¹ To katapusan, mo sulod, natuuwan now ligkat kanami ka pogkinabuwi no nakapaholo to Diyus hoy anat to soin ka pogkinabuwi now. Kuntoon, to ngaran to Magbabayjo no si Hisus, noholo koy hoy nighanggat kaniyu to pogkinabuwi hoy amana pad no mokoholo to Diyus. ² Su natagahan now on man ka inpanangon kaniyu to ngaran to Magbabayjo no si Hisus. ³ Kaliyag ka Diyus no ogparoyjow kow pinabayjo to malogot no pogsimong to imuralidad. ⁴ Kaniyu no lukos lumanan kow no ogkataga ko ogmonuwon now to ogpakigduma to asawa now pinabayjo to balaan hoy mabantogon. ⁵ Hoy kono no hinanggat to kulag anat to in himo to mo otow no waro nigtuu to Diyus. ⁶ Koy naan ka kono now pohimulusi hoy dioki ka katongod to anat now no otow to soini no butanga nignangonan kow noy on nohun–a no ka oghimu to soini oglogparan to Magbabayjo. ⁷ ka Diyus waro nig–umow kanta oyjow og–ugpu ki to salo ko kono ogkinabuwi ki no balaan. ⁸ Koynaan ka kono ogtuu to soin no katounan waro nigtuu to otow ko kono iyan ka Diyus no iyan nigbogoy kaniyu to Ispiritu Santu. ⁹ Konad no kinangolan no ogsulat a pad kaniyu moyitongod to pogdakol to goyinawa to anat now no tumutuu su kaniyu nigpanulu on to Diyus to pogdinakolay to goyinawa. ¹⁰ Su iyan soin ka inhimu now to mo kasuloran now to tibo no Masidunya, koy naan, mo sulod, ogholo koy kaniyu no ogdayjonan now ka pagkoinit to pogdinakolay now to goyinawa. ¹¹ panamantamani now no ogkinabuwi kow to kalinaw, kono kow pangobil to loin hoy kono kow salig to duma oyjow to pogpanginabuhi now sumalo to inkagi noy kaniyu. ¹² To soini pinabayjo ogtahuron kow agad ka kono no tumutuu hoy kono kow on ogkatalong anat do to otow no waro poglaum. ¹³ No kuntoon mo sulod, ogkaliyag koy no ogkatahaan niyu ko nokoy iya ka ogkoula-ula to sooyjo so nonammatoy on, oyjow kono kow oglungku iling to mo otow no waro ogtatagaran. ¹⁴ Kanta nigtuu no si Hisus nammatoy hoy nigbaton. Koy naan ka tongod ki Hisus ogbatonon hoy ogdumahon to Diyus ka nammatoy no nigtuu ki Hisus. ¹⁵ Ka katounan to Magbabayjo no inpanulu noy kaniyu iyan soin kanta no manokal pad to poglibod to Magbabayjo kono oghun–a to nanammatoy on. ¹⁶ Hoy naguran ka pogpangiyak hoy ka lagong to Arkanghil hoy ka lanog to turumpita hoy oglono ka Diyu puun to langit iyan hun–a batonon do to nammatoy no nigtuu ki Kiristu. ¹⁷ Hoy kanta no manokal pad to sikan no aldow. Batonon ki duma kandan diyo to mo gabun oyjow ogtomu to Magbabayjo. ¹⁸ Parandonsogoy kow tongod to soin no pogpanulu.