¹ To pogkaponga to sikan, nighondiyo si Hisus to Hirusalim oyjow og amot to kohulogan to mo Hudiyu. ² Diyo to Hirusalim, dani to gomawban to in ngaranan to gomawban to mo Karniru, duon linow no intawag to Bitsata diyo to Hibriyu. Soin mo linow duon lalimma no holonganan. ³ Hoy diyo duon mo maralohon no nigmangibat, mo botod, mo polid, hoy ka mo otow no nangolog ka lawba. ⁴ - Hoy diyo duon otow no nigdaralo sulud to katlo-an hoy walo no tuid. ⁵ , ⁶ Nakita kandin ni Hisus no nighibat hoy natagahan din no nigdaralo ka otow to malayjat no panawon. Nokoy na-an ka nig-insoan ni Hisus ka otow, kaliyag ka no og koulian? ⁷ Nigtabak ka otow, Magbabayjo, waro’g makasalopapoy kanak diyo to linow ko ka woyig ogkagoligow on. Hoy tagood a ogpanamantaman no og hondiyo to linow, duon loin no nokouma kanak diyo. ⁸ Nigkagi si Hisus kandin, “Sasindog ka, alapa no ka inhibatan no hoy hipanow.” ⁹ Hoy to duon noulian kandin hoy inpangalap din ka mo inhibatan din hoy nighipanow. Noyitabo soin to aldow no papahulayjay. ¹⁰ Nokoy na-an ka nigkagihan to mo Hudiyu ka otow no nuolian, “Aldow to pogpopohulay kuntoon, supak to kanta no balaud ka pog-alap no to inhibatan no. ¹¹ Nigtabak kandin inkagiyan a to otow no nigpouli kanak, ‘Alapa ka in hibatan no hoy hipanow. ¹² Nanginso ka mo otow kandin. Hontawba ka nigsugu koykow no alapa no ka inhibatan no hoy hipanow? ¹³ Di ka otow no nuolian waro mokoila ko huntow so nig-ongkod man si Hisus tongod so mohon-in otow diyo. ¹⁴ Ponga nayitabo sikan, natumowan ni Hisus ka otow diyo to timpulu hoy nigkagiyan ni Hisus ka otow, “Pitawba, nuolian kad kono kad himo to maroot oyjow kono ka og pokoyimo to mangil-ad pad no panghitabo. ¹⁵ Hoy nighipanow ka otow hoy nabatbat to mo agalon to mo Hudiyu no si Hisus manaan ka nigtambal kandin. ¹⁶ Tongod to soin, nigbugdan on ka mo Hudiyu to poghisakit ki Hisus so nigpanambal man kandin to aldow to pogpohuluy. ¹⁷ Nigtabak si Hisus kandan, ka amoy ko nighimo hangtod kuntoon koy na-an ka oghimowon ko soin. ¹⁸ Tongod to soin nigsamot ka kilyag to mo agalon to mo Hudiyu to poghimatoy ki Hisus. Kono tongod to poglapas din to balaud to aldow to poghimoloy ko kono nigkagi pad kandin no Diyus ka Amoy din hoy iling do no in iling din ka koogalingon din to Diyus kandin. ¹⁹ Nokoy na-an ka nigkagi si Hisus kandan, ogkagiyan ko kaniyo: Ka anak waro ogkoyimo to koogalingon din. Inhimo rin do ka nakita din no inhimo to amoy din. Ka inhimo to Amoy, oghimowon to Anak. ²⁰ So ka amoy indakolan din to goynawa ka anak hoy inpakita diyo to anak kia tibo no inhimo din. Hoy igpakita pad kandin to Amoy ka mo butang no moko-ino-ino amana hoy og inu-ino kow tibo. ²¹ So iling no og batonon to amoy ka mo nangamatoy oyjow og bogayjan to kinaboyi ka otow no kaliyagan din to ogbaton. ²² Ka amoy kono og hilogpad agad hontow so intalad din on man to anak din ka katongod to pahilogpad. ²³ Oyjow ka tibo no og tawod to anak iling do nu nigtawod kandan to amoy. Ko kono ogtawod to anak kona ogtawod to amoy no nigpaalap kanak. ²⁴ To pogkatinuod, ogkagiyan ko kaniyo no ka otow no nigtuman to mo lalag hoy nigtu-u to nigpa-alap