¹ To waro malogoy, tago-od ananoy on ogdakol ka mo tinuonan, nakog-ogot ka mo lumad no Hudiyu hoy ka mo Hudiyu no Griyigo ka kagihunon. Ka mo Hudiyu no Grigu ka kagihunon nigkagi no ka kandan no mo balu waro bugayji to kandan bahin to kada aldow bohin-bohin. ² Koy na-an inlimod to 12 no apostulis ka tibo’n tinuonan hoy nigkagiyan, “Kono no maroyjow nog amaniyon doy ka pogtanol to pogbahin-bahin to inaldow panginaanglan. So to pogsaysay to batbatonon to Diyus. ³ Koy naan, mo suwod, alam kow to pito no otow ligkat kaniyo nog kasaligan, ogkaponu to Ispiritu Santu hoy to kayibalo hoy bugayjan doy kandin to hinangonon. ⁴ To soin paagiha makagohin koy to tibuok no panahon to pog-ampu hoy to pogpamatbat." ⁵ Ka tibuuk no panon naliyag to nigpangagi to mo apustulis, koy na-an inpili dan si Istiban no naponu to pogtu-u hoy to Spiritu Santu, hoy si Pilipi, si Procoro si Nicanor, si Timo, si Parminas hoy si Nicolas no taga-Antioquia no nahinggat to pogka Hudiyu. ⁶ Hoy in-alap kandan diyo to mo apustulis hoy ka mo apustulis nig-ampu hoy indampo dan ka mo bulad diyo’t kandan. ⁷ Koy na-an inparayjon nigtangkap ka batbatonon to Diyus ka mo tinuonan diyo to Hirusalim nig ananoy nigdakol hoy mohon-in aman ka mo pari no nigtuu. ⁸ Si Istiban, sagboka no otow no napono to garasya hoy to goom, nighinang to dakol no mo kabulunganan hoy mo butang no koin-inuwan diyo to tangkaan to mo otow. ⁹ Di duon mo otow no og ato hoy nigpakig-apol kandin. Ka duma kandan mo Hudiyu no taga-Sirini hoy Alihandru no sakup to Sinaguga no in ngaranan to mo otow no waro labot, hoy ka duma taga Cilicia hoy Asya. Hoini no mo otow nakig-apul ki Istiban. ¹⁰ Di si Istiban napono to Ispiritu hoy kayibalu hoy tongod to soini waro kandin maraog to pogpakig-apul. ¹¹ Koy na-an to holos nigbayjad kandan to mo otow oyjow to pogkagi, “Nakadinog koy kandin no nigpasipaa ki Muysis hoy to Diyus!” ¹² Tongod to sooyjo nagubut ka mo otow hoy ka mo agalon to timpulu hoy ka mo talagpanulu to balaud. No indakup dan on si Istiban hoy in alap dan diyo to labow’n logparanan. ¹³ No inpaatubaang dan ka pila no mo otow oyjow pogsaksi hoy ubat diyo’t kandin. Nigkagi kandan, ‘ Soinin otow layjun nigpahisakit to kanta’n balaan timpulu hoy ka balaud ni Muysis. ¹⁴ Nadinog doy no nigkagi kandin no soini’n Hisus no Nasaritnon og guguson din ka timpulu hoy og usabon din ka mo tulumanon no inbilin ni Muysis kanta. ¹⁵ Ka tibo’n mo sakup to labow’n logparanan nigtongtong ki Istiban hoy napitow ran no ka langlangowan din naangod to langlangowan to sagboka no Diwata.