¹ To nakaponga on si Hisus to pog-anad to tibo, nigkagiyan din ka mo binasbas din, ² "Nataga kow no daruwa ro naan no aldow to kono pad ka korow to kohimonan to pogligad. Sikan no higayjon ka Anak to Otow igbogoy on hoy iglansang on to kurus. ³ Hoy niglilimud-limud ka mo agalon to mo Pari woy ka mo agalon to mo Hudiyu diyo to Palasyu ni Caifas, ka Agalon to Pari. ⁴ Nighisgut-hisgut to pogdakop ki Hisus to holos woy poghimatoy kandin. ⁵ Nig-kagi kandan, "kinaanglan ko ta soini igtonong to kowlugan atuk hangkuwan ko ogparolog tog kagubut ka mo otow." ⁶ Hoy to diyo si Hisus to Betaniya to baloy ni Simon no ibungon, ⁷ duon sagboka no boyi no nigdani ki Hisus to nigsandig kandin diyo to koonan. Nig alap kandin to sagboka no tibud no alabastru no naponu to mo maalon no pohomot woy in ug-ug din soini to ulu ni Hisus. ⁸ Nakakita ka mo binasbas din woy nanabolu kandan no nigkagi, ⁹ "Soini no pohomot ogkohimu porom no igbaligya to maaldow hoy ka halin igkabogoy diyo to mo mokohohoy-u!" ¹⁰ Nataga si Hisus to kandan no inkagi woy nigkagi si Hisus kandan, maniyo to og hobilan now man soini boyi? Maroyjow ka nighimu rin kodi. ¹¹ Ka mo mokohohoy-u layjon now og karuma, di kodi kono. ¹² Ka inhimu rin no in ug-ug ka pohomot kayi to kodi no lawa iyan pogpanagana to poglobong kodi. ¹³ Doromdoma now soini agad hondoi soini igbatbat ka maroyjow no kanangonan to tibo no ingod ka noyimu to soi boyi ignangon iyan to kandin no nabaybayjaan." ¹⁴ Hoy ka sampulu woy daruwa no binasbas, ka nigngaran ki Hudas Iskaryote, nighondiyo to mo Pari, ¹⁵ woy nigkagi, "Nokoy man ka kaniyu no igbogoy kodi ko igbogoy ku si Hisus?" Nigbibilang kandan to katluan no salapi no sinsilyu woy inbogoy kandin. ¹⁶ Sugud to sikan no aldow si Hudas namitow to maroyjow no higayjon nog kapurut si Hisus. ¹⁷ To hun-a no aldow to kasaulugan to paan no waro patubu, ka mo binasbas nighondiyo ki Hisus, woy nanginginso kandin, "Hondoi man ka ogkaliyagan now no igpaandam kanami ka paniyapon to kasaulugan to pogligad?" ¹⁸ Si Hisus nigkagi kandan, "Hondiyoi now ka sagboka no otow diyo to banuwa woy kagihi now kandin, 'Ka Talag-anad nigkagi, nokouma on ka kodi no oras. Kodi woy ka kodi no mo binasbas oghimu to kohimonan to pogligad diyo to koykow no baloy." ¹⁹ Hoy inhimu to mo binasbas ka inkagi ni Hisus kandan woy in-andam ka paniyapon. ²⁰ To marusilom, si Hisus woy ka sampulu woy daruwa (12) no binasbas niglimud-limud to tangkaan to koonon. ²¹ Hoy to nangoon kandan, nigkagi si Hisus, "Ogkagiyan ku kaniyo: sagboka duon to kaniyu ka og parakop kodi." ²² Nangatalong amana ka mo binasbas woy matag-sagboka kandan nangi-nginso kandin, "Magbabayjo, kodi buwa ka og nangonon now?" ²³ Si Hisus nigtabak, "Ka ogpasonob to pan duma kodi to soini no panaksan iyan ogparakop kodi. ²⁴ Ka anak to otow kamatoy bayjon pad to inlalag to nohisulat, di mokohohoy-u kandin nog parakop to Anak to Otow! Suga man ko waro on naotow!" ²⁵ Si Hudas ka traydor nigkagi, "Talag-anad, kodi buwa ka?" Si Hisus nigtabak, "Nakagi now on." ²⁶ To nangoon on kandan, nigpurut si Hisus to pan, nigpasalamat diyo to Magbabayjo woy in pori-pori rin woy inbogoy rin to mo binasbas din woy nigkagi kandin, "Puruta now soini woy koona. Soi iyan ka kodi no lawa." ²⁷ Hoy inpurut din ka kupa, nigpasalamat to Magbabayjo woy inbogoy kandan. "Manginom kow to soini," nigkagi kandin. ²⁸ "Iyan soini ka langosa ko no nigparoson to kasabotan, ka langosa ku no inpaagas to tibo no mohon-in no og pasaylo to mo salo. ²⁹ Nangonan ku kaniyu no kono ad iyag dayjon nog