¹ Mo sulod no nigtuu ki Kiristu, kaniyu no taga no dakol ka pulus to oghondiyan kaniyu. ² Natagahan now ka diyo koy pad to pilipus hoy gugupian koy dow inpasiporan. Hoy intalaran koy to Diyus hoy kabulut to pogkagi kaniyu to marayjow no lalag no puun kandin agad paddakut no to kono to kanami no nabayjaan. ³ To pogpanlalag noy kaniyu waro noy inpanulu kaniyu no sayjop, hoy oghimu koy maroot hoy og–uubat. ⁴ Di ka tutuu nakita to Diyus no ogkasaligan koy no ogpanulu to marayjow no lalagon, hoy soin iyan kanami no inhimu, kono oyjow ogka mo otow kanami ko kono oyjow ogkaliyag ka Diyus no ogkamaan to kanami no sumansuman. ⁵ Namaan kow no waro koy niggamit to mo pamulbolakan ka no mo lalagon oyjow kakabig kow, hoy waro koy nanulu oyjow panalapian kow. Ka Diyus mismu nigkita. ⁶ Waro koy nigtatagad hoy sa nigdayjan ligkat to mo otow, ligkat kaniyu hoy agad hontow. ⁷ Isip mo Apustulis ni Kristo, duon katongod noy no ogtatagad kaniyu to pogbulig hoy pogdayjan. Di amana no og–ay–ayjari to doun koy pad iling to sagboka no inoy no nig–atiaman to mo anak din. ⁸ Hoy tongod su dakol ka pog–olog noy kaniyu, kono no ka maroyjow no lalagon to Diyus ka inbugoy ku kaniyu, ko kono agad pad kanami no kinabuligi, so dakol ka pogoluynoy kaniyu. ⁹ Makadoromdom daan kaniyu no mo sulod no amana iyan ka pogkabontol noy duma to kaniyu. To duon to pogpanulu noy kaniyu to maroyjow no lalagon to Diyus, aldow hoy marusilom nighimu koy oyjow kono kow ogkabogatan to pog–atiman kanami. ¹⁰ Kaniyu nigkagiman ka Diyus kanami su saksi no ka kanami nohinang doun duma kaniyu no tumutuu no marayjow, matarong hoy waro igkasawyoy. ¹¹ Nataga kow no pogsima kanami to matag–sagboka kaniyu anat to pogsima to sagboka no amoy diyo to kandin no anak. ¹² Daral diyo sikaniyu hoy igparoson hoy inhang noy no og–ugpu no maroyjow to tangkaan to Diyus no inpili now no ogkohimu no og–ugpu to kandin no gingharian hoy kabantugan. ¹³ Kanunoy ki ogpasalamat to Diyus tongod to indawat now ka lalagon to Diyus no inpanlalag noy kaniyu, inpurut now soini kono iling no kandin to otow ko kono, kagi no iyan kandin to Diyus, hoy soin ka lalagon no padayjon no nighinang duon to kaniyu no nigtuu. ¹⁴ Su ka noyitabu kaniyu mo sulod, iling do to noyitabu to nigtuu to Diyus diyo to nigtuu ki Kiristu Hisus nig–antus hoy to pogbayjad to mo otow, iling do to pog–antus to pogbayjad–bayjad to mo duma ran no mo Hudiyu. ¹⁵ Ko mo Hudiyu ka niggimatoy to Magbabayjo no si Hisus hoy to mo purupita dongan to Diyus, hoy ka nigagawo kanami. Waro naholo ka Diyus to kandan no inhinang nakig–usig to tibo no mo otow. ¹⁶ Tongod su panamantaman dan no pugungan ka kanami no panulu to kono no Hudiyu bahin to lalagon to Diyus no ogpakaluwas kandan agad hantod kuntoon nigsamut pad ka pogsalu to Hudiyu. Doun intagana kandan no silut to Diyus. ¹⁷ Kuntoon mo sulod, kabahin kanami, inguran doy ka kasaput kaniyu, agad bag–u koy nokohondiyan. Waro koy nalingow kaniyu, su dakol ka kanami no insumansuman hoy iman to pogpakitaro naan kaniyu. ¹⁸ Kaliyag koy oglibod diya to kaniyu ilabi on kanak no si pablu, kono makasagboka a ro og–iman diya to kaniyu. Di waro koy nakadayjon so inbalabagan koy ni Satanas. ¹⁹ Kaliyag koy oglibod diyan tongod su kaniyu ka kahulonoy hoy ogsalig koy kaniyu. ²⁰ Su kaniyu ka kanami no galbu hoy kaholo.