¹ Ka pog Hari to Magbabayjo ogpokoiling to pangguguron mayitongod to sampulu no boyi no nig alap to mo salong hoy nangipanow ka ogtomu to ogpanga-sawwa. ² Og kalabot-labot ka laylima no boyi hoy mo matagsob ka loin no laylima. ³ Su ka ogkalabot-labot nang-alap to mo salong dan di waro nigtagana to igtubil dan. ⁴ Di ka mo matagsob, nangalap on to mo salong hoy to igtubil ran diyo to tagu-anan. ⁵ No kamuluwan su nalangan ka ogpanga-sawwa, og dungdunggayjon on si kandan hoy nonokahirogo un. ⁶ Di hongkayi to ogliwaro on to karusiloman, duon nigbalukan no nig kagi, "Duon on ka ogpangawsawwa, agpas kow hoy tomuwa now sikandin." ⁷ Sikan do, nanghimata ka mo boyi hoy in andam dan on ka mo salong dan. ⁸ No nigkagi sooyjo so ogkalabot-labot diyo to mo matagsob no mo boyi, ‘Bogayi koy nikaniyu to igtubil su ogkaob-obukan naan do ka mo salong noy.' ⁹ Di nigtabak ka mo matasob, ‘Koma ko konad on ogkoolog soini kanta. Hondiyo kow pad to tindahan hoy boli kow on to igtubil now.’ ¹⁰ Tagood to nangipanow on kandan ka ogmamoli, noko-umo on ka ogpangasawwa. No sooyjo so nonakaandam, nigduma on kandin diyo to koonanan, hoy inlokoban on ka gumawan. ¹¹ To waro do nalingon-ngon, nanginnguma on mando ka duma no mo boyi hoy nigsampit sikandan ka nigkagi, "agalon, agalon," Tukasi koy nikoykow? ¹² Di nigkagi sikandin, ‘Ognangonan ku si kaniyu to malogot: Waro a nokoila kaniyu.’ ¹³ Di bantoy kow su waro niyu natagoyi ka aldow hoy ka uras to poglibod ku. ¹⁴ Ka poghari to Magbabayjo ogpokoiling mando to pangguguron moyitongod to otow no oghipanow to mariyo no ingod. In-umow rin ka mo sugu-onon din hoy insalig din diyo to kandan ka mo kamanggaran din. Inbogayjan din ka tag sagboka sumalo to katuonan dan. ¹⁵ Ka sagboka inbogayjan din to lalimma no libu (5,000) no salappi no bulawan, ka dangob imbogayjan din to daruwa no libu (2,000) no salappi no bulawan. Ka sugu onon no nakarawwat to lalimma no libu (5,000) no salappi no bulawan, ¹⁶ duon no nigbunsud sikandin ka ogpaanak to salappi din, hoy nig-anak sooyjo to lalimma no libu (5,000). ¹⁷ No iling dod ka dangob no nakarawwat to daruwa nu libu (2,000) no salappi no bulawan, nig anak ka salappi din to daruwa no libu (2,000). ¹⁸ Di ka nakarawwat to songo libu (1,000) no soloppi no bulawan, nighipanow sikandin hoy nigkali to tano no inlobongan din to salappi to agalon din. ¹⁹ To nalugoy on no timpo, nig-uli on ka agalon oyjow ogsuulan ka mo sugu-onon din. ²⁰ Hoy nigparani sooyjo so sugu-onon no insaligan to lamlimma no libu (5,000) no salappi no bulawan hoy nig alap pad sikandin to loin no lalimma nu libu (5,000) hoy nigkagi, “Agalon, inbogayjan a nikoykow to lalimma no libu (5,000) no salappi no bulawan. No pitawwa now, soini rod ka anak no lalimma no libu (5,000).” ²¹ No nigkagiyan sikandin to agalon din, maroyjow ka inhimu now. Maroyjow ka hoy ug kasaligan ka. Tongod su ogkasaligan ka to doisok no salappi, ogkasaligan ku sikoykow to dakol pad, solod ka hoy ambit ka to kaholo to agalon nu!” ²² No nigparani mando sooyjow so sugu-onon no insaligan to daruwwa nu libu (2,000) no salappi no bulawan. No pitawwa nu soini rod ka daruwwa no libu (2,000). ²³ Nigkagiyan sikanadin to agalon din, “Maroyjow ka inhimo nu. Maroyjow ka hoy ogkasaligan ka. Tongod su ogkasaligan ka to doisok no salappi, ogkasaligan ku sikoykow to dakol pad. Solod ka hoy