¹ Tedu se buten yóm gel kesfatay ye bè kem dumu ye, ne yóm gel keseglius ye? Yó se hol buten, duhen yó kem dê kenbeyen nawa ye. Ni se hol sembeweg kuy. ² Ke wen nóyóem ne ke là gutahem du, yó se gónóm tô hmatay kem dumuhem. Ne ke wen niwolem bè kem dumuhem, ne ke là gutahem du, yó se but gónóm gel mit segled ne sfatay. Okóm yó gónóm là gmuta du yó kem nóyóem yó, abay se là hnihem du bè Dwata. ³ Wen se gel hni ye bè Dwata ne là guta ye du, abay se là hyuhen yóm tô mu ye du yóm hni ye. Són bè yóm kuy kenbeyen nawa yóm tô mu ye du. ⁴ Tey tau mili nawa yóm yu. Là tngón ye du kô, ke són nô bè nawa tau yóm kenbeyen nawa talak tonok, deng baling hohon Dwata ne? Ke són yó se nóyóen, mom hnohonen Dwata. ⁵ Là kóen na a kéng yóm monen bè Sulat Dwata, yóm monen, “Yóm nawa deng tehe blay Dwata tekuy, deng mom baling nawa alì móyô mò du yóm sidek.” ⁶ Okóm tey bong któbóng Dwata tekuy senta yóm óyô mò sidek. Wen bud monen bè Sulat Dwata, yóm monen, “Tey kekbê Dwata du yóm tau hegeta knô. Bede tey któbóngen du yóm tau hulung heglaan béléen.” ⁷ Yó gónóm mon, heglaan ye bè Dwata dé. Hol natù ye Seitan, anì mlóy hlayuk bélê ye. ⁸ Hol ye hloni ebè Dwata anì hloni ebélê ye snéen kun. Yu kem tau mò sidek, kó ye ne yó kem sidek gel nmò ye. Ne yu kem tau hemtedeng knô, hólós ye kmò kehedem ye dé. ⁹ Hegsel ye ne bè yó kem salà ye, hol ye mkik. Yóm kkuli ye, olò hulék ye bè klangag nawa ye. Yóm kehligal ye, olò hulék ye bè kebang nawa ye. ¹⁰ Heglaan ye dé bè yóm gónó ye mogot, du he hegeta kuy. ¹¹ Ó kem dumuhu setwoli, bê ye abay gel sentulón kem dumu ye. Ke gel sentulón ye kem dumu ye hemtahu, duhen ke tódô gel hendeng ye kul kmò, hol lómón ke senlón ye ne hen‑gnok ye yóm hlau Dwata. Ke ni se nmò ye, sélét mom tô lolò ye ne yóm hlau Dwata. Kéng tô yu mom baling geta senta Dwata. ¹² Tek sotu gónón lemwót yóm hlau són bè Dwata. Tek són du yóm wen kwalisen kmukum tau. Gbeken lemwà tau gu lem hatay, ne gbeken se tmafak kul. Bélê tekuy kut, laen dù kwalis tekuy hemdeng kmò kem dumu tekuy tau. ¹³ Ni hol hnungol ye yu kem tau gel mon du, “Wen syudad gónó me e mógów kemdaw ni duhen ke haya. Na me nô ditu sfalay mò me udél swa anì wen filak me.” ¹⁴ Hatan monem he ke deng tonem. Yakem eles tngónem yóm elem haya. Le hilu he kegenen mowil tau. Lómón ke kebel, tek likóten mbel, sana bud tódô kmanas. ¹⁵ Yake mon tekuy dé, “Ke kun kóyô yóm gónó tekuy mogot, nan hol hlowil tekuy anì wen gmò tekuy.” ¹⁶ Okóm kuy, mo ye mom hegmón ne hton salù. Tey sidek se yóm nmò ye yó. ¹⁷ Duhen yó, yóm tau ke deng tngónen yóm hyu, ne là dog nmoen du, yó se baling salaen.