¹ No nigsugud si Hisus to pogpanulu diyo to ilis to lanow to Galiliya. Masalig ka mo otow no niglilimod kandin hoy tongod to soin nigluwan si Hisus to sagboka no sakayjan hoy nigpinnuu, no ka mo otow nigpabilin diyo to ilis to lanow. ² Masalig ka inpanulu rin no mo sampitanan sagboka to inpanulu rin soin, ³ “Pamminog kow! Duon sagboka no otow no nighondiyo to kamot oyjow ogpamula. ⁴ To pogsawbod din, duon boni no naulog diyo to ilis to bayjanan hoy nig-uma ka mo bayjaku hoy inpanuktuk ka mo inpamula. ⁵ Ka duma no boni naulog diyo to tano no batuwon hoy so manipis man ka tano. ⁶ No noinitan on ka pinamula, nagangu soin su waro nakadalig soin. ⁷ Ka duma no boni naulog diya to mo dugiyon no sagbot. Hoy nigtubo ka mo dugiyon no mo sagbot hoy nabunbunan on ka inpamula. ⁸ Di duon mo boni no noulog diyo to maroyjow no tano hoy nigtubo hoy nangunod. Duon nangonod to katluan (30), ka duma kohon-uman (60), ka duma songo gatus (100).” ⁹ Hoy nigkagi si Hisus, “Ko duon talinga nu, pamminog kow!” ¹⁰ To nigpasawsagboka si Hisus, to ka pila no nakarinog to inpanulu rin nigdani kandin duma to sampulu hoy daruwa no tinuonan hoy nighongyo kandin to pogbogoy to kating-awan to sampitono. ¹¹ Nigtabak si Hisus, “Inpapitow on to Magbabayjo kaniyu ka inholos din diyo to Gingharian. Di ka duma no diyo to libwasan, ka tutu inpapitow on pinabayjo to sampitonon. ¹² Tongod to sikan, agad ogpitow pad kandan kono kandan ogpakita; hoy agad ogpamminog kandan, kono kandan ogmakasabot; su ko oglibod kandan diyo to Diyus ogpasayluwon din kandan.” ¹³ No nanginso si Hisus kandan, “Waro now buwa nasabuti ka sampitonon? No ogmonuwon now to ogpasabot to loin no sampitonon? ¹⁴ Ka insawbod to tigpamula iyan ka ikagihonon to Diyus. ¹⁵ Ka mo boni no nasawbod diyo to dalan iyan sooyjow ka ikagihonon to Diyus no narinog to moo tow, di nig-uma si Satanas hoy inagu din ka ikagihonon to Diyus no narinog to mgo otow nu insawbod diyo to kandan no pusung. ¹⁶ Ka mo boni no nasawbod diyo to kabatuwan hoy to tano iyan ka ikagihonon to Diyus no narinog to moo tow hoy indawat dan no duon koholo. ¹⁷ Di kono soin ogmakadalig to kandan no nokoy naan ka kono kandan ogmakaparayjon. Pog-abut to mo kalisuran hoy mo pabayjad-bayjad tongod to kagiyonan, og-ongkod dayjon kandan. ¹⁸ No ka duma no boni no nakasawbod diyo to dohiyon, iyan sooyo so nakarinog to lalag to Magbabayja, ¹⁹ ka pogkalaggow ran moyitongod to pog-ugpo dan, hoy ka poggoyinawa to mo karatuan dan hoy ka pogkoupii to duma pad no mo kasangkapan, iyan nokoumos to lalag to Magbabayja, hoy waro sikandan nakabobohas. ²⁰ Ka boni no nakasawod diyo to moupiya no tano, iyan sooyo so mo otow no nakarinog to lalag to Magbabayja no migdawat hoy migbobohas. Ka saboka nakabobohas to tatolu no pulu (30), no ka duma nakabobohas to koon-oman no pulu (60), no ka duma nakabobohas to saboka no gatus (100).” ²¹ No migkagiyan din kandan, “Waro ogparokkot to sulu no