ambit ka to kahalo to agalon nu!” ²⁴ Nataman, nigparani on mando ka sugu-onon no insaligan to songo libu (1,000) no salappi no bulawan hoy nigkagi “Agalon, nataga a no mabulut ka, oggaani ka to waro nu ipamula hoy ogpanlimud ka to waro nu isawwod. ²⁵ Di nahaldok a woy inlobong ku to tano ka salappi nu. No pitawaa nu, soini rod ka salappi nu.” ²⁶ Di nigkagi ka agalon din, “Sikoykow so maroot woy pogulon nu sugu-onon! Nataga ka man naan buwa to oggaani a to waro ku ipamula woy ogpanlimud a to waro ku isawwod, ²⁷ no maniyo to waro now itagu diyo to bangku ka salappi ku oyjow to poglibod ku ogkaalap ku rod soini duma to anak kayi? ²⁸ No puruta ka salappi diyo to kandin woy ibogoy diyo to nakasalappi to sampulu nu libo(10,000) no salappi na bulawan. ²⁹ Su sooyjow so duon kandin, ogtimulan pad oyjow ogmohon-in ka kadin. ³⁰ Di sooyjow so waro kandin og angayjon agad ka doisok no indomdom din ne kandin porom. ³¹ Omun ko oghingguma on ka Anak to Otow duma to gawom hoy katolosan hoy ogdumaan to tibo no mo diwwata, ogpinnuu on sikandin diyo to amana no matolos no turunu rin. ³² No oglibulungon diyo to tangkaan din ka mo otow to tibo no mo nasud. Pogkaponga ogbaaron din sikandan to daruwwa no baad, iling to oghimuwon to talagtamong no ogpogsuwoy to kalniru woy to kambing. ³³ No diyo din igtagu to kakawwanan din ka mo kalniru, di ka mo kambing diyo din igtagu to igkagibang din. ³⁴ Pogkaponga, kodi no Hari, ogkagiyan ku ka diyo to kakawwanan, “Hondini kow so ogpanalanginan kow to Amoy ku hoy ugpo kow to Nigharian no intagana kaniyu ligkat pad to poghimu to kalibutan. ³⁵ Su timpu no niggutasan a, inpakoon a now, to timpu nu nammaraan a, inpoinom a now, to timpu nu niglapu a, inpalapu a now. ³⁶ To timpu nu waro kinabo ku, inpakinaboan a now, to timpu nu naraluwan a in atiman a now, to timpu nu napiriso a, inlouy a now”. ³⁷ Hoy nig-inso ka mo otow no mo matalong, “Magbabayjo kon-u koy man nakakita koykow no niggutasan ka hoy inpakoon noy koykow? Hoy nammaraan ka, inpoinum noy koykow? ³⁸ Kon-u koy man nigpalapu koykow to baloy noy agad waro koy nokoila koykow? Hoy waro kinabo nu inpakinaboan noy koykow? ³⁹ kon-u koy man nakakita koykow no naraluwan no in atiman noy koykow hoy napirisu ka hoy inluoy noy koykow?” ⁴⁰ Hoy ka Hari ogtabak kandan, “Ogkagiyan ku kaniyu no to agad kon-u no higayjon no oghimuwon now soini to mo otow no mokohohoy-u oghimuwon nu raan diyo to kodi.” ⁴¹ Hoy nigkagi kandin diyo to mo otow diyo to gibang din, “Mangawwo kow, no mo indilus to Magbabayjo hoy mangondiyo kow to hapuy no kono ogkoobokan no intagana to Tanas hoy to mo diwwata rin. ⁴² Su to ingutasan a, waro a now pakoona, no nammaraan a di waro a now poinuma. ⁴³ Waro a now dawwata diyo to baloy now , su waro a now noilaan, hoy no waro kinabo ku waro a now pakinaboa, naraluwan hoy napirisu a waro a now atimana. ⁴⁴ Hoy nigtabak sikandan, “Magbabayjo, kon-u koy man nakakita koykow no niggutasan hoy nammaraan, hoy sagboka no kono no koila, hoy waro kinabo, hoy naraluwan, hoy napirisu no waro koy nigbulig koykow?" ⁴⁵ Ka Hari nigtabak kandan, “Ogkaggiyan ku kaniyu no to agad nokoy no higayjon no waro kow nigbulig to mokohohoy-u, iling dod daan nu waro kow nigbulig kodi.” ⁴⁶ Su sikandan no ogmakakinanam to waro katammanan no logpad. Di ka mo matalong ug makadawwat to kinabuhi no waro iyan katammanan.