat ye du yóm gónó tekuy mogot. ²³ Balù kihu nmò ye, hol hotu ye nawa ye mò du, hol lómón ke bè gónó tekuy mogot yóm gónó ye mò du, là bè tau du. ²⁴ Bê ye abay klifót, angat wen blayen kuy yóm gónó tekuy mogot mò ofol ye lemwót bè yó kem deng hentifesen bè yó kem kun tau. Yakà Krays du yóm hol kuy gónó mogot yóm gónó ye mò nmò. ²⁵ Okóm yóm tau mò sidek, bud sidek snéen balaen, abay se yóm Dwata laen kô mtukul tau knihuhen.