¹ Ó kem dumuhu setwoli, béen alì wen bélê ye tô hbaling tau tmolok, abay se deng tngón ye se bong mget kkukum Dwata kul yó kem tau tmolok senta yó kem dumu tau. ² Kdê tekuy, sal gel wen gónó tekuy gemsalà. Okóm yóm tau laen dù salà sumóngen, deng tahu gulit ne yóm tau yó, deng hulung mit ktauhen. ³ Lómón yóm kudà, gel knakang tekuy anì mimón, anì gbek tekuy mit du bè yóm gónó tekuy e móyô hlan du. ⁴ Senged se bè yóm kafal, bà tennga se kbongen, ne bà tennga tô kgis yóm lenos, ewenem sana kloloen yóm kun kóyô gónó e hlan du yóm tau mit du, balù yóm tey kudì yóm gónó hmilóy du. ⁵ Lómón se yó ne yóm ksumóng tau. Balù yóm là kbongen, ewenem sana kegbeken tmulón du yóm tey dê mò gónón hton salù. Hendem ye dé yóm ngà dilóf ofi, botong gbeken mken du yóm tey dlag lamang. ⁶ Ne yóm gel ksumóng tau, hol mkél bè ofi. Hol gónón smala kentihen sidek nmò tau. Bud lemwót bè ksumóng tekuy gónón sidek kehedem tekuy ne ksidek yóm nmò tekuy, ngangen ne efet laen dù gónón e kól ktau tekuy. Abay se yóm ksidek kbak tau, hol lómón yóm ofi lemwót bè lanaw ofi. ⁷ Yóm tau gbeken hnalam yó kem ógóf lem bnes, ne yó kem onuk koyu, ne yó kem utón nô lem mohin. Balù yó kem ulal, gbeken hnalam kul. ⁸ Okóm laen deng tau he ke gbeken mafas ksumóngen. Tey sidek yóm sumóng tau, laen dù gembek mafas du. Tey sidek kalasen. ⁹ Bè sumóng tekuy gónón lemwót yóm kdóyón tekuy yóm gónó tekuy mogot, yóm Mà tekuy. Ne bud bè sumóng se gónón lemwót yóm gel kehtolo tekuy kem dumu tau, igò Dwata deng mò du yóm tau, ne heskélen bè kun knô. ¹⁰ Tek sotu sumóng se gónón mlan yóm udél dmóyón ke Dwata ne yóm udél hemtolo dumu tau. Là kóen hyu yóm yó, kem dumuhu setwoli. ¹¹ Hendem ye dé. Laen dù él tahu ne él mohin ke sotu gónó le gu tembul. ¹² Laen dù koyu fig ke mungu bungu ulib. Ne laen dù grép ke mungu bungu fig. Ne laen dù él tahu gwahem bè él mohin. ¹³ Wen kô bélê ye temngón ne hulung hedem? Són sem bè khulungen mit ktauhen gónóhen gfan ke tahu duhen, ne bè yóm kehyu kmoen, mung du yóm khulungen heglaan mlan bè ketngónen. ¹⁴ Okóm yóm tau tendo wen élés nawa lem hendemen lelen seglom, béen abay hton salù bè yóm kwen ketngónen yóm tau yó. ¹⁵ Abay se yóm ketngón yó, là kóen lemwót bè Dwata, tódô lemwót bè knawa tau te tonok. Là kóen lemwót bè Tulus Dwata, tódô lemwót bè Seitan. ¹⁶ Ke wen tau gónó tekuy mton du yóm sélés nawa ne yóm nawa seglom, yó se gónó ye mton du yóm alì sidek kesbewegen, mung du yóm kdéen nmò sidek. ¹⁷ Okóm yóm tau ke lemwót bè Dwata yóm ketngónen, laen kô dù belenen. Gel nmoen yóm gónón menek bè kem dumuhen, lelen ganag nawahen ne wen khulungen mit swè. Tey gel knoduhen kem dumuhen ne lelen hyu kmoen ebélê le. Là kô ton tekuy du béléen yóm nawa kmihu ne laen se kô lafinen yóm nawahen. ¹⁸ Yóm tau ke hulung mit sefyu lem blóng kem dumuhen tau, hol lómón ke wen bnék huluhen. Ne yó nutahen du yóm huluhen yó, duhen yóm kehyu kmò.