¹ Seini kenitadon lawa neiling te balay nge kenitadon inogpaan samtang dini ki pa te keneyonan, eked tadon igsapayan aw mamatay se kenitadon lawa. Aw netegahan tadon nge doen ibegay se Timanem kenitadon nge kaling lawa nge kenitadon ugpaen dotn te langit. Seini kena ininang te otaw kon kena te Timanem, aw kena din gayod mamatay bisan kenu. ² Te pegkeseini nagaagulo kidon aw naninungoha kidon nge mekeugpa te inkenyan lawa doton te langet. ³ Amon nge aw mesoot din tadon siyan lawa eked kitae nge huba se kenitadon kalag. ⁴ Samtang dini kipa ugpa seini lawa nge tenan-on nagaagulo kidon pengkey te kelimahan, kena pengkey aw ibeg tadon nge melay. Kon kena ibeg tadon mesootan te lawa nge langitnon amon seini lawa nge doen kematayen keselilinan te wedad din palos kemetayen. ⁵ Se Timanem yan se migpetagad kenitadon amon mekekinawa kidon te kaling nge lawa, aw inbegayan kidon din te Espirito Santo amon ketegahan tadon nge seini inangenen olo din. ⁶ Yan eked kidon pegkelumay bisan netegahan tadon nge samtang dini ki pa te lawa seini mediyo kidon te ugpaanen te Timanem. ⁷ Aw te pegkesongkani nagakinabuhi kidon pineokit te pegpemenal aw kena sumala te kenitadon egkitaen. ⁸ Weda kay megkelumay, bisan pa aw ibeg tadon nge tenanan din seini lawa aw muli doton te Timanem. ⁹ Pengkey bisan dini keypa kenami dini o doton den kandin ibeg day nge meluba se Timanem kenami. ¹⁰ Aw kenitadon kelahat keilangan onto nge sominalo ki Cristo te kamudihan amon hokman din, aw se sebad-sebad kenitadon medawat te balos tepad te kenitadon inang dini te keneyonan mepiya aw medaet. ¹¹ Nayan tungod te kelamit day te Timanem, neningkamot kay nge metolada se menge otaw nge nemenal kandin, netegahan te Timanem se kenami pegkeotaw aw simalig ka nge seini netegahan heman niyo. ¹² Seini kena te iduyun ko heman te kenami pegkeotawon kon kena ibeg day heman nge kelahat niyo mebegayan aw hinungdan nge ikapasigarbo niyo sekami amon doen heman kenyo metobag te menge otaw nge negduyun dan te menge botan nge kitaen aw eked se tepad te pusong. ¹³ Aw iling keyman te migkabook siyan tungod aw alang te Timanem, aw den iyan se kenami aneng-aneng siyan tungod aw para kenyo. ¹⁴ Aw tanda te pedowan e Cristo kenami weda den lain kenami mekeinang gawas te pegtolo kandin. Aw netegahan day nge si Cristo nematay para te kelahat, yan iling den nge nematay heman se kelahat. ¹⁵ Nematay sikandin para te kelahat, amon nge se menge otaw nge buhi seini eked den magkinabuhi para te kandan pegkeotawon kon kena para kandin nga mematay aw meantay para kandan. ¹⁶ Nayan seini eked key kenami peghukom te otaw pineokit te otawon basihanan kedengan naghukom heman kenami ki Cristo pineokit te otaw basihanan meneng seini eked den. ¹⁷ E bisan sine nge kidoen ki Cristo kaling wedad den se kandin tapay nge pegkeotaw kay kaling den sikandin. ¹⁸ Se Timanem yan se neg-inang dini, sikandin se neg-uli kenitadon doton kandin pineokit ki Cristo aw inbegeyan din kenami aw inangen te indan nge neg-uli den kandin se menge otaw doton kandin. ¹⁹ Yan ini se kenami inindan nge neg-uli den se Timanem se kandin menge otaw doton kandin pineokit ki Cristo, weda din den aneng-aneng se kandan menge sala. Aw kenami yan se kandin intuygan te pagpakaylap seini nge balita. ²⁰ Nayan nagasugilon kay nge menge inpeibing i Cristo aw pineokit kenami nanghangyo se Timanem kenyo nge liko kawden kandin. ²¹ Si Cristo wedad gayod sala meneng sikandin yan se pinaantus te Timanem tungod te kenitadon menge sala, amon nge kon diya ki Cristo metolid kidon te Timanem.