¹ – ² Di ko kono doy on ogkaantus ka pogkoipong noy kaniyu, nakasumansuman koy no ta poondiyo doy si Timutiyu, su kanami , igpahundiya dow kandin diyo to Atinas, su kandin ka sulod to woy sulugoonon mando do Magbabayjo woy tiglalag to lalagon to Magbabayjo moyitongod ki Kiristu. Poondiyoon doy kandin to kaniyu oyjow ogparoson to pogtuu now. ³ Oyjow waro sagboka kaniyu ka og–ongkod to pogtuu dow pad bayjad–bayjad to ula–ula ta. ⁴ Su agad dini koy pad to kaniyu, nataga kid iyan sikan. ⁵ Diko ko no ad ogpakaantus to koipong ku, inpahondiyo kud si Timutiyu oyjow ogkatagahan ku ka roson pad ka pogtuu now. Naipong a ko natintal kow on ni Moibulan woy kogimu no waro kasuutan to nahimu now. ⁶ Di nakalibod Timutiyu diyo to kaniyu, hoy maroyjow ka gun–gunon din kanami moyitongod to pogpalintutuu now woy to goyinawa now nigpanggugud kandin no layjun kow kon ogkaholo to sumansuman kanami dow ogkoupian kow no ogpakigkita kanami iling tuig koupii noy. ⁷ No sikan naan mongo solod, agad mabogat ka prublima noy di og–antuson noy nabaghot koy nod to pogpalintutuu niyu. ⁸ No kuntoon, nakapalono-lono on ka goyinawa noy to nakatahaan noy no manokal rod ka pogpalintutuu niyu to Magbobayjo. ⁹ Kono no litos ka pogpasalamat woy to Magbabayjo dini to tongod to dakol no kaliyag mo inbogoy to Magbabayjo dini kanami tongod kaniyu. ¹⁰ Aldow woy marusilom nig–ampu koy to Magbabayjo no ogkitoon noy porom kaniyu, oyjow ogkatimulan pad ko nokoy ka kulang to pogpalintutuu now. ¹¹ Og–ampu koy no ogtugutan koy to mo Amoy ta no Magbabayjo no si Hisus no ogpokohondiyo koy poron to kaniyu. ¹² Poron oghugutan ka goyinawa now matag–sagboka to Magbabayjo hoy to tibo no otow iling kahugot to poggiyinawa noy kaniyu. ¹³ Oghugutan kow to Magbabayjo hoy oghinuwon kow no maroyjow hoy waro ta karow–uy diyo to tangkaan to Amoy ta no Magbabayjo to aldow to podlibod to Magbabayjo ta no si Hisus no oggumahan to tibo no otow to Magbabayjo.