¹ Nanginso ka mo agalon to pari ki Istiban, tutu-u buwa soin?" ² Hoy nigtabak si Istiban, “Mo sulod hoy mo ginikanan! Paminog kow kanak! Ka Diyus no gamhanan nigpakita ki Abraham tagood nig ugpo kandin diyo to Misopotamiya, no waro pad nig ugpo kandin diyo to Haran. ³ Ka Diyus migkagiyan kandin, 'Ongkori niyu ka baloy no hoy kag nig upaan now hoy hondiyo ka to tano no igpakita ko koykow.” ⁴ No nig awo kandin to sikan no tano to Caldiya hoy mighalin nig-ugpo diyo to Haran. To pogkamatoy dot Amoy ni Anbraham, pigpahalin to Diyus ipa ugpo kayi to in ugpoan now kuntoon. ⁵ Waro bogayji si Abraham to Diyus to soini no tano no duon kandin no bayin agad ogkadiokan to kandin no mo paa. Di nigsaad ka Diyus no soini igbogoy kandin hoy og kaabin din hoy to mo kabuwaran din. To timpu no nigsaad to soini, si Abraham waro pad anak anak. ⁶ Iya soini ka inkagi to Diyus kandin, 'Ka mo kabuwaran no og-ugpo to loin no nasod no og koymo kandan no mo uripon hoy og doogdoogon kandan solo to 400 no tuig. Di ⁷ og baybajaran ka mo otow no og alagaran dan hoy mang-awo kandan to sikan no nasud hoy og simba kanak kayi to soini.' ⁸ Hoy insugu to Diyus si Abraham to poghinang to sirimonyas to pogtuli to pogtimaan to mo kasabutan din. Hoy pigtuli ni Abraham si Isaak to igkawalo no aldow to in anak kandin. Pigtuli da-an ni Isaak si Hakub, hoy pigtuli ni Hakub ka 12 no patriyarka. ⁹ Nigsinahan ni Husi to mo patriyarka hoy inbaligya kandin no uripon diyo to Ihiptu. Di ka Diyus nigduma kandin. ¹⁰ Hoy nigluwas ligkat to mo kalisod din. Nig atubang si Husi ki paraon, ka hari to Ihiptu, pigbugayjan kandin to Diyus to makapoholo no batasan hoy ogkatagaan. Si Husi pighimo ni paraon no gubirnadur to lungsod hoy harianon no baloy. ¹¹ Hoy duon bitil to sikan no ugpaan diyo to Ihiptu hoy Canaan no nakabogoy to mo otow to kalisod. ¹² Hoy ka mo kabuybujaygan ta waro’g kangakoon. Nataga si Hakub no duon trigo diyo to Ihiptu, pigpohondiyo din ka mo kabuybuyjagan, soikan pad iyan mokohondiyo hoy nokolooy to Ihiptu. ¹³ To igkarangob dan to poghondiyo, nigpoila si Husi to mo sulod din hoy nailaan ni Paraon ka mo sulod din. ¹⁴ Koy na-an inhitaga ni Husi ka amoy rin no si Hakub, hoy pigpohondiyo kandin hoy ka gipulon din, diyo to Ihiptu 75 kandan tibo. ¹⁵ Hoy nighondiyo si Hakub to Ihiptu to so ikan diyo kandin hoy ka mo kabuybuyjagan og kangamatoy. ¹⁶ Ka mo lawa ran inbalhin diyu to Sikim dow piglobong kandan diyo to pinalit ni Abraham ligkat to gipulon ni Hamor. ¹⁷ To maranion ka timpu no og tumanon on to Diyus ka saad din ki Abraham, nigmamalagoy ka mo otow ta diyo to Ihiptu. ¹⁸ Hoy duon nigsoip no og hari to ihiptu no waro mokoila ki Husi. ¹⁹ Pig ubatan din ka mo otow hoy pigdaog daog ka mo kabuybuyjagan hoy inpamogos kandan no og og-ongkoran dan kag manuso pad no bato diyo to linbwasan oyjow og kangamatoy. ²⁰ To soikan no timpu no otow si Muysis, sagboka no bato no holo-an to Diyus. Solod to tatulo no bulan, intanol kandin duon to baloy ran. ²¹ Hoy to soikan nig ongkoran kandin diyo to libuwasan, in uyjamo kandin hoy in ay-ayjaran dot anak no buyi ni