¹ Mo sulod, konad no kinangolan no igsulat ku pad kaniyu ka kada ogkoyitabu soinin mo butang. ² Su kaniyu mismu nataga on no ka no libod to Magbabayjo anat to sagboka no takawon no nig–uma to marusilom. ³ Ogkoyitabu soin tagood ka waro nigtuu ogkagi, 'Maawang ka tibo hoy waro koin–inuwan.' Dinig hignali nighinguma kandan kaawo, koiling duon to malitan no ogbaliliton, hoy waro daan makahajo kandan. ⁴ Di kaniyu mo sulod, marusilom ka kaniyu mo sumansuman moyitongod to soin. Koy naan ko og–uma ka Magbobayjo no anat to pog–uma to sagboka no takawon, kono kow ogkatukow. ⁵ So kanta tibo tagaon to tutuo. Waro kid to karusilomi. ⁶ Koy naan kono tad ogsunuon ka duma no noyirogo, aman su ogkamata kow hoy ogpugung to hinang no kono no maroyjow. ⁷ Su ka mo otow no narusiloman waro nigkamata hoy ongod do oghirogo hoy oghubug–hubug. ⁸ Di tongod su nataga kid man, kamata kid hoy pogpugung to poghimu to kono no maroyjow. Gamiton to ka sumansuman pansagang to sosolobon to pogtuu ta to Diyus hoy ka kanta poggoyinawa to duma ta. Hoy gamiton ta ka sumansuman to pog–iman no maluwas ki to Diyus. ⁹ Su waro ki alama to Diyus oyjow pabaybayjaran ko kono oyjow maluwas to pagbayjad–bayjad pinabayjo ki Hisu–Kiristu no Magbobayjo ta. ¹⁰ Nammatoy kandin tongod kanta oyjow no agad ki nabulohuy namatoy to kandin no pog–ma, ugpu ki duma kandin. ¹¹ Hoy naan padayjon kow to pogpadardaraloy to matag–sagboka, anat to kaniyu no inhinang kuntoon. ¹² Kuntoon, mo sulod, nigholo a kaniyu no taworon now ka mo otow to Diyus no nig–alagad kaniyu. In–alam kandan to Magbabayjo no ogpanguu hoy ogpanulon kaniyo. ¹³ Koy naan tawora now kandan hoy iloga tongod to kandan no katungdanan. Ugpu kow no maroyjow kaniyu no pogdoruma to matag–sagboka. ¹⁴ Nigholo koy mando kaniyo no patahanan no ka mo puokon. Daralan now ka mayinaldokon hoy bulugi ka mo mallatoy to kandan no pogtuu. Hoy mapoilobon kow no kono kow ogbalus hoy maroot, ko kono ogpaniguro kow no oghimu to maroyjow no hinang to matag–sagbuka hoy diyo to tibo no mo otow. ¹⁵ Kono now panimalusi ka nighinang to maroot kaniyu, ko kono layjun niyu himuwa ka maroyjow to matag–sagboka hoy to tibo no otow. ¹⁶ Koholo kow layjun. ¹⁷ Ampu kow to tibo no panawon. ¹⁸ Hoy pasalamat kow agad nokoy ka og–uma kaniyu. Soin ka kabubut–on to Diyus no hinangon now to ngaran ni Kiristu Hisus. ¹⁹ Kono santaa ka hinang to Ispiritu Santu. ²⁰ Hoy kono now lilinyan na ka lalagon no ligkat to Diyus. ²¹ Louyja now ka tibo, sigurohi ka maroyjow. ²² Hoy likayji ka maroot. ²³ Hinaut poron no ka Magbobayjo no nigbogoy kanta to kaawang no nighimu kaniyu balaan oyjow waro ogkakitan igkasawoy to tibo now pogkootow, to Ispiritu, kalog hoy lawa hantod to pog–uma to Magbobayjo ta no si Hisu–Kiristu. ²⁴ Matinuowon ka nig–umow kaniyu hoy himuwon iyan soin. ²⁵ Mo sulod, ampu kow kanami. ²⁶ Pangamustaa ka tibo no mo sulod to pogkupkup no iling to tahasulod. ²⁷ To ngaran to Magbobayjo, nigholo a kaniyu kono basaa now soin no sulat diyo to tibo no mo sulod. ²⁸ Kaniyu ka garasya to kanta no Magbobayjo no Hisu–Kiristu.