¹ Ó kem dumuhu setwoli, ke deng ye hemtahu bè yóm gónó tekuy mogot Jisas Krays, yóm gónó mogot hol geta bè kdéen, yake béen abay mtukul tau gel hnódó ye. ² Mò kmoen ke husek lem simbahan ye yóm tau wen kendengenen, tmising blówón, lelen tilob nesen. Ne ke bud wen tau élél husek, laen dù gónón ma, lelen sidek nesen. ³ Ke yó henlom hnódó ye yóm tau tilob nesen, ne mon ye mò du, “Myóni bè ni kóm bè gónón hyu.” Okóm fen mon ye mò yóm tau élél, “Tódói mdà bè yó nii kóm, duhen ke myóni bè nii bè seel klohok tihu.” ⁴ Ke lómón yó nmò ye, deng knihu ye kem dumu ye ne. Ilóem kmon ye bong muhen bè Dwata yóm tau wen kendengenen senta yóm tau élél. Deng salà ne kehedem ye bè kem dumu ye ke yó se nmò ye. ⁵ Ni hol hnungol ye, kem dumuhu sogot nawa. Mom monem yó ne kem tau élél lem nim benwu ni yóm nélék Dwata mò baling mdengen bè kehtahu le, ne gmung le bè yó kem tau nogoten, yakà yó du yóm deng tehe fasaden bè yó kem tau kembong nawa du. ⁶ Okóm kuy, là kô nadat ye kul. Fen hegeta ye yóm tau wen kendengenen. Okóm tau du se fen gel hemgnok kuy? ⁷ Tau du se gel mit kuy ebè yó kem dyad? Hono yó kem tau wen kendengen le.  Ne bud lu snéen yóm gel mudél sidek ebè boluy yóm gónó tekuy mogot. ⁸ Tey hyu ke nimón ye yóm hlolò Dwata yó kem tau nogoten, duhen yóm sotu hlau nô lem Sulaten, yóm monen, “Kenbong nawahem kem dumum lómón kbong nawam yóm kóm knô.” ⁹ Okóm ke kmihu ye lemwót bè yóm gel ton ta, salà se yó. Ne lemwót bè kulé ye du yóm hlau yó koni, yó se gónó ye megtuled. ¹⁰ Baluen he ke gotu lolò yóm tau kdê yó kem hlau Dwata, okóm ke sotu guléhen du, deng guléhen yóm kdéen. ¹¹ Yakà deng mon Dwata du bè yóm hlauhen, monen, “Béem ndà yehenem.” Ne sotu bud monen, “Béi monok.” Anien se he ke là ndaem yehenem, okóm ke dengi monok, deng uu se tau mulé du yóm hlau Dwata. ¹² Yó gónóm mon, hegfan ye bè kestulón ye ne bè kekdol ye yóm kimón ye du yóm hlau lemwà kuy gu lem salà. Angat knukum Dwata yu hlanen bè yóm hlau bè kesbong nawa. ¹³ Bè yóm angat kkukum Dwata tau, là kô nan e knodu du yóm tau tehe là knoduhen kem dumun. Okóm yóm tau tehe knoduhen kem dumuhen, laen dù knikoen bè yóm kdaw yó, abay se là kô tnafak Dwata du. ¹⁴ Ó kem dumuhu setwoli, ke mon yóm sotu tau, “Denge hemtahu se dou,” tedu se bang tô gónón e kól du yóm monen yó ke là se gfanen bè kmoen? Là kóen na a gewà du yóm tau ke olon bè sumóngen yóm kehtahuhen. ¹⁵ Ke wen bè yó kem dumu ye deng hemtahu laen dù gónó le ma ken le duhen nes le, ¹⁶ tedu se gónón e kól du ke olo ye mon du mò kul, “Kodu ye. Hol lesek ye yóm nes mfól anì là tnaw ye, ne hol ye mken.” Tedu se bang nefeten du yóm mon ye yó ke là dog benlay ye kul yóm wen mu le du? ¹⁷ Hol lómón yó se yóm kehtahu ye. Ke là dog wen gel tóbóng ye kem dumu ye, kéng yóm tô kehtahu ye yó. ¹⁸ Okóm déke wen sotu tau mon du, monen, “Là sengeden yóm tau. Hemtahu yóm sotuhen, okóm yóm sotuhen, gel nmoen yóm hyu.” Okóm yó balau du yóm monen yó, monu, “Ke laen dù tonu hyu nmoen yóm tau hemtahu, laen kô dù gónóhu dmilô du yóm kehtahuhen. Okóm ke sónmou gel tmóbóng kem dumuhu, yó se gónóm dmilô du yóm kehtahuhu.” ¹⁹ Maya mon kehtahuhem du du tek sotu se Dwata. Hyu se yó. Okóm balù se yó kem busaw, sana kehtahu le du se kul. Botong le gel kenkel lemwót bè klikò le du. ²⁰ Nungeli. Kéng yóm kehtahuhen ke là gfanen bè yóm gel któbóngen kem dumuhen. ²¹ Mò kmoen se yóm tehe fù tekuy Abraham ekni? Gónón tedeng kton Dwata du du? Yó gónón tedeng, lemwót bè nmoen, yóm tô kedsuen yóm ngaen Isak. ²² Tódô dilô tekuy bè yóm nmoen yó yóm tey kehtahuhen. Lemwót bè yóm kimónen ke Dwata gónón baling gulit kehtahuhen. ²³ Hol kéng duem du yóm nô bè Sulat Dwata, yóm monen, “Tódô hentahu Abraham yóm tehe fasad Dwata du, ne lemwót bè kehtahuhen gónón tedeng kton Dwata du.” Yó gónó le gel mon du wè Dwata yóm Abraham. ²⁴ Bè yó gónó ye mton du là kóen tedeng kton Dwata du yóm tau ke olon hemtahu, ke là hegfanen du bè yóm gel nmoen. ²⁵ Senged snéen yóm sotu libun hdóyón ekni boluyen Rahab. Yó gónón tedeng kton Dwata du lemwót bè yóm któbóngen yó kem tau Israél tehe na a hmolung bè benwuhen. Tódô hnódóhen lu bè gónóen, ne tólóng lan hloloen kul bè kulék le anì wen lan le gewà bè yóm benwu yó. ²⁶ Duhen yó, yóm lówó tau, ke là buden nô du nawahen, deng matay ne, laen dù bud muhen. Senged se yóm kehtahu tekuy, ke là hmung tekuy du yóm nmò hyu bè kem dumu tekuy tau, laen dù bud muhen yóm kehtahu tekuy yó.