¹ Hoy nakita ko ka nati no karniru no mighikuran to sagboka to pitu no silyo hoy to sikan do nakarinog ato sagboka to hup-at no mo hinimuwan no og goynawa no miglalag. Ogpokoiling to lugung ka langog din no niggononduon, “Hondoi ka!” ² Hoy duon nakita ko no maagkag no kudo no nigpagundalan to otow no duon piot. Inbogayjan kandin to kuruna hoy mighipanow to migpanpannulu to mo kultura din. ³ hoy inhukaran mando to nati no krniru ka igkarangub no hikot, hoy narinog ko ka igkarangub no hinimuwan no oggoynawan no migkagi, “Hondini ka!” ⁴ Hoy duon miglibuwas no dangub no kudu no malalab dow nigpagunda-an to otow no inbugayjan to katongod to pog awo to karoyjow to ingod oyjowog mohihimotayjoy ka mo otow. No inbugayjan kandin to bubuyjagon no kampilan, ⁵ hoy inhukaran mando to nati no karniru ka igkatulo no hikot, hoy narinog ko mando ka igkatulo no hinimuwan no oggohoynawa no migkagi, “Hondoi ka!” Hoy duon nakita ko no moitom no kudu no migpangunda-an to otow no migbitbit to timbangan. ⁶ Hoy duon lagong no narinog ko no kono honduon to diyo migligkat to taliwaro to hup-at no hinimuwan no og gohoynawa no migkagi, “Tatulo no salmun no sagboka no aldow. Di kono no hilabuti ka montiko hoy ka bino!” ⁷ Hoy inhokaran mando to nati no karniru ka igkahup-at no hikot, hoy narinog ku ka igkahup-at no hinimowan no og gogohoynawa no migkagi, “Hondini ka!” ⁸ Hoy nakita ko mando ka kuddu no malunsi no migpangundalan no og ngaranan to kamatayjon, hoy nigsundul kandin ka ogngaranan to hadis. Inbogayjan kandin to guhum to pogpanghimatoy to igkohup-at no ba-ad to mo otow to ingod pinabayjo to gubot, to gutas, to dalo dow pinabayjo to magin talunan no mo mananap kayi to ingod. ⁹ Hoy inhukaran mando to nati no karniru ka iglima no hikot, hoy nakita ko diyo to diralom to altar no mo gimulud to mo otow no inmangimatayjan tongod to pogtuman dan to lalag to Magbabayjo hoy to pogmatinumanon dan to pogpanongnong kayi. ¹⁰ Hoy migpanamantaman kandan migmamangingiyak, “Magbabayjo no amani no maroson, ka matulos dow malogot, kagan o no pad og hukumi hoy ogpabayjari ka mo otow no mighimatoy kanami diyo to ingod?” ¹¹ Hoy impamugayjan on ka matag sagboka to maangkag no kinabu no malayjat dow migkagihan to ogpohimolayjon pad to dagdagow ro taman to ogkasampung o ka kasuluhan to mo sulud dan no duma ran to migpakimatoy to Magbabayjo no ogpangimatayjan iling to natamanan dan. ¹² Hoy nakita ko no inhokaran mando to nati no karniru ka igkohon-om no hikot dow nigdinog to maagbot amana hoy mig itom ka aldow iling to moitom no hulibison dow ka buwan miglalab anat to langosa. ¹³ No noulog diyo to tano ka mo bituon diyo to langit anat to, moyilow pad no bugas to kayju no inbayjaan to makusog no kalamag. ¹⁴ Naawo ka langit iling basuon no inlolon, hoy nonoalin ka tibo no mo bubungan hoy ka mo pulu ligkat to natahuan dan. ¹⁵ Nangolos diyo to mo pilang dow to mo dalama dow diyo to mo bubungan ka mo hari to ingod hoy ka mo panguu, ka mo labow to mo sundalo, ka mo datu no karuon, ka dakol ka katongod no mo otow, ka mo uripon dow ka kono no mo uripon. ¹⁶ Nigpangananoy kandan to mo bubungan dow to mo bato, “Tugbani koy oyjow ogkabunbunan koy hoy konad ogkitoon to nigpinuu to turunu, dow ligkat to kabulu to nating karniru. ¹⁷ Hoy mighinguma o ka makahalat-halat no aldow to pogpabayjari to tibo no otow, hoy waro iyan ogpokogsagubang kayi.”