¹ No nakarinog ka mo Parisiyu to iyan on masalig ka noyimu no hibatoon hoy nabowutismuwan ni Hisus dut ki Huwan. ² Di ka malogot, kono no si Hisus ka nigpamowutismo ko kono iyan ka mo hibatoon din iyan. ³ To pogkarinog ni Hisus iyan ka mo Parisiyu, nig-awbo on kandan diyo to Hudiya su niglibod on diyo to Galiliya. ⁴ No duon ingod no ogngaranan to Samarya nogligaran dan to hondiyo to Galiliya. ⁵ Nokouma kandin to sagboka no lunsud to Samaria no ogngaranan to Sikar no kono mariyu to tano no inbogoy ni Jacub diyo to anak din no si Jose. ⁶ Diyo to atabay ni Jacub. Nigpinnuu si Hisus dani to atabay su nig bulayjan kandin to hipanow rin. Mo oras on to moudto. ⁷ No dutun, nangondiyo to lunsud ka mo hibatoon din so ogboboli to ogkoonon dan. To iyug on to mo hibatoon din, duon malitan no matig-Samarya no niglopow no ogpanakoru. No nigkagiyan ni Hisus kandin, "Poinuma a pad. ⁸ (To sikan no timpu, nangondiyo to siyudad ka mo hibatoon sug boboli tog kakoon). ⁹ No nigtabak ka malitan, "Mania to ogbuyjuan a ni koykow to woyig to Hudiya ka man, no kanak, matig-Samarya a man no malitan?" (Nigkagi ka malitan kog koiling to sikan konad iyan og pakigduma ka mo Hudiyu to mo matig- Samarya.) ¹⁰ No nigtabak si Hisus, "Ko nanongnongan nu pad poron ko nokoy ka igkabogoy to Magbabayjo, hoy ko hontow soin sog boyjo koykow to woyig, koykow on iyan poron kag boyjo kanak hoy ogbogayjan ku koykow to woyig nog pakabogoy to kinabuwi." ¹¹ No nigkagi ka malitan, "Agalon, waro timbi nu, su maralom soini so bolon hondoi ka naan og-angoy to woyig nogpakabogoy to kinabuyi? ¹² Inpakali ro to kaap-apuan to no si Hakub ka soini no bolun hoy kayi ru iyan kandin nig-inum duma to mo anak din iling ka ayjam din. Mania, kaniyu ka labow to kaapuan ta no si Hakub?'' ¹³ No nigtabak si Hisus, "Agad hontow no og-inum to soini no woyig og kammaraan dod man iyan. ¹⁴ Di ka og-inum to woyig no inpoinum ko konad iyan oglaklakahan su ka woyig no inpoinum ko kandin ogkoiling salobsob diyo to kandin ogbogoy to untung no waro katamanan." ¹⁵ No nigkagi ka malitan, "Agalon, talaria-a to sikan no woyig oyjow konaad og kammarahan, hoy oyjow konad mando oghondini kag sakuru." ¹⁶ No nigkagiyan ni Hisus, "hondiyoi nu ka asawa nu dumaa nu kayi.'' ¹⁷ No nigtabak ka malitan, "Waro asawa ku." No nigtabak si Hisus, "malogot ka in kagi nu no waro asawa nu. ¹⁸ Su kalalima kad naka asawba hoy kaig lukos nu kuntoon, kono nud malogot no asawa nu." ¹⁹ No nigkagi ka malitan, "Agalon , pogsuman ko no Prupita ka. ²⁰ Ka mo kaapuan noy, kayi nigsimba to Magbabayjo to soini no bubungan. Di sikaniyu so mo Hudiyu nigkagi kow to diyo do to Hirusalim olog-olog no ogsimba to Magbabayjo." ²¹ No nigkagiyan sikandin ni Hisus, "Pamminog ka inayjon ogmoko uma ka ka timpu no kono kow on to hoy ko diyu naan to Hirusalim og simba to Amoy no Magbabayjo. ²² Sikaniyu so matig-Samarya waro kow nakita to ogsimboon now, di kanami so mo Hudiyu nokoila koy togsimboon noy so kayi man ogpuun ka kaluwasan. ²³ Di og mokouma ka timpu, soinid iyan kuntoon, no ka malogot nogsimba, ogsimba to Magbabayjo pinabayjo to Ispiritu hoy to kamalogotan. No iyan sikan og kaliyagan to Magbabayjo nogsimba kandin. ²⁴ Ka Magbabayjo, Ispiritu kandin koilangan nogsimba pinabayjo to Ispiritu hoy to kamalogotan." ²⁵ ka malitan nigkagi, "Nakanongnong a noghondini ka Misiyas nogngaranan to Kristu. Omun naan kog mokoumoon kandin, igpasabot kanta ka tibo." ²⁶ Si Hisus, "Kanak soini so nigpakiglalag koykow, iyan on iyan sikan og kagiyon nu." ²⁷ No dutun, nakalibod mando ka hibatoon ni Hisus. No nabolongbolong kandan no nigkita ran kandin no