¹ Tepad te keido te Timanem pinemal'li kay din nga menangyaw sine kaling pemeokit nga meinang meto'lid se menge otaw. Nayan weda kay peglomay-lomay. ² Igselikway day menge mekeyaya nga inang nga eg-inangen te sekreto eked day limbongi se menge aw weda day tuisi se penu te Tmanem netegahan onto te menge otaw nga bentetek se kanami peg-indan te kebenalan aw kinita heman te Timanem. ³ Meneng kon doen menge otaw nga eked pekelabet te mepiya belita nga igsaysay day Jian yan se menge otaw nga nengetalon. ⁴ Kena dan egpengintoo te mepiya belita tepad kay se kandan menge aneng gibutaan i Satanas nga yan se negpekedios dini te kelibotan gibutaan din sikandan amon eked dan kitai se kelowa te mepiya belita kebahin te tolos i Cristo, Sikandin nga yan onto se bawa te Timanem. ⁵ Weda kay pegwali tepad te kenami keotaen kon kena tepad ki Jesu-Cristo nga sikandin yan se Timanem neg-alagad kay kenyo lepad aw alang ki Jesus. ⁶ Se Timanem nga negeikagi, "Lekat te kengitngit megsanag se kelowa," Yan heman se egbegay te kelowa te kenami aneneng aneng amon mekebetan day kon eden se tolos nga pinekita din pineokit ki Cristo. ⁷ Iling kay olo te kolon nga inapan ninin mehalon nga telepagan amon metegahan te menge otaw nga se tolos nga eked kesokod nga dini te kenami menge lawa nga melomay kena lekat kenai kon kena likat te Timanem. ⁸ Te kenami pegsangyaw gayed kay egpulumenen, meneng weda kay yayed kepildi te menge negebatok kenami. Usahay egkelibog kay meneng weda kay gayed kewedadi te peglaom. ⁹ Medita se megtinguha te peg-imatay kenami, meneng weda kay sibwani te Timanem. ¹⁰ Benal nga gidahmalan kay dan meneng te keido te Timanem bohi kay paheman. ¹¹ Se kenami pedowan gayed nekesaol te kekoyaw tepad te kenami peg-elagad ki Jesus, amon nga pineokit kani nga lawa day nga doen kemetayen kitaen te kedita se pedowan ni Jesus. ¹² Nayad tepad kay igwali day si Cristo meinang metayan kay meneng yan heman ini se pemeokit nga meketig-apo kay te pedowan nga wedad temanan. ¹³ Se punu minikagi, egpengitoo a te Timanem, nayan meg-indan a." aw yan heman ini se kenami inangen, ig-indan day se kenami igpengintoohan. ¹⁴ Kay netegahan day nga se Timanem nga neg-antay ki Ginoong Jesus, yan heman se meg-antay kenami, iling te kandin peg-antay ki Jesus, aw ibingen kay din taking kenyo te kandin sinelowan. ¹⁵ Se kelehat menge pelumen day alang te kenyo kepiyaan, among tilobo megkedita se menge otaw nga megdawat te keido te Timanem, megkidita heman se menge otaw nga megpeselamat kandin. Aw sini nedeyen sikandin. ¹⁶ Yan iyan se lekatan nga weda kay pegkelomay te peg-elagad te Timanem. Bisan sini kenami lawa nagaanam den te pekelomay se kenami Espirito megpededeg te peglig-on kada aldaw. ¹⁷ Se mge kelisod nga iglumunan day dini ti kelibotan kena mebegat aw lomaklak olo, aw tepad te kenami meng piglumunan, doen mepiya onto nga balos nga integilan te TImanem kenami aw sine wedad temanan aw gayed ketopangi. ¹⁸ Kay weda day pelebihi se menge kedu'nan nga kenami kenita dini te kelibotan kon kena igpelabi day se menge kedu'nan nga eked kitai, kay se menge kedu'nan nga kitaen lomaklak olo. Meneng se menge kedu'nan nga eked kitae meglongtad te wedad temanan.