¹ To sikan no aldow nigsugud ka masakit no pogbajadbajad diyo to Iglisia to Hirusalim. Ka tibo no mo tumutuo, waro labot to mo tinuonan hoy nokog suwoy-suwoy to lalawigan to Hudiya dow to Samariya. ² Inlobong si Istiban to pilapila no mo otow no diosnon, dow amani on iyan kandan nanatalong tongod to kandin no kamatayjon. ³ To loin no boyin naniguro si Saulu poglalag to Iglisia; Inpanilu din ka mo kara baloy dow in panakop ka mo matinuuwon, lukos dow boyi dow inpasolod din diyo to pirisohan. ⁴ Ka mo migtuu no nonokog suwoy-suwoy nangondiyo to nigkoloin-loin no ogpaan nigpanulu to maroyjow no lalag. ⁵ Nighondiyo si Filipi to sagbokan siyudad to Samariya dow diyo inlalagan din ka mo otow mohitongod to Misiyas. ⁶ Nigsagboka ka mo otow to pogpamminog to in lalag ni Filipi to diyo no nakarinog kandan kandin dow nakakita to mo nabolbolongan no kandin inhimo. ⁷ Nangawwo ka mo yawa diyo to mohon-in no mo otow dow nanggiyak to maagbot, dow mohon-in daan ka mo paralitiko dow mo pogkot no nono ulian. ⁸ Nokoy naan nonoholo amani ka tibo no Samariya. ⁹ To sikan no lunsud duon nig-ugpo no sagbokan otow no nig ngaranan ki Simon no nohun-a nakapabolong bolong to mo Samaryahanon tongod to kandin no salamangka. Nigparinog no kandin ka gahomanon. ¹⁰ Dow ka tibo no mo otow to siyudad, ligkat to tibon sakop to katilingban nigtuoo kandin. ¹¹ Nigkagi kandan, "Kandin ka goom to Diyos no nig-ommow dow ka dakol no gahom." Dow so to malugoy lugoy on panahon nakapabolong bolong kandin kandan gamit ka kandin ni salamangka, nigtoo kandan kandin. ¹² Di to diyo no nigdawwat on kandan to lalag ni Filipi mohitongod to Maroyjow no lalag to gingharian to Diyos to ngaran ni Hisu-Kristu, kandan mo lukos dow boyi, in buyagan. ¹³ Si Simun daan nigtuo dow human kandin bunyagi nigduma duma kandin ki Filipi dow nabolong bolong to pogkakita din to dakol no mo kabol bolongan dow ka maroyjow no nigbuwat din. ¹⁴ Ka mgo tinuonan no diyo to Hirusalim nakadinog no ka taga Samaria nakagongon to pulong to Diyos, nokoy naan ka inpaalap si Pidru dow si Juan diyo to kandan. ¹⁵ To pogko-uma dan, nig panubad kandan no ka mo mogtutuu no makadawwat poron to Ispiritu Santu. ¹⁶ Su ka Ispiritu Santu waro pad man nig konsad inggad sagboka to kandan; nabunyagan do kandan to ngaran to Magbabayja. ¹⁷ Si Pidru dow si Juan nig-olot kandan to bolad dow nakadawwat kandan to Ispiritu Santu. ¹⁸ Nigkita ni Simun no nakadawwat ka mgo otow to Ispiritu Santu diyo no nig-olotan kandan to mo bolad to tinuonan. Nokoynaan ka nigbogaybogayjan din to salapi si Pidru dow si Juan. ¹⁹ Dow in ilingan, "Bogayji a daan to soin goom oyjow ka tibo no nig-olotan kot bolad makadawwat to Ispiritu Santu" ²⁰ Dow si Pidru nigtabak kandin, "Ogkaalap ka poron duma to koykown salapi tongod to koykow no nohonhonaan no og kapalit no ka gasa to Magbabayjo! ²¹ Kono kag makaambit to soini no hininang so konon matarong ka koykow no kasingkasing to tangkaan to