¹ Tahu se yóm gel mon le, ke yó tô nóyóen yóm sotu tau ke du malak bè simbahan, tey hyu se yóm tô nmoen yó. ² Yóm tau malak bè simbahan, hyu ke laen dù gónó le gemsanil du kem dumuhen, là demweyen, hulung hedem, hulung mafas nawan, hulung mit ktauhen, hulung hmódó, hulung tmolok, ³ là hlengelen, là kosut nawan, okóm tau ganag nawahen ne menek nawahen, là són bè kgutahen filak gónón nô nawahen. ⁴ Hyu ke hulung mit yó kem fes lówóhen, ne ke himón yó kem ngaen, mung du yóm kadat le du. ⁵ Yóm tau ke là hulungen mit yó kem fes lówóhen, kmò tô khulungen mit kul se yó kem tau hemtahu bè Dwata? ⁶ Yóm tau mò du nim nmò ni, yake yóm deng tmuha kehtahuhen anì là hegmónen. Abay se ke hegmón, dalil gónó Dwata tmuled du, lómón se yóm ktuleden ke Seitan. ⁷ Yóm tau malak kem dumuhen hemtahu, hol sneb du ke bong kadat le du se kul yó kem tau là dengen hemtahu anì là wen gónó le gemsanil du, ne béen nmò yóm hemyak knô, kô dalil gónón gholot bè Seitan. ⁸ Ne yó kem tau tô gel tmóbóng bè simbahan, sneb kul ke tau hyu kmò le, ne ke tau laen dù lafinen yóm kehtahu le. Là hyuhen ke hlengel le, ne ke seglom le bè filak. ⁹ Hol sneb kul ke là mili nawa le bè yóm ktahuhen deng hentahu le, mung du yóm klaen dù blóng le ebè Dwata. ¹⁰ Ni kem tau nélék ye ni, na ye gna tilów lu. Ke hyu kton ye kul, ominen yó wen hkem ye kul. ¹¹ Kólen bè yó kem yehen le, hol sneb kul snéen ke libun hyu kmò le, ne ke là gel sentulón le kem dumu le, ne ke là hlengel le, ne ke laen dù kéng nmò le. ¹² Yóm tau tô tmóbóng bè simbahan, là demweyen, ne hulung mit yó kem ngaen ne yó kem dumu fes lówóhen. ¹³ Yó kem tau hyu kmò le du nim nmò ni, tey le tótól bè kem dumu le, ne là likò le tmulón du bè yó kem dumu tau yóm kehtahu le bè Krays Jisas. ¹⁴ Bè nim igou smulat ebéléem ni, tey kkosohu tô mauy kóm. ¹⁵ Okóm ke tolo wen anggau, syan dé deng wen sulatu eles gónóm temngón du yóm mò kmò yó kem tau fes lówó Dwata, duhen yó kem tau deng hemtahu béléen, yóm Dwata laen tul katayen. Hol lómón ke tekuy se yó kem hehek bè gónóen ne kem suguken, tekuy se gónó Dwata smalig du yóm ktahuhen. ¹⁶ Laen kô dù tau gembek hemkéng du yóm tey kehyuhen yóm deng hegfan Dwata bélê tekuy, yóm deng hentahu tekuy. Tehe tódô hbaling tau yóm Ngà Dwata, ne yóm Tulus Dwata fen hdilô du bè kem tau. Gotu ton yó kem hógów Dwata nô bè longit. Ne sentbong yó kem tau bè klamangen benwu, ne wen se bè yó kem hmungol du hemtahu du. Ne ominen haway etta bè longit.