¹ Ne yu kem tau wen klifenen, hol nmò ye yóm hyu ne yóm tedeng bè yó kem klifen ye. Bê ye klifót wen se yóm kuy gónó mogot bè longit. ² Bê ye htakas mni bè Dwata, ne bê ye se abay tódô gel hlingay. Hol hmung ye yóm gel kdóyón ye du. ³ Ne hol gel utóm ye mi snéen bè yóm gel kni ye anì wen lan nmò Dwata mò gónó me hetngón du bè yó kem dumu tau yóm tehe bunihen bélê le, duhen Krays. Yakà ni du buten yóm gónó le bmanggù do. ⁴ Hol gel hni ye do bè Dwata dé anì hulunge hegtukul du bè kem tau yóm toloku. ⁵ Hol ye hfulung mò du yóm hyu bè yó kem tau là dengen hemtahu. Eles tnana ye ke wen lan ye mò du. ⁶ Hol gel hninggel ye kmò kestulón ye bélê le anì wen gónó le beyen hmungol kuy. Hol tekuy hfulung malà kul ke wen snólók le. ⁷ Yóm dou kmò dini, gotu tulón Tikikus kuy he, yóm sotu dumu tekuy sogot nawa, ne là kóen mili nawahen tmóbóng do. Du se sotu tóbóng lówó yóm gónó tekuy mogot. ⁸ Yó gónóhu hógów du edyó ebélê ye anì wen gónón gemduf kuy ke deng tngón ye yóm kum kmò dini. ⁹ Hmungu du edyó Unisimus snéen, sotu dumu tekuy setwoli, tehe lemwót dyó se kun. Tey sogot nawa me nim tau ni, là kô wen ktakasen tmóbóng do. Tulón le kuy he yóm mò kmoen dini bélê me. ¹⁰ Tey gel kólóm Aristarkus kuy se kun, yóm dumuhu geblanggù bè ni. Dalang se ke Mark, yóm dumuhen setwoli Barnabas, tey gel kólómen kuy se kun. Kesok sut dyó bélê ye, hol hnódó ye, lómón se yóm tehe tulónu kuy. ¹¹ Senged se ke Juswa yóm gel bnoluy le Justus, tey kólómen kuy se kun. Bè kdê yó kem Ju deng hemtahu, tek són nim tlu le ni gel tmóbóng do hból du yóm kun kogot Dwata, ne tey bong yóm gel któbóng le do. ¹² Tey gel kólóm Ipafras kuy snéen kun sotu tau lemwót dyó bélê ye, yóm sotu tóbóng lówó Krays Jisas. Tey gel knihen bélê ye bè Dwata anì hol hbegelen yóm kehtahu ye, ne anì hol gtukul ye yóm kun kóyô bélê ye Dwata ne anì hol gulit klolò ye du. ¹³ Ou se gemtanud du yóm tey kehedemen kuy, dalang se yó kem tau hemtahu bè Ludisya ne bè Hirapulis tey kehedemen kul se kun. ¹⁴ Bud Luk snéen, yóm duktur dumu me sogot nawa, ne Dimas, tey gel kólóm le kuy. ¹⁵ Hol hgefet ye do ebè yó kem tau hemtahu bè Ludisya, dalang se ebè yó kem tau gel stifun tmaba Dwata bè gónô Nimfa yóm tey kólóm me kul. ¹⁶ Sok deng kesfala ye du se kuy nim sulat hwitu ebélê ye ni, bud heflós ye do ebè yó kem dumu tekuy hemtahu bè Ludisya anì senfala le se kul. Dalang se yóm sulat hwitu ebélê le, hol senfala ye se kuy. ¹⁷ Ne tulón ye do ke Arkipus, mon ye mò du, “Hol hendengem yóm deng sigangen tahem yóm gónó tekuy mogot.” ¹⁸ Dou lan tdok smulat du nim mò sónen ni: Ou se Pol. Tey kólómu kuy. Bê ye klifót yóm tolo kegfétu. Yó hem Dwata hol tmóbóng kuy.