Magbabayja. ²² Nokoynaan ka hinolsoli soi so maroot non hinang dow panawagtawag no mapasaylo ka to Magbabayja tongod to koykow no poghonahona to iling. ²³ So kanak no namaanan no nasina ka amani dow no uripon to salo. ²⁴ Si Simun nigkagi ki Pidru dow ki Juan, "I-apil a now to panawagtawag now to Magbabayjo oyjow konog kohitabo ka kaniyo no inkagi kanak." ²⁵ Nakaponga kandan to pogbogoy to pogpamatuud dow makatudlu to lalag to Magbabayja, nanliko to Hirusalim si Pidru dow si Juan. Dow inpannangon dan ka maroyjow to mohon-in no banwa to Samaria no kandan no nigbayjaan. ²⁶ Duon sagboka no diwwata to Magbabayja no nig kagi ki Filipi, "Hipanow ka diyo to habagatan. Diyo to dalan no ligkat to Hirusalim poiling to Gasa. (soini no dalan warad nagamit.) Nokoynaan nighipanow si Filipi. ²⁷ To sikan no panahon duon sagboka no Yunuku no taga-Itiopa no nighipanow no nig hipanow poiling to kandan. ²⁸ Kandin sagboka nighondiyo kandin to Hirusalim oyjow og simba to Magbabayja, dow to kandin no pog-uli no nig sakoy to karwahi, nigbasa kandin to basahon no sinulat ni Propita Isaias. ²⁹ Ka Ispiritu santo nigkagi ki Filipi, "Hondiyo-i dow alapa ka karwahi." ³⁰ Nokoynaan ka nig palaguy si Filipi diyo to kandin dow narinog din ka Yunuku no nig basa to basahon no sinulat propita Isaias. Dow nanginso si Filipi kandin, "Nasabut no ba kain basa nu?" ³¹ Ka opisyal nigtabak, ogmonowon kod tog sabot soini ko warad og anad kanak? Dow inpasakoy si Filipi to karwahi dow inpapinnu-u to longod din. ³² Soini ka bohin to kasulatan no nigbasa din: "Nigpokoiling kandin to karniru oyjow og iyawwon, nigpokoiling to nati no karniro no konad iyag makakagi to panahon nog alutan. Waro din nakagi inggad sagboka no lalag. ³³ Nigpohisiporan kandin dow in sokol to hustisya waro og mokoikol to kandin kaliwatan, so ka kandin no kinabuhi dini to tano napongo on man." ³⁴ Ka upisyal nigkagi ki Filipi, "Kagihi a ko hontow kang hisgutan to propita to soin bohin to kasulatan. Ka kandin buwa no kougalingon dow loin buwa?" ³⁵ Nokoynaan ka nig saysayjan kandin ni Filipi to Maroyjow no lalag mohitungod ki Hisus to sugud to soin bohin to kasulatan. ³⁶ Dow tagood no nighipanow kandan nokouma kandan to sagboka no dapit no duon woyig, dow ka upisyal nigkagi, "Soini duon woyig, maniyo to kono a no og bunyagan?" ³⁷ (Ka maroyjow no kupiya to kasulatan in-awo) Migkagi si Filipi," Ko migtuu ka tibuok now no pusung, bunjagan ko ikow." Migtabak ka upisyal, "Migtuu a ki Hisu-Kristu no Anak to Magbabayja." ³⁸ Nokoynaan inpohonong to upisyal ka karwahi dow kandan daruwa lono dow nigsonob dot woyig, dow in bunjagan kandin ni Filipi. ³⁹ To poglogsad dan to woyig, ka Ispiritu to Magbabayja miggambis ki Filipi dow warad kandin nakita du to upisyal. Di ka opisyal nigparayjon to kandin no hipanow no malipayjon amani. ⁴⁰ Duon duon namaan si Filipi no diyo to Azutus to dow nigpanulo kandin to Maroyjow no lalag to tibo lungsud hangtod nokouma kandin to Cesarea.