inom to soini no binu poiling to aldow no og inum a to loin mando no binu duma kaniyu diyo to Nigharian to Amoy ku." ³⁰ Hoy nigmanganta kandan to mo kantahonon to pogsayjo to Magbabayjo woy nangondiyo to bubungan to mo Ulibu. ³¹ Hoy nigkagi si Hisus to mo binasbas, "Soini karosiloman kaniyu tibo mamalaguy woy og ongkod kodi. Ka sinulat nigkagi, himatayjan to Magbabayjo ka talagbantoy woy mokogsuwoy-suwoy ka mo karnero." ³² Hoy kaponga a ogbatonon mokohun-a a kaniyu to Galileya." ³³ Si Pedro nigkagi ki Hisus, "Kon-u ad iyan ongkod koykow agad pad og ongkoran ka to tibo!" ³⁴ Si Hisus nigkagi ki Pedro, "Doromdoma no soini: to kono pad og ukalo ka manuk to soi no karusiloman, katatolu kag kagi to waro a nu noiloyi." ³⁵ Si Pedro nigtabak, kono ku iyan koykow igholos agad pad og himatayjan a duma now." Hoy ka tibo no binasbas nigkagi daan to sikan. ³⁶ Hoy si Hisus nighondiyo to sagboka no banwa no nigngaranan to Getsemani duma ka mo binasbas din. Hoy nigkagi kandin to mo binasbas din, "Mamminuu kow pad kayi mintaras og hondiyo a pad nog ampu." ³⁷ In-alap din si Pedro woy ka daruwa no anak ni Sebediyo woy nakagoram kandin to dakol no katalong woy kahingawwa. ³⁸ Hoy nigkagi kandin diyo to kandan, "Amani a iyan natalong no igkamatoy kud porom, pabilin kow kayi woy hipoka kow duma kodi." ³⁹ Nighipanow kandin diyo to kohunnaan, niglangkob to tano woy nig-ampo no nigkagi, "Amo ku, kog kohimu porom puruta on soini kupa to pogbayjad-bayjad! Di kono no kodi pogboot iyan ogkatuman ko kono ka koykow." ⁴⁰ Hoy niglibod si Hisus diyo to tatolu no binasbas woy nalambagan din kandan no nanakohirogo. Hoy nignangonan din si Pedro, "Maniyo man to waro kow nokohipoka duma koddi agad sagboka ro no uras? ⁴¹ Hipoka kow woy man-ampu oyjow kono kow karaog to mo pogsulay, andam ka gimukod di malotoy ka lawa." ^{42 43 44} Hoy nig ongkod man do si Hisus woy nig-ampu, "Amoy ku, ko igpoinom now iyan kodi soi kupa to pogbayjadbayjad, og katuman ka koykow no pogboot." Naponga soini, niglibod mando kandin woy noumahan din ka mo binasbas no nonokohirogo do sug momokohirogo on man iyan. Nig ongkod man do si Hisus kandan woy nig-ampu to katatolu no higayjon to iling do no batbaton. ⁴⁵ Hoy niglibod kandin diyo to binasbas woy nigkagi, "Nonokohirogo ko ro buwa woy nomoholay? Nakouma on ka oras no ka Anak to Otow igbogoy on diyo to bolad to mo makasasalo. ⁴⁶ Onow kow sug mangipanow kid on. Pitawa now, soinid ka nigparakop kodi. ⁴⁷ Tagood nigkagi pad si Hisus, nokouma si Hudas no sagboka to sampulu hoy daruwa (12) no binasbas duma ka mohon-in no otow no nig alap to mo ispada woy mo lampos. Sinugo kandan to mo agalon to mo Pari woy to mo pangulu to mo Hudiyu. ⁴⁸ Ka traydor nigbogoy kandan to sagbuka no tuus. "Ka otow no og harokan ku iyan sikan ka inpamitow now. Dakopa now kandin!" ⁴⁹ Hoy nigdani on si Hudas ki Hisus woy nigkagi, "Talag-anad, ka kalinaw og duma koykow," woy nigharokan din si Hisus. ⁵⁰ Si Hisus nigtabak, "Sulod, himuwa nud ka koykow no ogkaliyagan!" Woy nigdani kandan ki Hisus dow indarakop dan on. ⁵¹ To sagboka no duma ni Hisus nighulabot to kandin no ugpit woy nigtigbas ka uripon to agalon to Pari woy nasapsap ka sagboka no talinga. ⁵² Hoy nigkagi si Hisus kandin, "itagob now ka koykow no ogpit su kag gamit to ugpit, to ugpit daan kandin og kamatoy. ⁵³ Waro ka buwa nataga no mokohimo a ogpabulig to Amoy ko dow igpaalap din kodi ka kapin sampulu woy daruwa (12) no mo otow to diwata? ⁵⁴ Di ko og himuwon ko soini, omonuwon man to ogtuman ka sinulat no nigkagi to kinaanglan