¹ Tey mtukul yóm eles kmonen du yóm Tulus Dwata yóm nmò yó kem dumu tau hulin kdaw. Tebel le yóm kul kehtahu, mom yó nimón le yó kem tulus kéng, ne yó kem tolok sekban lemwót bè kem busaw. ² Ni kem tolok ni, fen hból yó kem tau hulung mò kéng, tau hulung smukat. Bè yóm deng alì kegedlug tendo kmò le kéng, yó se mit kul là bud dmilô du yóm tahu. ³ Yó gel tolok le, là hyuhen kun ke myehen yóm tau, ne sotuhen, alì dê hlii le bè ken. Okóm yó gónó Dwata tehe dmimun kul ni kem ken ni mò lowil kem tau, mò lewót gónó le gel dmóyón ke Dwata yó kem tau deng hemtahu béléen, yó kem tau deng temngón du yóm ktahuhen. ⁴ Kdê yó kem deng tehe dlimun Dwata, hono hyu, ne bê te abay mom kenbê. Yake hol henmóyô te, mung du yóm gel keslamat te béléen. ⁵ Yó gónón hyu mken du, abay se lemwót bè udél Dwata, ne lemwót bè yóm gel keslamat tekuy béléen. ⁶ Ke hol heglalagem bè kem dumuhem hemtahu ni kem hlolou kóm ni, bong hyu kwitem du yóm deng sigang Krays Jisas tahem. Ne temnù kbegelen yóm kehtahuhem lanem hemnagì du yóm Udél Dwata deng hentahuhem, ne yóm tahu tolok deng loloem. ⁷ Béi mung du kóm yó kem tutul lenbù nmò tau gnan, tutul là lemwóten bè Dwata, tutul laen kô gónón e mefet. Tódô hol dnalangem hgulit bè yóm kloloem ke Dwata. ⁸ Wen muhen bélê te ke nmò te yóm nmò gónón kemgis lówó te. Okóm milud he kehyuhen bélê te ke nmò te yóm nmò gónó te gulit bè yóm klolò te ke Dwata. Wen se muhen bè yóm klowil te ni kmoen ni, sélétem ne bè yó dum klowil te bè longit hulin kdaw. ⁹ Nim monu mò kóm ni koni, hol tahu duhen. Hyu ke kdéen tau hemmóyô du ne hemtahu du. ¹⁰ Yó gónóhu hol hmotu són gelu mò du yóm deng hmò Dwata dou, abay se du se mò nefet nawa te, yóm Dwata là wen tul katayen. Yakà deng lenwaen kdéen tau gu lem hatay, sélétem ne bè yó kem tau deng hemtahu. ¹¹ Hol hloloem kul ni kem ni, hmungem bè yóm gel ktolokem. ¹² Hol gel tenngelem kdaem, Timuti, kô wen gónó le gemsanil kóm. Balù yóm hanà tolo klomihem lemnok, uu se mò senflénég kem dumum hemtahu bè kestulónem, bè kekdolem, bè kbong nawam kem dumuhem, bè kehtahuhem, bè kólós nawam. ¹³ Béi htakas semfala du bè gónón wen yóm Udél Dwata, ne béi se htakas tmolok du efet ksutu dyó. ¹⁴ Béem hnuda yóm kenhulung deng tehe blay Dwata kóm hlanen bè kul udél yó kem tugoden, ne bè yóm knok le kóm ne yóm kni le béléem bè Dwata yó kem tuha gel malak bè simbahan. ¹⁵ Hotuhem nawahem mò du ni kem ni, béi htakas. Ke ni se nmoem, dilô kem dumum tau yóm kgulitem. ¹⁶ Hol tenngelem kmoem, ne hol tenngelem se ktolokem. Hol henlelem mò du ni kem ni, abay se ke nmoem, angati gewà gu lem hatay se kóm, dalang se yó kem gel hmungol kóm.