¹ No nigligad si Pablu hoy si Silas to Ampipulis hoy to Apolonia, hoy naka-uma kandan to Tesalonica. Diyo duon sagboka no sinaguga to mo Hudiyu hoy nighondiyo si Pablu. ² Sumalo to kandin batasan. Solod to tatulo no aldow'ng igpapahulay nakig-apul kandin diyo to mo otow pinabayjo to kasulatan ³ Hoy inpasabot din hoy intitigusan diyo't kandan no ka Misiyas kinaanglan iyan nog-antus hoy kaoyjag. Nigkagi kandin "Soinin Hisus no inpamatbat ko kaniyu iyan ka Misiyas." ⁴ Naduma hoy nig-amot ki Pablu hoy ki Silas ka pila to mo Hudiyu duma ka mo mohon-in Griyigo no nigtuu to Diyos hoy pila no inila no mo bohi. ⁵ Di noima ka mo Hudiyu hoy inhimu dan ka mo buguy no ogman-uugpo daplin to daan oyjow og hinang to kasamuk, no ingubot dan ka tibuuk siyudad hoy insulung ka baloy ni Jason to tuyu no mapitow ran si Pablu hoy si Silas oyjow ogpaatubangon to mo otow. ⁶ Di waro man kandan napitow in-alap dan si Jason hoy ka pila no mo karumaan din diyo to mo agalon to siyudad. Nangiyak kandan, "Soinin mo otowa nighinang to kasamuk agad hondoi kandan hondiyo hoy soini kuntoon kandan to siyudad ta. ⁷ Hoy inpo-ogpo kandan ni Jason to baloy din. Tibo kandan nigsupak to balaod to Impiradur hoy nigkagi kandan no duon loin hari no in ngaranan ki Hisus" ⁸ Nasaboka ka mo otow hoy ka mo agalon to siyudad to pogkadinog dan to soini. ⁹ Pogkaponga nalagoyji to piyansa si Jason hoy ka mo duma rin, insabukan dan kandan. ¹⁰ To pogkamarusilom to sikan, inpahipanow ka mo karumaan si Pablo ug si Silas diyo to Bereya hoy to pog-uma dan diyo nighundiyo kandan to sinagoga to mo Hudiyo. ¹¹ Mas abli ka pogsuman-suman to mo otow diyo kuno to taga Tesalonica. Maparayjonon amana kandan naminog to maroyjow no balita hoy nig-aanad kandan to kasulatan kara aldow oyjow pogpamatuod ko tutu-u iyan soinin mo butanga. ¹² Mohon-in kandana ka nigtuo apil ka mohon-in no mo malitan no Grego ni inila to katilingban hoy ka mo lukos daan. ¹³ Di to pogkarinog to mo Hudiyo diyo to tesalonica nu nigpamatbat daan si Pablo to lalagon to Diyos diyo to Berea, nangondiyo daaan kandan hoy nighagasan ka mo otow oyjow to poghinang to kasamok. ¹⁴ Koynaan inpahipanow dayjon to mo karumaan si Pablo pohondiyo to baybayon di si Silas hoy si Timotio nig pa ongkod diyo to Berea. ¹⁵ Ka mo otow no nighatod ni Pablo nigduma kandin taman to siyudad to Atenas no nanlibod kandan to Berea tuma to tugon ni Pablo no ogpalupugon si Silas hoy si Timotiyo to magaan. ¹⁶ Diyo to Atenas tago-od si Pablo nigtatagad ki Silas hoy kiTimotiyo, nalinog amana ka hunahuna to pogkapitow din to siyudad no nalugob to mo diyos-diyos. ¹⁷ Koynaan nakig-apol kandin to mo Hudiyo diyo to sinagoga hoy to mo kunon Hudiyo nu nigtuo to diyos hoy ka mo otow nu ogmangondiyo to palasa kara aldow. ¹⁸ Pila no mu mag-aanad nu Epikureo hoy Estoiko nakig-apol dan kandan ka duma kandan nigkagi "Nukoy ka buot pasabot to soini ignoranti no tigbal dog patutu-u no maalam?" ka duma nigkagi mando, "No nighisgot kandin mayitungod to mo diyos to loin mu nasod" Inkagi dan soi tungod so namatbat man si Pablo mayitungod ki Hisus to pogkaoyjag. ¹⁹ Koynaan in-alap si Pablo to tangkaan to tapok to konseho to Areopago hoy nigkagi kandan "Buot koy no ogkatagaan soini bag-on pagtulon-an nu inhisgutan nu. ²⁰ Pila to inpangagi no nakapo-inu-inu kanami hoy buot doy nog katagaan ka kuhulogan to soini. ²¹ So ka tibo no taga-Atenas hoy ka mo lumaag nu nig-ugpo diyo ogkaliyag amana nog sasabot sabot ug mamminog to mo bag-ong pogtulun-an. ²² No si Pablo nigsasindog to tangkaan to konseho to Areopago hoy nigkagi "Mo taga-atenas! napitow ko kaniyo no relihiyoso amana. ²³ So ka kanak no pog lu-og to kaniyon siyudad napitow ko ka mo dapit nu insimbahan now hoy napitow ko daan ka lantawan nu inkudlitan to soining mu ikagiyon, 'Para to Diyos no waro matagahi. 'Ka insimba now agad waro now matagahi iyan kuntoon ka inpaila ko kaniyo. ²⁴ Ka Diyos no nighinang to kalibutan hoy ka tibo no kayi iyan ka Magbabayjo to langit hoy to tano hoy waro nig-ugpo to mu timpulu no hinimo to mo otow. ²⁵ No waro daan kandin nigkinaanglan to agad nukoy ligkat to otow so kandin iyan ka nigbugoy to kinabuhi to otow hoy to tibon butang. ²⁶ Ligkat to sagboka no otow inhimo rin ka tibon kabuwaran to kaotawan hoy inpa-ugpo kandan to tibuok ingod. Intagana din on ka panahon hoy ka mo tamanan to mo dapit no kandan ugpaan. ²⁷ Oyjow namitow kandan atok mapitow dan kandin di ka tutuo no ka Diyos kunon mariyo kanta. ²⁸ So diyo to kandin no kanta duon kinabuhi hoy nig-woil hoy nayimo no otow. Iling to inkagi to mo Magbabalak, mo anak ki kandin. ²⁹ Hoy so mu anak ki man to diyos, kuno ta og sumsumanon no ka diyos iling to langlangowan to larawan nu bulawon hoy palata hoy bato nu inpatik pinabayjo to kapaid to otow. ³⁰ Warod sum-sumana to diyos ka panahon to pogka ignoranti now di kuntoon insugo din ka tibo nu otow to pogdurumdurum to salo. ³¹ So nigbabalintos kandin to pila nu aldow nu oglogpangan din ka tibo nu ingod pinabayjo to Hustisya to mo otow nu inpili din. Hoy intitigosan din soin diyo to tibo no mo otow piinabayjo to pogkaoyjag din. ³² To pogkarinog dan no si Pablo nigkagi mayitungod to pogkaoyjag duon mo otow no nig lian-lian kandin. Di ka duma nigkagi, "Ogkaliyag koy nogpaminog koykow mayitungod to sikan. ³³ Nig ungkod si Pablo to limuranan. Di duon mo otow no nig-amot kandin hoy nigtuo. ³⁴ Ka sagboka to kandan iyan si Dionisyo no sakop to konseho to Areopago iling man ka sagboka nu malitan nu si Damaris hoy ka duma pad.