kanak ogbogayjan to kinabuyi no waro kooposan. Kono kandin oglogparan tongod so nakabayo on kandin to kamatayjon no nabuhi pad. ²⁵ To pogkatinuod, ogkagiyan ko kaniyo no og uma ka panawon, di nig-uma on, no ka mo nanamatoy ogpakarinog to lalag to anak to Diyus, hoy ka ogpaminog to lakag din ogkabuyi. ²⁶ Iling to ka amoy duon gawom to pogbugoy to kinabuyi, kanak no anak din songo ogpakabugoy to kinabuyi, so inbogayjan a rin to gawom oyjow og logpad so kanak anak to otow. ²⁷ Songo inbogayjan a rin to gawom oyjow oglogpad so kanak anak to otow. ²⁸ Kono kow koino-ino to soin, so og uma ka panawon no ka tibo no namatoy ogpakarinog to lalag ko, ²⁹ hoy ogpangonow kandan to lungon dan. Ka maroyjow ka binowatan ogbatonon hoy ogbogayjan to kinabuyi no warog kooposan, hoy ka mo maroot ka binowatan ogbatonon oyjow og lgparan. ³⁰ Nigdayjon si Hisus to pogkagi, waro og koyimo ko ku kanak do. Tutu-u no og hilogpad a, di ka poghilogpad ko sumalo to inkagi to Diyus kanak. Nokoy na-an ka pighilogpad ko maroyjow tongod so waro aman nighimo to kougalingon ko no kabubut-on, ko kono kabubut-on to nigpa-alap kanak. ³¹ Ko kanak do ka ogkagi to soin mayitongod to kanak no pogkaotow kono kow ogmakatu-u to igkagi ko. ³² Di duon sagboka no nigtitigus mayitongod kanak, hoy nataga a no ka inkagi din tutu-u. ³³ Si Huwan no talagbawtismu nigtitigus mando mayitongod kanak. Kono ba duon insugu now diyo ki Huwan oyjow og panginso kandin? Hoy nigkagi kandin to tutu-u. ³⁴ Di waro a nigkinanglan to ogtitigus to otow mayitongod kanak. Nohisgotan ko si Huwan oyjow ogtu-u kow kanak hoy og kaluwas. ³⁵ Si Huwan iling to sulo no nigsiga, hoy narago kow to pogsiga agad malopot no panawon do. ³⁶ Di duon pad nigtitigus kanak no labow pad ki Huwan. Waro loin ko kono ka mo tarabawo no inpahimo ko ko no inpahimo to amoy kanak. Nigtitigus soin no ka amahan iyan nigpa-alap kanak. ³⁷ Hoy ka amoy no nigpa-alap kanak iyan nigtitigus mayitongod kanak. Di waro now kandin nakita hoy nadinog no nigkagi, ³⁸ hoy waro now dawbata ka lalag din, tongod so waro kow nigtu-u kanak no inpaalap din. ³⁹ Intun-an now ka kasulatan so nakadoromdom kow no iling to soin no paagi ogkaangkon now ka kinabuyi no waro kooposan. Ka kasulatan do ka ogtitigus mayitongod kanak. ⁴⁰ Di nigbalibaran now to pogdalapak kandin oyjow puron ogdawbat now ka kinabuyi. ⁴¹ Waro ko inkinanglan ko pogsayjo to mo otow. ⁴² Nokoila a kaniyo hoy nataga a ko nkoy ka tago to goynawba now no waro now dakoli to goynawba ka Diyus. ⁴³ Nighondini a no duon gawom ligkat to Amoy di waro kow nigdawbat kanak. Di ko duon oghondini to kougalingon din no gawon, iyan now ro og dawbaton. ⁴⁴ Monohon now to pogtu-u kanak ko ka pogsayjo do to loin no otow ka mayinongdanon kaniyo hoy waro now paniguroha ka pogsayjpo no ligkat to tutu-u no Diyus? ⁴⁵ Kono now sumsumana no kanak ka ognangon kaniyo to Amoy. Si Muysis no intogaran iyan og sumbong kaniyo. ⁴⁶ Ko tutu-u no nigtu-u kow ki Muysis, ogtu-u kow poron kanak. Tongod so si Muysis ka nigsulat mayitongod kanak. ⁴⁷ Di tongod waro kow man nigtu-u to sinulat din, kono kow songog tu-u to inpangkagi ko.