nigpakiglalag to malitan. Di waro sagboka kandan nogpokoinso to malitan ko nokoy ka igkaliyagi rin, hoy waro mando ogpokoinso ki Hisus ko mani to nigpakiglalag to malitan. ²⁸ Sikan naan, nig-ongkoran on to malitan ka banga rin su niglibod diyo to lunsud hoy nigkagiyan din ka mo otow. ²⁹ "Hondini kow hoy pitawba now ka otow no nigkagi kanak to tibo ku noyimu. Kandin on iyan buwa ka Misiyas?" ³⁰ Nokoynaan ka nig-ongkod kandan to lunsud hoy nangondiyo to ki Hisus. ³¹ To sikan no panawon nighinggat si Hisus to mo hibatoon din, "Rabi, koongkod! ³² Hoy nigtabak kandin, duon koonon ko no waro now natagoyi? ³³ Nokoy naan ka mo hibatoon nigmoin-insooy, nig-alapan buwa kandin to koonon?" ³⁴ Nigkagiyan ni Hisus kandan, "Iyan kud og koonon ka pogtuman igkabonali duo to nigpopohondini kanak. ³⁵ Nigkagi kow man buwa no hop-at 4 Pad no bulan human ogpokouma ka tinggaani?' Nokoy naan pitawa now ka mo kamot: Noyinog on ka unod hoy tumanan on nog gaaniyon! ³⁶ Ka nig gaani ogmakarawwat to bayjad hoy og hiposon din ka mo abot oyjow to kinabuwi no waro katamanan oyjow og koholo ka nig pamula hoy ka niggaani. ³⁷ Su tumanan ka nigkagi, 'Loin ka nigpanimula hoy ka niggani. ³⁸ Inpaalap ko kaniyu oyjow to poggani to waro gobloy. Ka duma no niggoblayjan di kaniyo ka mampo to kandan no ginoblayjan. ³⁹ Moon-in ka mo Samaryanhon to sikan lunsud no nanuu ki Hisus su ka malitan nig-iling man, "Nigkagiyan a kandin to tibo no noyimo ko" ⁴⁰ To poghinguma to mo Matig-Samarya ki Hisus, inhangyu dan kandin kog kabaloy nog hirogo pad kandin diyo to kanda.Di nighirogo pad iyan si Hisus diyo to solod to daruwa no aldow. ⁴¹ No nig masalig pad man on ka nig palintutuu kandin tungod to pogpanulu din. ⁴² No nigkagiyan to mo otow ka malitan, "kuntoon, nigpalintutuu koy kandin, kono no ligkat do to inpanggugug nu kanami, ko kono ligkat to kanami ka nakarinog kandin. No natagahan noy on no kandin iyan ka Manluluwas to mo otow kayi to ampow to tano. ⁴³ To nararuan on si Hisus ka untol no nigkagi no kono og toworon ka Prupita diyo to ingod no intulinan din. ⁴⁴ To nokoumo on kandin diyo to Galiliya, nigsimasima kandin to mo otow. ⁴⁵ Su nighondiyo man kandin to Hirusalim to timpu to kohulogan pogligad to Magbabayjo hoy nigkita rin mando kandan tibo to inpangimo ni Hisus diyo. ⁴⁶ Si Hisus niglibod diyo to kana no sakop to Galiliya, ka ingod nu nighimuwan din to binu no ligkat to woyig. No dutun, duon sagboka no opisyal to gubirno nu naraluwan ka lukos no anak din diyo to kapirnaum. ⁴⁷ To pogkarinog din no niglibod si Hisus diyo to Galiliya ligkat to Hudiya, nigdagdagow kandin nighondiyo ki Hisus no nigpohoy-u-hoy-u kandin no nig hondiyo to Kapirnaum oyjow og hawbion ka anak din no ogkabigtawban on. ⁴⁸ Nigkagiyan kandin ni Hisus, "hoy rog palintutu kanak kag makakita kow pad to palinnow hoy mo kabolbolongan no noyimo. ⁴⁹ Di nigtabak ka upisyal, "Agalon duma kow pad bag kanak to ko pad ogkabigtawan ka anak ko" ⁵⁰ Si Hisus nigtabak kandin" Uli kad on sug koulian on ka anak nu" ka upisyal nigpalintutuu to lalag ni Hisus diyo to kandin, no nig-uli on kandin. ⁵¹ Tog pagindalan pad kandin, intimo kandin to mo suluguonon din hoy nigpangguguran, "Manokal o ka anak nu" ⁵² kandin nig-inso ko nokoy no oras nog kabaluan ka anak din ka mo suluguonon nigtabak, "Inliwbanan o kandin gabii to ala una to maapon" ⁵³ No nasoman soman to upisyal no sikan iyan no urusa ka pogkagi ni Hisus nog koulian o ka anak din. Di nigpalintutuu kandin tibo so mataltalaanak ki Hisus. ⁵⁴ Sika ka igkarangob nog kabolbolongan no nighimo ni Hisus to poghinguma rin diyo to Galiliya ligkat to Hudiya.