¹ Pegkepenga niyan, doen menge Pariseo aw menge megtoladaay te punun lekat te Jerusalem nga megpadapeg ki Jesus aw neg-inse. ² "Ngalay se kamno Tinoladaan wada tolo te menge tulumanon te kini ta den kamonaan? Waded dan peg-onaw te kandan menge belad ona dan komaen." ³ Pigtaba dan i Jesus, "Kenyo heman, ngalay piglapas niyo se punun te Timanem tongod te pegtolo niyo kenyan nga menge tolomanon? ⁴ Key minikagi se Timanem, 'Toloi se kamno maya aw inay,' aw 'Se mikagi te medaet tepad te kandin amay aw inay angay imatayan.' ⁵ Meneng sikeyo nagtolade nga kon se otaw doen ikatabang peden te kandin menge ginikanan, aw minikagi kandan, siini angay te Timanem,' Eked deon sikandin angay pegtabang kandan. ⁶ Pig-inang niyo nga wadad kekemowan se kagi te Timanem tongod te kenyo menge tolomanon. ⁷ Menge egpelingo-lingo, benal kedi se inikagi te Timanem tepad kenyo pinaokit ki Propita Isaias, ⁸ 'Siini nga menge otaw nagtolo kena te baba dan olo, meneng se kandan pusong madiyo kenak. ⁹ Wadad kekemowan se kandan pegsimba kenak, key se kandan pigtolada nga menge punun menge ininang olo te menge otaw. ¹⁰ Tinawal i Jesus se menge otaw aw pigkagihan din dan, "Pinalan kew aw pekelebeti niyo se kenak ikagi. ¹¹ Se menge kanon nga i-ahop te baba te otaw kena niyan se mekepelipa kandin, kon kena se menge kagi nga lomowa te kandin baba." ¹² Penganiyan migpadapag kandin se kandin menge tinuladaan aw minikagi, "Tinuladaan no ba nga nabensi se menge Pariseo te kamno inikagi sida?" ¹³ Timaba si Jesus, "Se metag-Timanem nga wada tenemi te kenaken Amay doton te langit ogoten. ¹⁴ Keboyii niyo den dan menge mag-aga kay dan nga bota. Aw kon se bota mag-agak te lain bota, magdagdag dan dowa te awang." ¹⁵ Nayan minikagi si Pedro ki Jesus, "Indani kay te kahulogan sida na tegdeyanan." ¹⁶ Minikagi si Jesus kandan, "Wada kaw pa kedi human pekesabot? ¹⁷ Wada kaw pa ketegataga se bisan eden se mahop te baba lominaos te getet aw pengayen niyan lominawa lekat te lawa? ¹⁸ Meneng se lomowa te baba lehat te pusong, aw yan se human se mekepelapa te otaw. ¹⁹ Key lekat te pusung te otaw se malipa nga aneng-aneng, nayan se magtolod kandin te pegpangimatay, pegpenakaw, pegtistigo te kabolalaw, aw peg-ikagi te madaet doton te kandin doma otaw. ²⁰ Yan-iyan se makepa te otaw, meneng se komaen nga eked peg-onaw te belad kna makabiba te otaw." ²¹ Nasayo si Jesus keden tepad aw dimoton te menge ogpaanan nga madapag te menge siyudad te Tiro aw Sidon. ²² Doen sebad ka bayi nga taga Canaan nga nag-ogpa kedoen tepad. Dimolod sikandin ki Jesus nga nagpaido-ido. Minikagi sikandin, "Timanem, bowad-bowad ni Dabid, kaidohi abag onto! Se kenak bata nga bayi pig-opan te madaet Ispirito aw nag-antos onto sikandin." ²³ Meneng wada tana si Jesus te kandin menge pegtinoladaan migpadapag kandin aw naghanyo nga nakaikagi, "Pakedasi sen bayi siyan, key nagtaking-taking sikandin kenitadon aw bansi en onto." ²⁴ Nayan minikagi si Jesus, "Inpaibing a dini amon te pegtaban te menge Israelinhon nga iling te menge karniro nga natalon." ²⁵ Meneng migpadag pa beling onto se bayi ki Jesus aw limohod te kandin atubangan nga minikagi, "Timanem, tabangi onto ebag!" ²⁶ Minikagi si Jesus kandin pinaokit te inikegihan, "Kena mapiya nga abaten se mekaen lekat te menge mengisu aw iegbel doton te menge toyang." ²⁷ Aw minikagi sa bayi, "Benal iyan Timanem, meneng nisan pa se menge toyang komaen te menge kanen nga medagdag lekat te lamisa te kandan amo." ²⁸ Nayan minikagi si Jesus kandin, "Kedakel te kawino pegpemenal! Nayan madawat no se kamno pinamoyo kenaken!" Aw te oras siyan nagolian dayon se kandin bata. ²⁹ Nasayo si Jesus lekat kidoen aw dimoton te kino te lanaw te Galiliya aw yan timikedeg si kandin te bontod aw namannoo doton. ³⁰ Madita menge otaw se dimolod kandin. Inibing dan se menge bakel, menge sigkel, se menge bota, se menge omo aw madita pa nga menge masekiten. Pigsawol den doton te tuktuk te benis i Jesus aw piggon din se kelahat dan. ³¹ Nepela onto se menge otaw ke kinita dan nga se menge omo makaikagi den, mapiya den se menge beyad te menge sigkel, se menge bakol nakaipanaw den aw sen menge bota kimitaden, aw pagdeyen dan se te Timanem te Israel. ³² Tinawal i Jesus se kandin menge Tinoladaan aw minikagi si kandin kandan, "Naido a onto te menge otaw siini. Teloden si aldaw gayed si kandan nagtakingtaking kena ken aw wada den kaknen dan. Eked a kaibeg nga moli dan nga eked pekekaen key basi aw matapi dan te dalan." ³³ Minikagi se kandin menge Tinoladaan kandin, "Kenan ki ba abat te kaknen dini te awa-aw alang te menge madita otaw siini?" ³⁴ Nag-insa si jesus kandan, "Pinakabuok se kenyo pan kidoen?" Timabag dan, "Pito ke pan aw silabok olo se dadaitek ikan." ³⁵ Nayan pegpaonsad i Jesus se menge otaw. ³⁶ Inabat din se pito ke pan aw menge ikan aw negpasiontong te Timanem aw kidoen pigbelabeka din ini aw pigbegay din te menge Tinoladaan. Aw si kandan human se negtepeptepep nini doton te menge otaw. ³⁷ Nekekaen dan kelahat aw nabesog aw kidoen, pigtigom dan se pan nga sama, aw napepa se pito ke been. ³⁸ Menge epat melalan ke menge meama se kikemaen wadad pa labot niyan se menge bayi aw menge mengisu. ³⁹ Penga niyan pigpauli i Jesus se menge otaw. Nayan semakay si Jesus te balangay aw minatas te tepad te magadan.