¹ Apwiya yaahomuulumana Moises wa Moabe, vamotja waJordao, oJerico: ² Owiirele atthu owiisrael wiira yaavahe tjitthutjaya elapo tjaalevita. Ayenatja anaahala woovahani elapo yoopheela okhala. ³ Alevita anaahal okhala nimapuro oohuwa enamatjaya. ⁴ Mapuro oopheela ohuwa enamatjaya an'hala okhala mapuro olapo tjokonto emotja ephimeliyuaaya, mapuro ooteene. ⁵ Mwaaphimele ekonto piili ota wopooma nphantte wookhopela, niikonto piili nphantte onkhuma ntjuwa, ekonto piili nphantte onkela ntjuwa, ekonto piili nphantte woohitto. Ala an'hala okhala mapuro oohuwiya enama. ⁶ Epooma sita tjin'hala okhala tjoovahiya alevita, tjin'hala okhala epooma tjontthawelo. N'nohala waavaha phanka mapuro oopheela okhala ratta. Ni tootho mwaavahe epooma arupayini napiili. ⁷ Epooma tjin'hala ovahiya alevita phin'nha: Arupayini nanaane. ⁸ Mahimo moolupale aatthu owiisrael, mahimo arina elapo tjintji, ahaana akhalanakatho epooma tjintji. Mahimo ooyevetja an'hala okhalana epooma vakaani. Khula nihimo nihaana waavaha alevita en'halaaya waakhela. ⁹ Vano, aPwiya yaahomuulumana Moises: ¹⁰ Waahimeerye atthu owiisrael: Mwalapuwaka oJordao npaka elapo yooCanaa, ¹¹ n'nohala othanla epooma wiira akhalihe ntthawelo, wowiira khula ntthu n'hala wiiva ooneke wootthawela. ¹² Tjin'hala okhala epooma tjntthawelo, wowiira ntthu n'hala opanka etthu hiiviye tjihinaaya wuulumiya. ¹³ Mwiithanlele epooma tjontthawelo. ¹⁴ N'nohala okhalana epooma tthaaru on'hiya Jordao ni tthaaru elapo yooCanaa. Tjin'hala okhala epooma tjontthawelo. ¹⁵ Atthu owiisrael, atthu oottayi, wakhula ntthu n'hala okhala ninhu, epooma tjoosiita tjin'hala okhala ntthawelweenhu wakhula ntthu n'hala wiiva. ¹⁶ Akhumenla ntthu iireliyaka wiira nowiiva niiyuuma ni ntthuyo phukhwa, yooyo ntthuuyo ntakhali. Yena naahala okhwa. ¹⁷ Akhumenla ntthu owiiva ninluku oyo ntthuuyo ntakhali. Yena naahala okhwa. ¹⁸ Akhumenla ntthu owiiva niikaputthi yonri oyo ntthuuyo ntakhali. Yena naahala okhwa. ¹⁹ Yooyo namwiivooyo, haana amwiivaka ntakhali. Anphwanhavale, amwiive. ²¹ Akhumenla ntthu ankakhaka nkhwaawe, wala onrihela etthu, iipithaka wiira anrweele, woopheela omwiiva, ²⁰ wala antuphela, nimatataawe, woopheela omwiiva, yooyo ntthuuyo naahala okhwa. Yena ntakhali. Yooyo ntakhalyuuyo ankuman'na amwiive. ²² Massi nlopwanooyo oonenliya, wowaakuvyaatja, ankakhaka, ²³ wala onrihela etthu, anrihela nluku noopheela omwiiva ntthu woohimoona, vano yooyo khaari n'wanani ontthuuyo; yena khaapheela on'hassara. ²⁴ Tjitjin'mo, atthu anaahala onlamula namakosseriya nintakhali mwaha ²⁵ wokettelo.Vano atthu anaahala okussa ekuru tjantakhali anvahaka namakosseriya. Atthu anaahala onkussa namakosseriya anrweehaka epooma tjontthawelo. Yena naahala okhala woowu npka okhwawawe nankuttho, yooyo aatthapeliye nimakhura ooreerihiya. ²⁶ Massi, namakosseriya, wakhula owakathi, arwaa nmwiinanoni wopooma yontthawelo waakhumalyaawe, ²⁷ ni ntakhali ankuman'na nmwiinanoni wopooma tjontthawawelo, ni ntakhali amwiiva yooyo, yena khan'hala okossa. ²⁸ Maanaaya wiira yena aahaana akhalaka epooma yontthawelo npaka okhwa wanankuttho. Akhwaka nankuttho, namakosseriyoole naahala waakulela elapwaawe. ²⁹ Ekettelon'nha tjin'hala okhala mweettiherweenhu ni makhoto ooteene aatthweenhu, womapuro ooteene an'haleenhu okhala. ³⁰ N'hala wiiva niyenani haana wiiviya phanka tjihimiyaaya nimoolumo onamoona. Massi, nuulumo nanamoona khaninphwanela omwiiva ntthu. ³¹ N'hikupaleele okhala mwaha weekumi yantthu ookossa. Yena naahala okhwa. ³² N'hikupalitji mwaha wantthu nrwaaka epooma yontthawelo. N'hitthunihe wiira akhale owan'nhu npaka nankuttho wankhwaawe. ³³ N'hipanke, enan'na yeela, elapo enkhaleenhu, kontha elapo yantakhali enaahon'na elapo. N'hipanke wanakhala etthu ephome yamwaressiyavale, woohikhala ephome yeele emwaressiye. ³⁴ Tjitjon'mo, n'hunteelelihe elapo enkhaleenhu, kontha kinkhala mon'mo. Mi aPwiya, kinkhala naatthu owiisrael.