¹ Lemwót bè yóm tey kodu Dwata kum, yó gónón smigang du ta me yóm hmoen kum ni, ne yó gónó me là tmakas mò du. ² Tey kenbê me kum yó kem nmò sidek gel bnos tau, ne yó kem dumu nmò gónó le gel hemyak knô. Là kô gel nmò me du se kum yóm gel temondo. Bè yóm gel ktolok me udél Dwata, là kô tódô lenbù me du, sal gel tulón me yóm ketahuhen. Ne tódô tngón Dwata se ktahuhen nim monu ni, ne dilô kem dumu tau snéen yóm klaen dù lafinen yóm gel nmò me. ³ Bè nim Tulón Heyu gel nit me ni, són olo gónón là metukul, tek són bè yó kem tau tolo golu elem hatay. ⁴ Là hentahu le du abay se neseng Seitan kehedem le. Du se kul dwata yó kem tau là hemtahuhen. Yó gónó Seitan meseng kehedem le anì là dilô le du yóm tey layag hmilol kul, yóm layag lemwót bè yóm Tulón Heyu gebak ebè yóm tey klinggel Krays. Bè Krays se hol gónó tekuy dmilô du yóm kun kmò Dwata. ⁵ Sundu kum boluy du yóm gel tulón me bè yó kem tau, okóm Jisas Krays yóm gel tulón me. Du se yóm gónó mogot mogot yóm klamangen. Bong ni dum kum, olo me kem tau tóbóng lówó ye lemwót bè yóm kmò me nmò bè Jisas. ⁶ Bè yóm tehe kemo Dwata yóm klamangen, yó udélen, monen, “Dlimunu layag mò lemayag lem kifu.” Tahu se, tódô lemayag. Yóm Dwata mò du nim ni, ni se yóm Dwata deng hlayag lem hendem me anì hol dilô me yóm tey klinggel nawa Dwata gfan lem uyó Jisas. ⁷ Bélê me kum kem tau mit du nim Tulón Heyu ni, hol lómón ke kuleng tonok yóm klowil me, bede wen yóm alì mebtes nô lemen. Yó gónó Dwata hmingón du bè kuleng anì gefan yóm là kewóten bélê me yóm tey kfasangen yóm tulón nwit me, okóm tódô lemwót bè Dwata. ⁸ Tey keglayam là skas nim tendo kum keglayam, okóm là kô gwiten kum. Wen se kdawen là kô tngón me du lan me gewà, okóm là kóen na a lebà nawa me du. ⁹ Tey dê tau gel hmohon kum, okóm sal gel wen wè me. Wen se kdawen tey kehsidek le kum, okóm là kô hatay me du. ¹⁰ Sal gel gnóm me bè lówó me yóm tehe khatay le ke Jisas ekni anì hol gfan bélê me snéen yóm bud klowilen bè yóm gel któbóngen kum. ¹¹ Bè nim igò me tolo mowil, eles tendo moni bélê me se yóm hatay lan me lemolò ke Jisas. Okóm bè ni kem gel hlayam me ni gónón gfan yóm deng bud klowil Jisas lanen gel tmóbóng kum. ¹² Kunen ne ke matay me, ngem ke guta ye se kuy yóm klowil laen dù sónen. ¹³ Wen tehe monen bè Sulat Dwata, yó monen, “Deng hentahuhu Dwata dou, ne yó se gónóhu bud tmulón du bè kem dumu tau.” a Sekel se kum, deng me hemtahu snéen, ne yó se lewót gónó me tmulón du bè kem dumu tau. ¹⁴ Deng tngón me Dwata se tehe hlowil yóm gónó tekuy mogot Jisas, ne du se angat bud hlowil tekuy lómón yóm tehe nmoen bè Jisas. Ne angat gotu sentifunen tekuy bè soluhen. ¹⁵ Yó se gónó me hembala du yó kem mgel gel sut bélê me mò lan me tmóbóng kuy. Abay se ke sónmoen temnù tau tnóbóng Dwata, sónmoen se temnù tau dmóyón du. Yó se sotu alì gónón megdóyón Dwata. ¹⁶ Yó gónóm mon, là kô me ne e temakas mò du yóm hemò Dwata kum. Bong bè ni dum lówó me, sónmoen minut metón gelen ket kdaw. Okóm bè yó dum kehetahu me, sónmoen temnù. ¹⁷ Ke hendem me yóm tey keheyuhen yóm guta me hulin kdaw, élél tnalaw ni dum keglayam te tonok ni, tek olo kem likóten. Ke tódô henbala me nim ni, là kô gbek me hmingón du yóm alì keheyuhen yóm klowil laen dù sónen. ¹⁸ Là kô kenteng mata me du yóm dê ton talak tonok, olo kem hlunen yó du kem yó. Okóm yó dé hol sen-galu nawa me yóm kimu bè longit, yóm là deng sulék ton mata du, kimu laen dù tul sónen.