¹ Mo sulod, to waro duwa-ruwa makasabot kow to igkagi ko so nataga kow to balaod no ka otow ubos do to balaod taga-od to buhi pad kandin. ² Pananglitan, ka malitan na asawa ubos to gahom to kandin asawa no lukos libre on kandin to balaod. ³ Koy naa koy pakig asawa kandin to loin no lukos taga-od to buhi pad ka asawa rin no lukos, ug umawon no ug paka panlibog di ko ugkamatoy on ka asawa rin no lukos libre on kandin hoy konad ug maka panlibog kog asawa kandin to loin no lukos. ⁴ Iling naan dod mo solod, patoy on to balaod so pinabayjo to pog kalagkos now ki Kristo. No sakop kid on to kandin to oyjag du oyjow ogkinabuhi no mapuoson para to Diyos. ⁵ So ka nig kinabuhi kipad somalo to pog ka otow tano batasan, ka madoot ta no kaibog no inpokow to balaod iyam mig gahom to lawa ta, no sikan diyo ugpangkos to kamatayjon. ⁶ Di kuntuon, libre kid to balaod, so nigpatoy kid duon to nig uripon nahon-a kanta. Kono kid on ug alagad ubos to nahun-an balaod so sinulat to kono diyo on to bag-on kinabuhi no kandin to Espirito. ⁷ Kuntuon nokoy naa ka igka laalag ta? Ugpaka kagi ki naan to maroot kabalaod? Kono so waro aporon nataga ko nokoy ka salo ko waro balaod, waro a nataga ko nokoy ka pog kaima ko so waro pa nigkagi ka balaod, “kono ki ogkaima!” ⁸ Di duon to kasugoan ka salo nakahigayjon pog himo to tibon matang to patoy no salo ko waro pa balaod. ⁹ Nahun-a buhi a to waro pad kasugoan, di to duon on kasugoan naalimukawan ka salo hoy namatoy a. ¹⁰ Iyan puron tuyo to kasugoan to pog bogoy to kinabuhi di iyan nasi nig poonan to kamatayjon ko. ¹¹ So kasalo naka higayjon man to pog hulos kanak pinabayjo to kasuguan hoy pinabayjo to kasuguan in himatayjan to salo. ¹² Ka balaod balaan ka kasugoon balaan, matarong koy maroyjow. ¹³ Nigpasabot da soin no ka maroyjow iyan nakahimatoy kanak? Kono, di ingamit to Salo ka maroyjow iling no hinagiban to pog himatoy kanak oyjow maka agi iyan ka tutu-o no kina-iya to Salo. Koy naan pinabayjo to kasugoan ugka kita ka subla no kadoot to salo. ¹⁴ Nataga ki no kabalod Espiritohanon, di otow aro no ug pakasalo hoy iling to inbaligya isip uripon to Salo. ¹⁵ No ino-ino a to ugkayimo ko, so kono ko ugkayimo ka upos ko. Di inhinanag ko ka mo butang no indumutan ko. ¹⁶ Koy naan inhinang ko ka kuno ko puron ug hinangon, nigpaila soin no oyon a no matarong ka balaod. ¹⁷ Koy naan kono no kanak ka nighinang to soin ko kono iyan ka salo no soin kanak. ¹⁸ Nataga a no waro iyan maroyjow no soin to kanak no ugpaka otowon, so agad ugkaliyag anog himo to maroyjow di kono agmakahimo. ¹⁹ Kono a ug pakahimo pog hinang to maroyjow no ugkaliyagan kog hinangon di inhinang ko naan ka madoot no kono ko ugkaliyagag hinangon. ²⁰ Ko inhinangko kono ko ugkaliyagag hinangon, nigpasabot soi no kuno a iyan nighimo to soi ko kono ka salo no soin to lawa ko. ²¹ koy naan natagaan ko soini sagbuka no balaod: to higayon nog hinangon ko ka maroyjow, ka maduot naan ka nighinang ko. ²² Inkahoy-uwan ko ka balaod to Diyos suud to pusong ko. ²³ Di naguram ko no duon loin no balaod kayi to lawa ko nu nig pakig ugot to balaod nu igkaliyag to suman-suman ko. Sikan ka naka uripon kanak to salo nu kayi to kanak. ²⁴ Mokohoy-o-hoy-o a amana! Huntaw buwa ka ugluwas kanak ligkat to lawa ku no ughukoman nug himatayjan. ²⁵ Salamat to Diyos nu nakaluwas kanak pinabayjo to Magbabayjo ta nu si Hisus Kristo, koy naan soin ka kahimatang in alagaran ko nu balaod to Diyos ka suman-suman ko nog ogtuman to Balaod to Magbabayjo, di iyan ka ug tuman ka maroot nu igkaliyag to lawa ku nu makasasalu.