¹ Kóyóu ke hol tngón ye yóm tey khotuhu gelu bélê ye, dalang se bè yó kem tau bè Ludisya, ne yó kem dumu tau là deng tngón le do he. ² Yó gónów mò du anì wen lanu temgel nawa ye, ne anì wen kessotu nawa ye lemwót bè yóm kesbong nawa ye. Kóyóu ke hol mbegel kehtahu ye lemwót bè yóm deng ketngón ye du yóm ktahuhen. Ke lómón ni se kmoen, tngón ye yóm tehe buni Dwata bè yó kem tau gnan, duhen Krays. ³ Du se henged kunsì mò lemungkà du yóm tey hyu deng fan Dwata tekuy lemwót bè yóm tey khulungen hedem ne yóm tey ketngónen. ⁴ Yó gónóhu mon du mò kuy nim ni koni anì duhe kóm, là gtondo ye bè yó kem tau alì hulung mudél, okóm kéng yóm gel tulón le. ⁵ Balù nim keslayuk tekuy ni, kaem tey tendo kehedemu kuy. Tey kehligalu yóm kungolu du yóm kesetgel ye mfi du yóm kehtahu ye bè Krays. ⁶ Deng henmóyô ye ne Krays Jisas mò gónó ye mogot. Yó gónóm mon, hol nmò ye dé yóm nmò seklóón bè yóm deng kessotu ye béléen. ⁷ Henlel ye dé hdolil béléen, bê ye abay skó du anì baling mbegel yóm kehtahu ye lómón yóm tehe tolok le kuy. Ne tódô senflós ye dmóyón ke Dwata. ⁸ Duhen ni, hol ten‑gama ye anì là gfét ye bè yóm tolok lemwót bè ketngón tau te tonok, yóm laen dù lemen. Yóm kul ktolok yó, dnalang le bè tau, yóm gel hentahu yó kem tau gnan, ne dnalang le bè yó kem tulus sidek nô bè klamangen benwu. Là kóen lemwót bè Krays. ⁹ Bè yóm tehe kbalingen tau Krays, nô béléen yóm hol kun kmò Dwata. ¹⁰ e bélê ye se kuy, lemwót bè yóm deng kessotu ye bè Krays gónó ye gbót ne bè yóm klowilen yó. Du se hol geta senta yó kem kdéen mtulus deng wen nogot le te tonok ne wen kwalis le. ¹¹ Bè yóm deng kessotu ye bè Krays, deng wen ilô nmoen bélê ye. Sundu bè kehtulì du, okóm yóm ilô nmò Krays, duhen yóm là bud kegfét ye du ne yóm óyô ye mò sidek. ¹² Abay se bè tum tehe kehbabtays ye, lómón ke deng ye mung ke Krays bè yóm tehe kebeng le du. Ne bud bè tum tehe kehbabtays ye, lómón ke deng ye mung béléen snéen bè yóm tehe bud klowilen lemwót bè yóm kehtahu ye du yóm tey kegbek Dwata bè yóm tehe kehlowilen ke Krays gu lem hatay. ¹³ Tehe yu ekni, deng ye golu elem hatay lemwót bè yóm kegsalà ye, ne bud lemwót bè yóm là deng kkó ye du yóm óyô ye mò sidek. Okóm ni, deng hlowil Dwata yu, gomong ye bè yóm tehe kehlowilen ke Krays gu em hatay. Ne gotu hnifóten yó kem kdê salà tekuy. ¹⁴ Gotu kóhen ne yóm gónóhen smulat yó kem salà tekuy. Bè yóm kkóhen du, hol lómón ke tehe gomong htutuken bè kros. ¹⁵ Ne bud bè tum tehe katay Krays bè kros, yó se gónón mkó du bè Seitan yóm kun kfasang, ne yóm kul kfasang yó kem dumu mtulus deng genlal Seitan. Gotu hegfanen bè gónón wen yóm deng katuen bélê le. ¹⁶ Duhen yó, hol bê ye abay hnungol ke dê hlii le kuy bè ken ne bè ninum, ne ke dê hlolò le kuy bè yó kem dumu kdaw, ne bè ksut yóm lomi bulón, ne bè yóm Kdaw Kehegnô. ¹⁷ Ni kem dê tô hlolò le kuy ni, olo olung yóm tahu duhen sut hulihen kdaw, duhen Krays. ¹⁸ Hol bê ye abay hnungol yó kem tau hegeta le knô le bélê ye, lemwót bè yó kem tódô gel hegfan bélê le kun. Lu se yó kem tau alì dmuil hlolò du kuy yóm keheglaan knô là tahuhen lan le gel tmaba ebè yó kem hógów Dwata nô bè longit. Yó kem tau yó, olo le beyen hegmón laen dù lem. Tódô lemwót bè kehedem tau te tonok yóm nmò le yó. ¹⁹ Là kô le mogot bè Krays, igoen du yóm hol kulu yóm kdê tekuy deng mò henged lówóhen. Lemwót bè yóm kalaken tekuy, gónóhen tilob kesgayun te, ne baling tekuy gulit, lan te lemolò yóm kun kóyô Dwata. ²⁰ Hol lómón ke deng tekuy gomong matay bè Krays, là bud te gfét du yóm dê hlolò le yó. Ke ni se kmoen, moen de ke segmung ye bè kul kmò yó kem tau te tonok? Moen de ke tô lolò ye yóm gel mon le, ²¹ “Béem nogot nii. Béem ken yóó. Béem ndù tuu.” ²² Yóm kdéen yó, tódô lenbù hlolò tau, tódô lenbù tolok tau, laen kô gónó le e kól. ²³ Bè yóm gel ktaba le yó kem hógów Dwata nô bè longit mò lan le heglaan knô kun, ne yóm gel kehlayam le lówó le, hol lómón ke lemwót bè khulung hedem yóm nmò le yó. Là kô yó du. Yó kem hlolò le kuy yó, laen kô dù lanen tmóbóng tau mò mafas nawahen.