¹ Na, yu kem tau wen kendengenen, hol hnungol ye o. Olò dnumu nkik ye dé yó kem tey hlayam sut bélê ye. ² Gotu sidek yó kem kendengen ye. Yó kem nes ye gotu nsék kaba. ³ Ne yó kem filak henyu ye gotu nkê fak. Yóm deng kkéen fak yó mò ilô yóm keseglom ye, ne tey kegtafak ye du. Deng tey bong ne yóm deng sentifun ye bè nim hol són kdaw ni. ⁴ Ngem yó kem sukéy tehe là hsut ye du bè yó kem tau mò nmò bélê ye, yó se yóm fen kmamo kuy bè Dwata. Hnungol ye dé yóm keslón le kuy yó kem tau mò nmò bélê ye. Deng gefet bè Dwata, yóm gónó mogot hol mfasang bè kdéen yóm ktaba le ebéléen. ⁵ Yóm kuy klowil te tonok ni, tey mdengen, ne tey dê kenbeyen nawa ye. Deng ye mom mkél bè yóm ngà safì eles habù mò tnétê. ⁶ Deng dnuón ye yó kem tau laen dù salaen bélê ye, ngangen efet ghatay ye lu. Tódô le kem hegbayà bélê ye. ⁷ Duhen yó, kem dumuhu setwoli, hol hanay ye nawa ye efet kkól yóm gónó tekuy mogot. Lómón yóm tau tmiba, sal hanayen nawan efet gutahen bungu yóm huluhen. Hanayen se nawan hmatan kulón mò htowok ne hbungu yó kem huluhen. ⁸ Dalang se kuy, hol hanay ye nawa ye. Ne hgel ye nawa ye, yakà dengen moni ne kkólen yóm gónó tekuy mogot. ⁹ Sotuhen, kem dumuhu setwoli, bê ye abay gel sduón anì là angat tnafak Dwata kuy. Ngem deng mdà snolu aut ne yóm angat kmukum tekuy, són kotunen duen. ¹⁰ Yake hol hendem ye, kem dumuhu setwoli, yóm tey kul kanay nawa yó kem tehe tugod Dwata ekni. Hkél tekuy bélê le bè yóm kul kegbek hbala bè yó kem gónó le glayam. ¹¹ Tódô tngón tekuy wen tey kligal le lemwót bè yóm kegbek le hbala. Deng gungol ye ne yóm tey kegbek Job hbala ekni, ne tngón ye se yóm tey któbóng Dwata du kogolen, abay se yóm gónó tekuy mogot, tey bong kkoduhen tau. ¹² Nim sotu hlolou kuy ni, tey bong muhen bè kdéen, kem dumuhu setwoli. Ke wen senfasad ye, bê ye gel safà longit duhen ke tonok ne ke wen dumu gónó ye smafà. Ke tahu se, tódô monem tahu. Ne ke là tahuhen, tódô monem là. Ke ni se nmò ye, là kô tnafak Dwata kuy. ¹³ Ke wen bélê ye wen gónón glayam, yake hol mni bè Dwata dé. Ke wen bélê ye hligal, yake hol dóyónen Dwata hlanen bè kesngalen. ¹⁴ Ne ke wen gemnóm des bélê ye, yake hangayen dé yó kem tuha gel malak bè simbahan mò mni béléen bè Dwata, ne anì lenunol le hnolo lówóhen, hlan le bè kun boluy yóm gónó tekuy mogot. ¹⁵ Ke hol snalig le Dwata bè yóm kni le béléen yó, mkó se yóm desen ne bud hfulék Dwata yóm kehyu klówóhen. Ke deng wen salà tehe nmoen, hnifót Dwata. ¹⁶ Yó gónóm mon, hol ye gel seflifót, ne hol ye gel stóbóng mni bè Dwata yóm kdê ye anì kó Dwata bélê ye ke wen tenduk ye. Yóm tau hyu kmoen, tey mtud yóm knihen bè Dwata. ¹⁷ Lómón ke tehe Ilaydya ekni, sotu tau tonok lómón tekuy snéen, ngem yóm tehe knihen bè Dwata anì là kmulónen. Tahu se, botong tlu halay sóól kegenen là kmulón. ¹⁸ Ominen bud mni bè Dwata bè yó anì kmulón. Ne tahu se, tey kulón, ne gotu bud tmowok yó kem hulu. ¹⁹ Kem dumuhu setwoli, ke wen bélê ye deng hetlas bè yóm tahu tolok, tey hyu ke wen dumu tau bud tmóbóng du semfulék ebè Dwata. ²⁰ Ni mò hol hendem ye. Yóm tau tmóbóng du yóm tau hetlas yó, du se deng mò lanen gewà yóm tau yó, ne gbek Dwata hmifót du yóm kdê salaen.