ogsuuban to gantangan hoy ko diyo igtahu to solib to lantawan. Ko kono, igpatawantawan iya igtahu. ²² Koynaan waro iggolos no kono ogkanongnongan; hoy waro ogbunbunan no kono ogkakita. ²³ Koynaan ko ogkoupian kow no ogpakasabut, sumsumana niyu ay-ayari ko nokoy ka narinog niyu!” ²⁴ No migkagiyan pad man o kandan ni Hisus, “Sikan naa, tantanuri niyu ko nokoy ka egkarinog niyu. Koynaan ko og ayad-ayad kow ogpamminog, ogpakasabut kow naa, hoy ogtimulan pad to Magbabayja. ²⁵ Koynaan sooyo so duon katounan, ogtimulan pad koynaan sooyo so doisok do so katounan, ogkuon pad iya minsan ka doisok no kandin.” ²⁶ No migkagi pad man-o kandin, “Ka Poghari to Magboboyja ogpokoiling kagihonon moyitongod to otow no migsawbod to boni diyo to uma din. ²⁷ Migpadayun kandin to himu rin to maaldow hoy to pogliporong din to marusilom, migtubu ka boni hoy migtulin. Koy naan waro din natagoyi ko immonu to ogtulin. ²⁸ Ka tano ka ogpabohas to mo pinamula, hun-a-a ogtubu ka dowun, no ogbobohas o, no ogkataman ogmatosan e. ²⁹ Ko ogkoyinuhan o ka pinamula, oggalabon o to kamunoy tongod su tinggaani o.” ³⁰ Ne mig-inso si Hisus, “Maniyu ka ogpoilingan ta to Poghari to Magbabayja, hoy maniyu no panunggilingan ka oggamiton ta kayi? ³¹ Ogpokoiling soini to boni to mustasa no mallilintok no impamula to otow diyeo to uma din. Ka sika no boni iyan kinaroisokan kayi to ampow to tano. ³² Koy naan ko igpakapamulo o sika hoy ko ogtubu o, ogkoyimu o sika no kinarakolan to langun no mo pinamula. Ogdorakol o ka mo sugpang woy ogsosalag ka m manuk-manuk diyo to ogdalungan no mo sugpang din." ³³ No masulug pad no mo panunggilingan no iling kayi ka inggamit ni Hisus to pogpanulu din to kagihonon to Magbabayjo diyo to mo otow no sumalo do to ogkasabut dan. ³⁴ No waro inlalag din diyo to mo otow no waro din ipabayjo to sangpitanan. Piru igpasabut din do ka langun diyo to mo tinuonan din ko sikandan naan do. ³⁵ To ogkasagkup o to sika no aldow, migkahiyan o ni Hisus ka mo tinuonan din, “Kuwa kid o su oglapas ki sooyjo to dohipag to lanow.” ³⁶ No dutu mig-ongkoran o to mo tinuonan ka masulug no mo otow woy nanguntud o kandan to balangoy no in-unturan ni Hisus. No duo dogma mo balangoy no miglogso kandan. ³⁷ No duo migginguma no dakol no kalamag hoy imbundul-bundul o to bunlud ka balangoy hoy hapit o ogkaponu to woyig. ³⁸ Koy naan nakaliporong si Hisus no mig-uulunan diyo to lobut to balangoy. No impukow o kandin to mo tinuonan din hoy ingkagiyan, “Talagpanulu, kono ka ogkalaggow to hapit ki ma ogkalonod?” ³⁹ No mig-onow si Hisus no insaparan din ka kalamag hoy migkahiyan din ka mo bunlud, “Poonong-onong kow!” No dutu, migsanggol o ka kalamag hoy migpoonong-onong o ka mo bunlud. ⁴⁰ Ne migkagiyan din kandan, “Mania to kaaldok kow? Waro bos pogpalintutuu niyu hoy pogsalig?” ⁴¹ No noinu-inu kandan hoy mig insooy no migkahi, “Maniyu buwa soini no otowa? Minsan so kalamag hoy mo bunlud no ogpalintutuu kandin?