¹ Nim lówó tekuy ni, hol lómón ke selung. Ke deng bangen gbà nim selung ni, eles tengón tekuy se enget wen tahu gónó tles Dwata du ditu bè longit, yóm gónó kun nemò Dwata, yóm laen dù tul sónen. ² Yóm igò tekuy nô te tonok, sal gel blat nawa tekuy, abay se hol kóyô tekuy ke géhél guta tekuy yóm lomi gónô enget blay Dwata tekuy ditu bè longit. ³ Yó gónó tekuy hol hemkoso du yóm lomi gónô yó anì wen gónón helós nô yóm lóyóf tekuy kesok tekuy matay. ⁴ Bè yóm igò tekuy tolo nô du nim slung tekuy ni, tey gel sidek kegenóm tekuy du. Sundu mon dé ke móyô tekuy kendel matay anì géhél mekó bélê tekuy nim lówó tekuy ni. Okóm yó dé hol kóyô tekuy ke géhél guta tekuy yóm lomi klowil ditu bè longit. Kóyô tekuy ke géhél tenlesen yóm lówó là buden matay yóm lówó mahil matay ni. ⁵ Deng eles hetengón Dwata tekuy yóm angat ketelesen yóm lówó tekuy, ne deng blayen tekuy yóm Tulusen mò ilô yóm angat kedohò keguta tekuy du yóm kdê deng hentifesen bélê tekuy. ⁶ Ni se tendo gónón mgel nawa tekuy. Tengón tekuy se ke tolo tekuy nô bè nim sana lówó tekuy ni, là deng tekuy gefet du he yóm kun gónô nô yóm gónó tekuy mogot. ⁷ Bè nim klawi tekuy mowil te tonok ni, tódô henlel tekuy smalig du yóm gónó tekuy mogot, balù yóm là kton tekuy du. ⁸ Tey tendo gel kgel nawa me. Mom hyu dé ke géhél tebel me nim lówó me ni anì géhél me nô ditu bè kun gónô yóm gónó tekuy mogot. ⁹ Okóm yó hol sen-galu me ke tendo heyu nawahen ebélê me, kihu ke tolo me nô bè ni talak tonok, duhen ke deng me kól ditu béléen. ¹⁰ Yakà kdê tekuy du enget mdà bè solu Krays hulin kedaw anì kenukumen tekuy. Tódô ket tau enget gemuta du balà yóm tehe deng kun nemò te tonok, ke heyu duhen ke sidek. ¹¹ Ne lemwót bè yóm deng ketengón me du yóm enget kdà tekuy bè solu yóm gónó tekuy mogot, yó gónón wen klikò me du. Yó gónó me hotu du gel me mit kem tau anì baling le hemtahu. Gotu tengón Dwata yóm kum kmò, ne kóyóu ke gotu tengón ye senéen kuy. ¹² Sundu yó du gónóhu mon du yóm udélu yó koni ke udél heton dóyón. Okóm yó gónóhu mon du anì wen gónó ye hligal bélê me, ne anì wen mò balà ye kul yó kem tau gel hemnê kum. Yó kem tau yó, són salù le yóm ton le ta, là kô dog ne le heneg du yóm kmò knawa yóm tau. ¹³ Ge wen se bélê ye mon du kun, “Yake deng helós lengel mata le yóm le Pol.” Kunen dé, syan ke megdóyón Dwata bè yóm gel nemò me. Okóm bè ktahuhen, là kóen lengel mata me. Yó gónó me mò du nim nmò me ni mò lan me tmóbóng kuy. ¹⁴ Là kô gbek me du ke là nemò me du nim nmò me ni lemwót bè yóm kbong nawa Krays tekuy. Deng hol mtukul ketngón me du ne yóm deng katay yóm sotu tau mò leyu lówó yóm kdéen tau. Bè yóm tehe katayen, hol lómón ke deng tekuy gotu gomong matay béléen. ¹⁵ Du se matay bè kdéen tau anì yó, yóm kdê tekuy hanà tolo mowil, là kô bud lolò tekuy du ne yóm knóyô tekuy, són yóm kun knóyô Krays yóm lolò tekuy. Yakà bélê tekuy du gónón lemwót matay ne gónón bud mowil gu lem hatay. ¹⁶ Duhen yó, là bud hendeng me du ne kul kmò yó kem dumu tau. Balù yóm tehe kehdeng me du yóm kun kmò Krays ekni, okóm là ne ni du, là bud nmò me du. ¹⁷ Ke deng ssotu bè Krays yóm tau, baling lomi ne kehedemen. Kdê yó kem tehe gna kehedemen tódô gotu lana, ne hono lomi ne bud tlesen du. ¹⁸ Tódô Dwata se mò du yóm monu yó koni. Hlanen bè Krays yóm lan nmoen mò lan tekuy mit sefyu ebéléen. Ne deng sigangen ta tekuy se yóm mò fen tmulón du bè dumu tau yóm lan nmoen yó. ¹⁹ Yó gel tulón me, duhen yóm deng kehlan Dwata du bè Krays yóm lan nmoen ebè kdéen tau mò lan le mit sefyu ebéléen. Là bud snolò Dwata du bélê le ne yó kem tehe salà le. Ne bélê me kum, deng sigangen ta me nim tulón ni mò gónó le temngón du yóm lan le mit sefyu ebéléen. ²⁰ Ne duhen yó, mi se gel hógów Krays mò mit yóm kun tulón. Hol lómón ke Dwata fen mudél ebélê ye, okóm hlanen bélê me. Yó udél hwit Krays kum, monen, “Géhél ye mit sefyu ebè Dwata ne.” ²¹ Yóm Krays, laen kô bang salaen kun. Okóm lemwót bè yóm ketóbóng Dwata tekuy, yó gónón fen hbô du ke Krays yó kem salà tekuy. Lemwót bè yóm deng kessotu tekuy bè Krays, deng tekuy gomong ne bè yóm kun ktedeng Dwata.