paraon. ²² Pig-anad si Muysis to mo Ihiptohanon to tibo no kaalam hoy nabantugan kandan to mo himuwon hoy to mo lalagon. ²³ Hoy to nig ka-aptan on no tuig si Muysis, nigmaan maan kandin to mo kaarumaan, ka mo Israilita. ²⁴ To pogkakita rin dot duma rin no pigpahisakitan to duma to Ihiptuhanon, nigpangabang kandin hoy pigpanghimatayjan din ka Ihiptuhanon. ²⁵ (Nig-iman-iman si Muysis no ka mo karumaan din makasabot no og gamiton to Diyus to pogluwas kandan, di waro kandan makasabot.) ²⁶ To igkarangob no aldow nakita rin ka daruwa no Israilita no nig poun-unayoy nigpatiyan din no og husayjonj kandan, migkagi kandin, 'Mo tagasulod kow, no maniyo to mo on-onaoy kow? ²⁷ Di ka otow no nighisakit dot duma rin in asiko si Muysis hoy migkagi, 'Hontow ka nighimu no pangulu hoy talaghukum kanami? ²⁸ Himatayjan ano iling to poghimatoy no to Ihiptohanon gabii?' ²⁹ To pogkarinog ni Muysis to soini, nig awo kandin hoy diyo nig-ugpo to tano to Midian. Diyo nakabuwad kandin to daruwa no anak no lukos. ³⁰ Poglaboy to kap-atan no tuig, sagboka no Diwata no nigpakita ki Muysis diyo to nigkalablab no hapuy diyo tOo sapinit, to holholawan dani to bubungan to sinai. ³¹ Nabulongbolong si Muysis dot nakita rin hoy nigdalapak kandan dot sapinit oyjow susiyon din soikan. Di nakarinog kandin to lagong to Magbabayja no nigkagi, ³² 'Kanak ka Diyus to mo kabuybuyjagan no ka Diyus ni Abraham, ni Isaak hoy ni Hakub.’ Nangolkol to kahaldok si Muysis hoy waro kandin nig amol nigpitow. ³³ Hoy pigkagiyan kandin to Magbabayjo, “Luunga no ka sandal no, su balaan ka dapit no nigsasindogan no. ³⁴ Nakita ko ka malogon no pog aguwanta to kaot-otawan diyo to Ihiptu, 'Hoy narinog ko ka alohoyjan dan hoy soini a oyjow pogluwas kandan. Koy na-an dalapak ka kayi so igpohondiyo ko koykow diyo to Ihiptu.’ ³⁵ Iyan soini ka Muysis no in balagad to kaot-otawan to Israil hoy ka pigkagiyan dan, hontow ka nihimo koykow no pangulu hoy katalaghukum kanami? Kandin ka in pohondini to Diyus iliing no agalon hoy manluluwas. Nigpangabangan to mo anghil no nakita rin diyo to nigkalabkalab no hapuy diyo to sapinit. ³⁶ Kandin ka nigpangulu to mo kaot-otawan to pog awo dan to Ihiptu hoy nighimo kandin to mo kabulonganan diyo to ihiptu, to dagat no malalab hoy to holholawan solod to kap-atan no tuig. ³⁷ Kandin ka Muysis nigkagi to kaot-otawan to Israil, ‘Ka Diyus no nigpohondiyan kow to mo purupita ligkat to mo kaot-otawan iling kandin no nigpohondini kanak.' ³⁸ Kandin ka nigduma to mo kaot-otawan to Israil no niglilimud diyo to holholawan; diyo kandin duma rin ka mo kabuybujaygan hoy to mo anghil no nig-alukuy kandin diyo to bubungan to Sinai nakarawat kandin ligkat to Diyus hoy ka buhi no lalagon oyjow igpanig kanta. ³⁹ Di waro nigsunud ka mo kabuybuyjagan to kandin, pigbalagad dan kandin hoy ima ran poron nog malibod diyo to Ihiptu. ⁴⁰ Koy na-an nigkagi kandan ki Aaron, “Himowi koy to diyus-diyus no iyan og hun-a kanami, so waro koy nataga ko nokoy kag kahitabu to su oyjow Muysis no nigduma kanami ligkat to Ihiptu.’ ⁴¹ Koy na-an nangimo kandan to diyus-diyus iling to langlangowan to nati no baka hoy pighalaran dan soini, hoy nigmanggagastu kandan oyjow to pogdayjan to soini. ⁴² Di nig-ongkoran kandan to Diyus hoy pigpasadaan kandan no ogsimba to mo bituon to kalangitan, sumalo to mo basahon to purupita. Mo otow to Israil! Kono no kanak ka pig iyawan now hoy pighalaran to mo ayjam solod to kap-atan no tuig diyo to hulhulawan. ⁴³ Ka pig-alap now iyan ka pinayjag to diyus-diyus no si Molic hoyka langlanguwan to mo bituon to diyus-diyus no si Ripan; kandan ka mo diyus-diyus no pighimo now oyjow og simbahon. Koy na-an balagaran kud kaniyo ko og uriponon kow agad diyo pad to kahunnaan to Babilunya.’ ⁴⁴ Diyo to holoholawan kamo kabuybujaygan nigmang pipinayjag oyjow kamo otow og duon ogtomo to Magbabayja. Inhimo soini ni Muysis sumalo to nakita rin no inpakita to Diyus kandin. ⁴⁵ Hoy in-alap soini to mo kabuybujaygan no nakarawat to pinayjag ligkat to mo ginikanan dan, to pogluyjod dan ki Husi hoy to pog-agow ran to mo tano to mo otow no duon pigdoldol to Diyus diyo to tangkaan dan. Hoy kamo pinayjag duon dod iyan hangtud to panahon ni Dabid. Si ⁴⁶ Dabid naoloan to Diyus hoy mighangyu ka Diyus no og papos-ok to baloy alang to Diyus ni Hakub. ⁴⁷ Di si Sulumun iyan kan nighimu to baloy to Magbabayja. ⁴⁸ Koy naan ka maroson ni Magbabayja waro nig-ugpo to baloy no inhimu ro to mo otow, su kagi pa to mo purupita: ⁴⁹ Ka langit iyan ka turunu ko, nigkagi ka Magbabayja, hoy ka tano iya giokanan ko.’ Nokoy buwa no baloy ka igpus-ok alang kanak? Hondoi man ka dapit no og himoloyjan ko? ⁵⁰ Kanak man ka nighimo to soin tibo?' ⁵¹ Amana kono kow og maminog! Maniyo to kono kow ogmaminog to lalagon to Diyus! Iling kow rod iyan dot mo kabuybuyjagan now: Waro now sunora ka Ispiritu Santu! Duon buwa purupita no waro ul-ulangi to mo kabuybuyjagan now? ⁵² Pighimatayjan now ka mo sinugu to Diyus no nahun-a nigpangmaan to poghondini to matularong din no sulugoonon. Hoy piglubusan now tog himatayjan. ⁵³ Kaniyo ka nakarawat to kasugoan to Diyus no inbugoy to mo Diwata di waro now tumana soin!” ⁵⁴ Tagood naminog ka mo sakup to labow to hukumanan ki Istiban, nigmangitol on to amana no kabolo dan kandin. ⁵⁵ Di si Istiban no napuno to Ispiritu Santu, niglongag to langit hoy nakita rin ka karoyjawan to Diyus hoy si Hisus no nigsasindog diyo to kawanan to Diyus. ⁵⁶ Mig-ikagi si Istiban, "Pitawa ka langit no natukasan hoy ka Anak to Otow no nigsasindog to kawanan to Diyus.” ⁵⁷ Di nangulaloy kandan hoy nangsasapong to mo talinga ran hoy nigmandorongan tog dasmag kandin. ⁵⁸ Hoy inganoy ran kandin diyo to libwasan to siyudad hoy inpangbanggalan to bato. Hoy pigpabantayjan to mo tis tigus ka mo lumbong dan dot sagboka no balubato no pigngaranan to Saulu. ⁵⁹ Hoy tago-od no nigpamanggal dan to bato si Istiban, nig-ampu kandin diyo to Magbabayjo no nigkagi, “Magbabayjo no si Hisus, dawata nu ka Ispiritu ko.” ⁶⁰ Hoy nigpaniklood kandin hoy nigpangiyak to mahagbot, "Magbabayjo! Kona no bag kandan pakasalo-a to pighimo ran!” Pogkaponga rin tog kagi to soini namatoy kandin. In oyjonan ni Saulu no og himatayjan si Istiban.