¹ Ke wen tonem gónón teklé yóm logi deng tmuha sentahem, béem kento mólów du. Henyuhem hmau du, lómón kadatem du ke mudéli ebè maem. Dalang se ebè yó kem logi lomi lemnok, lómón kmoem kul, lómón ke hol twolihem. ² Senged se yó kem libun deng tmuha sentahem, lómón kmoem kul, lómón ke yéem. Dalang se ebè yó kem sawang libun, lómón kmoem kul, lómón ke hol libunem, ne béem nmò óngóhem lem blóng le. ³ Gel sentóbóng ye temdof kul yó kem libun bolu ke laen bang gónó le ma. ⁴ Bede ke wen ngà le duhen ke bé le, yó se mò temdof kul, mò towok liteg yê le kul ne bé le. Ni se sotu hol hlolò Dwata yó kem tau deng hemtahu béléen. Ke ni se gel nmò le, tey bong hyu kegnóm Dwata du. ⁵ Yóm libun bolu tahu laen bang gónón ma, tek són Dwata dé gónón hefet nawan, ne là kóen skó tendo knihen bè Dwata, keten kifu ne keten kdaw. ⁶ Bong yóm libun bolu ke tek són yó hendeenen yóm kenbeyen nawan, lómón ke deng matay, balù yóm igoen tolo mowil. ⁷ Ni se mò hol hloloem yó kem libun bolu anì là wen gónó le gemsanil kul yó kem dumu tau hmilol. ⁸ Okóm yóm tau deng hemtahu, ke là tendofen du yó kem kun dumu setwoli, hol néen yó kem fes lówóhen, deng knogolen ne yóm kehtahuhen. Mom sidek he kun nmò yóm tau yó senta yóm tau là dengen hemtahu. ⁹ Bê ye homong snulat boluy yóm libun bolu mò tnóbóng ye ke là dengen gefet nem folò halayen, yóm libun hanà suléken myehen, ¹⁰ ne tótól boluyen lemwót bè yóm hyu gel nmoen, deng megtolok kem ngaen, hulung hmódó, dê lanen gel tmóbóng yó kem dumuhen hemtahu, là tlek kun temngel ke wen gónó le glayam kem dumuhen, ne gotu nawahen bè kem dumuhen. ¹¹ Maya mon kul du yó kem dumu libun bolu ke hanà tolo tukô nawa le, bê ye abay homong lu. Déke bud le móyô myehen, mom knogol le Krays, ¹² ne yó gónó le gmulé du yóm tehe fasad le du. ¹³ Déke knalam le sembad lem blóng gónô, hlós le lemfu. Là olon yó du, okóm hlós baling libun lemnek ksumóngen, dê snoloen, hbólen yó kem là hyu bud hból du. ¹⁴ Yó gónóm mon, hyu nawahu bè yóm libun bolu ke hanà tukô nawahen ke tódô bud myehen anì wen ngaen, ne anì sen‑gifaen yó kem fes lówóhen. Anì yó, laen dù bang gónó le dmelem kut yó kem hmohon kut. ¹⁵ Yakà deng wen libun bolu deng kmogol du yóm lan Dwata, ne loloen yóm lan Seitan. ¹⁶ Okóm ke wen libun hemtahu bè yó, ne ke wen kem libun bolu bè kun fes lówó, yake tódô du ne temdof kul anì là gbayaen bè yó kem dumu tau bè simbahan bè yó. Lotoben wen se kem dumu libun bolu eddoli là wen bang gónó le ma se kul. Yake kem dumu tau hemtahu bè simbahan fen smolu kul. ¹⁷ Yóm tau tilob kesgalaken kem dumun tau bè simbahan, hol knóón béléen ke hol henyu ye keblay ye du ofolen. Hol nê yóm tau ke alì gotu nawahen tmolok du yóm Udél Dwata, ne ke hol henkimeden yóm gel ktoloken. ¹⁸ Yakà deng monen du bè Sulat Dwata, yó monen, “Bê ye benkes bungusen yóm safì dmadu.” Ne sotuhen, “Knóón bè yóm tau mò nmò ke wen sukéyen.” a ¹⁹ Béem tagad nmung ke wen delem le du yóm tau malak bè simbahan ke là dengen lewu duhen ke tlu tau gemtanud du. ²⁰ Olo kóm ke tahu wen se gónón teklé yóm tau yó, tódô benkas bnólówem lem blóng yó kem dumuhen hemtahu anì eles wen klikò yó kem dumun hemtahu. ²¹ Gungol Dwata ni kem monu mò kóm ni, ne gungol Krays Jisas se kun, dalang se yó kem hógów Dwata nô bè longit. Hol nulitem ni kem hlolou kóm ni, ne béen mtukul henlom nawam. ²² Béem lenangaf mélék tau mò malak bè simbahan. Déke wen gónón teklé, gomongi myak béléen. Hol nmoem yóm nmò laen dù belenen. ²³ Béen són él ninumem, minumi udì yóm ninum wen khééten mò bulung yóm gel kdes lem blututem, yakà ket kiwólem du gemnóm des. ²⁴ Wen se sidek gel nmò tau mahil gfan, ne yó se mit kul elem hatay. Okóm wen se yóm sidek nmò tau là gfanen efet hulin kdaw. ²⁵ Senged snéen yóm nmò hyu, wen se kendel gfan. Balù yó kem là gfanen nim kmoen ni, gotu le bud gfan he.