ogkohitabo iyan soin?" ⁵⁵ Hoy nigkagi si Hisus diyo to mo otow, "Mangingilog a buwa no nig-alap kow pad iyan to mo ugpit woy lampos to pogdakop koddi? Kara aldow nig-anad a diyo to timpulu no waro a now dakopa. ⁵⁶ Piru koyitabu soin so tibo oyjow ogkatuman ka insulat to mo purupita to Kasulatan.” No in-ongkoran on kandin to mo binasbas din hoy namallaguy on kandan langun. ⁵⁷ Pogkoimpus, in-uyan on si Hisus to omo otow no migdakop kandin diyo ki Kaypas, ka Labow no Talagpanubad. Diyo nanlibulung ka mo talagpanulu to Balaud to Magbobayjo hoy ka mo igbuyjag to mo Hudiyu. ⁵⁸ No migsinundul si Pidru kandin no migpadpariyu de, taman to lama to Labow no Talagpanubad. Nataman, migsolod on kandin diyo hoy migpinnuu duma to mo talagbantoy su oyjow ogtongtong ko nokoy ka ogpangkusan. ⁵⁹ No migpammitow to ubat no mo guguron moyitongod ki Hisus sooyjo so mo pangulu to mo talagpanubad hoy ka sakup to mo Talaggukum to mo Hudiyu oyjow ogpoyimatayjan dan kandin. ⁶⁰ Piru waro nakita ran, minsan masulug ka mig-uubat no mo talagpamalogot. To katammanan, duon daruwa no otow no migpamalogot ⁶¹ ne migkagi, “Narinog noy ka soin no otow no migkagi, ‘Ogguhuson ku ka timpulu to Magbobayjo hoy igbalow-balow ku soin igpasasindog solod to tatolu ro no aldow.’ ” ⁶² No migsasindog ka Labow no Talagpanubad hoy mig-inso ki Hisus, “Na, waro igkatabak nu to mo sumbung moyitongod koykow?” ⁶³ Piru migpoonong-onong do iya si Hisus. No migkahi on man-o ka Labow no Talagpanubad diyo to kandin, “Ogpopahunliboton ku sikoykow to ngaran to manokal no Magbobayjo no ognangonan koy nikoykow ko sikoykow iya ka Kristu, ka Anak to Magbobayjo.” ⁶⁴ No migtabak si Hisus, “Inlalag nud on iya. Piru ogkagiyan ku sikaniyu to puun kuntoon ogkitoon niyu ka Anak to otow no ogpinnuu diyo to igkakawan to Maroson no Magbobayjo. No ogginguma sikandin no ogdumaan to mo gapun diyo to langit.” ⁶⁵ To sikan do, inggisi on to Labow no Talagpanubad ka kumbale din te migkahi, “Imbaloy-baloy rin on ka Magbobayjo! No maniya to ogkingolan ki pad no ogkuwa to mo talagpamalogot to nadinog niyud ma ka pogbaloy-baloy rin? ⁶⁶ Na, nokoy to suman-suman niyu?” No migtabak sikandan, “Olog sikandin no oggimatayan!” ⁶⁷ Nataman, in-iiloban dan on ka ulaula rin, hoy impandabi ran on hoy impanagpi sikandin to duma ⁶⁸ to migkahi, "No la Kiristu, antuki now ko hontow a ka migpasakit ikow!" ⁶⁹ Nokoy naan to diyo migpinpinnuu si Pidru to lama. No duon malitan no suluhuanon to Labow to Talagpanubad no migparani kandin hoy migkagi, “Hoy, honduon mulo to duma ka ni Hisus no matig-Galiliya?” ⁷⁰ Piru migpahunwaro si Pidru diyo to tangkaan to langun no otow no migkagi, “Wara a nakataha ko nokoy ka impanlalag nu.” ⁷¹ Nataman, miggondiyad on kandin to kasunguwan to alad hoy duon on man-o loin no suluhuanon no malitan no nakakita kandin, hoy migkahi diyo to mo otow, “Hoy, ka soin no otow duma ni Hisus no matig-Nasarit.” ⁷² No migpahunwaro dod man-o si Pidru no migkagi, “Hibot iya, wara a nokoila to sika no otow!” ⁷³ To waro do naluhoy, migparani diyo to ki Pidru sooyjo so nanasindog diyo hoy migkahi, “Malohot iya no duma ka nikandan su ogkoilaan ka iya minsan to poglalag-lalag nu.” ⁷⁴ No dutu, migpahunlibot on iya si Pidru no migkahi, “Mongoyibot iya to pogkootow ku, wara a iya nokoila to sika no otow minsan pad ogpatoy a!” To duon no mig-ukalo ka manuk ⁷⁵ hoy nasuman-suman ni Pidru ka inlalag ni Hisus kandin, “To kono pad og-ukalo ka manuk, katatolu ad nikoykow igpahunwaro.” No miglihawang on si Pidru hoy migpanaman-taman migsinohow.