¹ To pogkaponga kayi, duo nakita ko no hup-at no Diwata no nigsasindog diyo to hup-at no pikungan to kalibutan. Intanggong dan ka hup-at no kalamag to kalibutan oyjow kono ogkakalamagan ka tano, dagat, hoy ka agad nokoy no0 kayju. ² Nataman, duon o man o nakita kono loin no Diwata no nigparibabow diyo to langit puon to igsilo no nig uyjag to Magbabayjo. No nigpanamtaman sikandin nig ulaloy ka nigpangumow to hup at Diwata to gahum to pogdoroot to tano hoy to dagat. ³ Nigkagi si kandin, “Kono niyo padurooti, ka tano, ka dagat, hoy ka kakayjuwan taman to ogkakulitan noy o ka bukud to mo sulugu-anon to kanta no Magbabayjo.” ⁴ No narinog a no duo sagboka no gatus hoy hup-at no pulo hoy hup-at no libo(144,000) no otow ka nakulitan puun to tibo no kinagiyan ni Israilita. ⁵ Duo sampulu hoy daruwa no libo(12,000) pu-un to kabuwaran ni Huda, sampulu hoy daruwa no libu(12,000) puun to kabuwaran ni Rubin, hoy sampulu hoy daruwa no libo(12,000) puun to kabuwaran ni Gad. ⁶ Duo sampulu hoy daruwa no libo(12,000) puun to kabuwaran ni Asir, sampulu hoy daruwa no libu(12,000)puun to kabuwaran ni Naptali, hoy sampulu hoy daruwa no libu(12,000) to kabuwaran ni Manasis. ⁷ Duo sampulu hoy daruwa no libu(12,000) puun to kabuwaran ni Isakar. ⁸ Duo sampulu hoy daruwa no libu(12,000) puun to kabuwaran ni Sabulun, sampulu hoy daruwa no libu(12,000) pu-un to kabuwaran ni Husi, hoy sampulu hoy daruwa no libu(12,000) puun to kabuwaran ni Binhamin. ⁹ Pogkaponga dotu, duo nakita ko no panongan no mo otow no konog kasuul no diyo nigpuun to nigloin loin no mo nasud, mo kinagiyan hoy mo kabuwaran, hoy mo linalagan. Diyo sikandan nanasindog to tangkaan to turunu hoy to nati no karniru no niggugumit to maputi hoy nigbitbit to iling to lubi. ¹⁰ No nigpanamantaman sikanndin migpamalogotan no nighunduo: “Iyan nigluwas kanta ka Magbabayjo no nigpinuu to turunu hoy ka nati no karniru! ¹¹ No niglingot nanasindog ka tibo no mo Diwata diyo to turunu, hoy diyo to mo igbuyjag hoy diyo to hup-at no hininang no oggoynawaan. No nig usungol sikandan diyo to tangkaan to turunu hoy nigsimba to Magbabayjo. ¹² No migkagi sikandan, “Malogot iya ka Magbabayjo ulug no ogdayjanon, og tahuron, ogpasalamatan so mabantug sikandin, matangsob, madoson, hoy manokal to waro ogtamanan.” ¹³ Nataman, nig insa-an at to sagboka to mo igbuyjag, “Hontow a ka sikan no mo otow no nigugumit to maputi, hoy hondoi sikandin nigpuon? ¹⁴ No nigtabak a, “Agalon, sikoykow ka nataga ko hontow sikandin.” No nigkagiyan a nikandin, “Sika ka mo otow no naka antus to malogon no pogbayjag bayjag. ¹⁵ Sikan naa ka kayi sikandin to tangkaan to turunu to Magababayjo, hoy duma ki kandin to maaldow hoy marusilom diyo to timplu din. No layjon sikandin ogdumahi hoy ogbantayji to sooyjo so nigpinuu to trunu. ¹⁶ Konad o sikandan ogmaggutasan hoy oglaklakahan, hoy konad o sikandin ogkatutung to aldow hoy to agad nokoy pad no ogpakatutung. ¹⁷ Su ka nati no karniru no diyo to taliwaro to turunu, iyan ogbabantoy hoy tuun kandan diyo to mo woyig no ogpakabugoy to kinabuyi. No ogponasan to Magbabayjo ka tagso lowo dan no ogtigis.”