¹ Duhen yó, lemwót bè yóm deng keseglomong me mò nemò bè Dwata se kum, yó gónó me mon du mò kuy, hol bê ye abay hningay yóm któbóng Dwata kuy. ² Hnungol ye yóm tehe mon Dwata, yóm monen, “Bè yóm deng kehto yóm buteng tehe fétu mò tmóbóng kuy, deng tódô gungolu se yóm taba ye do. Bè kehe to yóm butengu lemwà kuy, deng tódô tnóbóngu yu.” b Ngem, deng duhen ni se yóm kdaw tô któbóng Dwata kuy. Ne deng duhen ni se yóm kdawen tô lemwà kuy. ³ Bè yóm kwit me du yóm Udél Dwata, hol sen-galu me ke laen dù gónó le gemsanil kum bè yóm kwit me du, ne ke laen kô dù nmò me mò gónó le gseng yó kem tau. ⁴ Hol kóyô me ke dilô le bè kekdol me yóm ktau me tóbóng lówó Dwata. Yó gónó me tódô hol hembala du ke wen gónó me glayam, duhen ke wen yóm mgel sut bélê me, duhen ke wen gbunù me. ⁵ Ngem deng glan me ne yóm gel kfes le kum, ne yóm gel keblanggù le kum, ne yóm gel kesegluk le hemsidek kum. Ne deng gnóm me snéen yóm alì sidek gel kliteg me, ne yóm là hol kegtungô me, ne yóm gel kbitil me. ⁶ Sotu bud hemblat du yóm ktau me tóbóng lówó Dwata, duhen yóm klaen dù bolen sidek yóm gel kmò me, ne yóm deng hol ketngón me du yóm gel tolok me, ne yóm kanay nawa me bè yó kem tau, ne yóm kganag nawa me ebélê le. Sotu bud hol hemblat du, duhen yóm kbeyenen bélê me yóm Tulus Dwata, ne yóm tahu kbong nawa me kuy. ⁷ Ne sotuhen, duhen yóm gel ktolok me du yóm hol ktahuhen, ne yóm gel kehegfan Dwata bélê ye yóm kun kfasang. Yóm ktedeng nawa me, yó se henged tók eles tendo kulóng sigel kwanan me, ne lómón ke klung eles tendo nogot me sigel iwóng. ⁸ Wen se gel madat kum, ne bud wen se gel hemgnok kum. Wen se gel hemnê kum, ne bud wen se gel dmóyón kum. Wen se gel hemkéng kum, ewenem, hono tódô tahu yóm gel tulón me. ⁹ Laen kô dù boluy me bè kem dumu tau, okóm bong me tótól bè kem dumu. Ne udì duen gónó me là gel matay, okóm ton ye se, ni mi, tolo me mowil. Ge wen se tau hemsidek kum, bede là se henlós henatay le kum. ¹⁰ Baluen ke wen gónón gel blat nawa me, sal gel wen gónó me hligal snéen. Tey me élél se kum, okóm lemwót bè yóm ktolok me tey dê tau gemwa du yóm kendengen laen dù tul sónen. Laen dù kwa me se kum, okóm tódô gotu gfun me kdéen. ¹¹ Yu kem dumu me sogot nawa bè Kurin, laen kô deng nemo me gebnos me bélê ye. Tey bong yóm kum nawa kuy. ¹² Là kô knogol nawa me kuy, mom yu ne kmogol nawa kum. ¹³ Tey hyu dé ke kenbong nawa ye mi se kum mò balà yóm kum nawa kuy. Yó gónón lómón ni kudélu ebélê ye, abay se lómón ke hol ngau yu. ¹⁴ Hol bê ye abay mit sbilà bè yó kem tau là hemtahuhen, là kóen na a heyu. Abay se là kô le segemung yóm tedeng ne yóm sigol. Dalang se yóm layag ne yóm kifu, là kô le setenù. ¹⁵ Senged se ke Krays ne Seitan, là kóen sesotu kehedem le. Dalang se yóm tau hemtahu ne yóm tau là hemtahuhen, laen kô gónón sesotu kehedem le. ¹⁶ Ne sotuhen, laen kô dù gónó le segmung yóm kun gónô Dwata ne yó kem dwata kéng. Enget tekuy se yóm kun gónô gónóhen nô yóm Dwata laen dù tul katayen. Hol lómón yóm tehe mon Dwata teganay, yóm monen, “Angate tendo nô bélê le yó kem dou tau, ne hol lem blóng le gónóhu nô. Ne ou se baling hol kul Dwata, ne lu se baling hol dou tau.” c ¹⁷ Duhen yó, bud mon yóm gónó tekuy mogot, “Hol ye hlayuk bè yó kem hemtahu bè dwata kéng. Htólóng ye yóm kuy klan. Hol bê ye abay bud nmò yóm là heyuhen. Ke ni se nmò ye, angat henmóyóu yu. d ¹⁸ Ou se baling Mà ye, ne yu baling kem dou ngà. Ni se udél yóm gónó tekuy mogot yóm laen dù là gbeken du.” e