¹ Duhen yó, ni hol tanay hlolou kóm. Ke gel ye stifun bè simbahan, hol gel hni ye bè Dwata yó kem dumu ye tau, hol hmung ye du yóm kdóyón ye ke Dwata. ² Homong hni ye béléen se yó kem tau hol geta bélê ye, ne yó kem dumu tau genlal. Yó gónó ye mutóm kul anì menek kbenwu tekuy, ne són nô bè nawa te yóm kadat te ke Dwata, ne yóm hyu kmò te bè yó kem dumu te tau. ³ Tey hyu se ke lómón ni yóm gel nmò te, ne tey hligal du Dwata snéen, yóm deng lemwà tekuy gu lem hatay. ⁴ Abay se yó se kun kóyô ke kdéen tau gotu gewà, ne gotu tngón le yóm ktahuhen. ⁵ Yakà tek sotu du Dwata, ne tek sotu se yóm blóng tau ebè Dwata, duhen yóm tau boluyen Krays Jisas. ⁶ Deng hamaen kun klowil mò soken yóm kdéen tau deng tehe golu elem hatay. Bè yóm tehe katay Jisas bè yóm kdaw tehe buteng Dwata du, bè yó gónó tekuy dmilô du yóm hol kun kóyô Dwata bè tau, duhen yóm kegewà le gu lem hatay. ⁷ Ni se gónó Dwata hógów dou mò tmolok yó kem dumu tau là Ju le anì hentahu le yóm ktahuhen. Hol tahu nim monu ni, là kô kéngu du. ⁸ Sok ye gel stifun bè simbahan, kóyóu ke logi yóm fen mni, syan ke logi deng hogoten ke Dwata klowilen, ne laen dù tlek lenbuten, ne laen dù gónón seglius bè kem dumuhen. ⁹ Ne yó kem libun, kóyóu ke lesek le yóm nes là móngóhen, yóm hol knóón bélê le. Yake béen són bè kbong wek le ne kem ngom le ne bè kem nes mebtes le gónóhen nô nawa le. ¹⁰ Okóm hol knóón bélê le bè yó kem libun hemtahu ke hol hyu kmò le. ¹¹ Yóm libun ke wen gel dnalangen, yake tódô htinof hmungol, mung du yóm keheglaanen. ¹² Là móyóe du dou ke libun fen hegled tmolok kem logi bè simbahan, ne ke mom du wen kwalisen senta kem logi. Yake tódô htinof dé kun. ¹³ Abay se bè yóm tehe kmò Dwata tau, Adam yóm gna nmoen, ominen tmodol mò ke Ib. ¹⁴ Là kô Adam du yóm tawan sukat, kaem yóm libun, ne du se yóm fen gmulé du yóm hlau Dwata kul. ¹⁵ Okóm yó kem libun, tey gel któbóng Dwata kul bè yóm gel ksut blutut le. Ne gewà le lem yóm tafak Dwata ke tódô henlós le yóm kehtahu le, ne ke hol kenbong nawa le kem dumu le, ne ke laen dù belenen yóm gel kmò le, mung du yóm là kehton le dóyón.