¹ Apwiya yaahomwiirela Moises, yiiraka: ² Waahimeerye atthu owiisrael: Mwaphiya elapo yooCanaa, yeeyo en'hala okhala yawinhu, elapo yooCanaa nimwiinanotjaya, ³ mwiinano wonphantte onkhuma ntjuwa enaahala otaphuliya moothakhoni wooZim, omakhumenloni wa Edom. Nphantte womwiinano onkhuma ntjuwa on'hala omalela nphantte onkhuma ntjuwa wopahari yomaakha. ⁴ Mwiinanueenhu on'hala orukureerya onkhuma ntjuwa omwaako Acrabim ni n'hala waakulela moothakoni oZim. La, n'hala orwaa onkhuma ntjuwa wa Cades-Barneia ni n'hala waakulela npaka Hazar-Hadar ni n'hala orwaa npaka Azmom. ⁵ Yakhumaka vale, mwiinano on'hala orwaa npaka wiigipitu ni anahala orwaa npaka opahari. ⁶ Mwiinano wonphantte onkela ntjuwa on'hala okhala nphantte wopahari yuulupale. Oyo on'hala okhala mwiinanueenhu nphantte wootjulu. ⁷ Mwiinanueenhu woohitto on'hala okhala nphantte wopahari yuulupale npaka mwaako Hor, ⁸ okhuma mwaako Hor npaka Lebo-Hamate, ni okhuma vale npaka Zedade. ⁹ Vano, mwiinano naahala weetta npaka oZifrom, omalelaka oHazer-Ena. Oyo on'hala okhala mwiinanueenhu woohitto. ¹⁰ Vano, mweettihere mwiinanueenhu okhuma Hazar-Ena onkhuma ntjuwa npaka Sefa. ¹¹ Mwiinano onaahala okhuruwa oSefa npaka Ribla, okhopela wa Aim. Mwiinano onaahala weetta okhopela wopahari Quinerete. ¹² Vano, mwiinano onaahala weetta orwaaka onkhuma ntjuwa waattaman'na muro Jordao orwaaka epahari yomaakha ni enaahala weettela nphantte womwiinano wopahari yomaakha. Eyo en'hala okhala elapwaa, womwiinano tjooteene. ¹³ Vano, Moises aahowiirela atthu owiisrael, iiraka: Ela phiilapo en'haleenhu ovahiya woparakha, aPwiya yaahimyalyaaya, wiira avahiye mahimo khentta ni nuussu, ¹⁴ nihimo naRuben, nihimo naGade, ninuussu nihimo naManasses, womihakhu wonihimo aatthu okhalayi, yaahovahiya elapwaaya, womihakhu wonihimo aatthu okhalayi. ¹⁵ Maloko oomeeli ninuussu ahaakhela etthuvuaaya vathi, on'hiya Jordao, nphantte waJerico, orwaaka woossani. ¹⁶ Apwiya yaahomwiirela Moises, yiiraka: ¹⁷ Ala phamatjina aatthu akawanihale elapo wayoohiyeriyeenhu: Eleazar, nankuttho, ni Josue, mwaana Num. ¹⁸ Onaahala onthanla n'hooleli wakhula nihimo wiira aakawele elapo makhotuaa. ¹⁹ Ala phamatjina aatthu: Nihimo naJuda, Calebe, mwaanaJefone. ²⁰ Nihimo naSimeao, Samuel, mwaana Amiude. ²¹ Nihimo naBenjamim, Elida, mwaana Quilsom. ²² Nihimo naDa, n'hooleli Buqui, mwaana Jogli. ²³ Assimutjyaawe Jose, nihimo naManasses, n'hooleli Haniel mwaana aEfode. ²⁴ Nihimo naEfraim, n'hooleli Quemuel, mwaana aSifta. ²⁵ Nihimo naZebulom, n'hooleli Elizafa, mwaana aPernaque. ²⁶ Nihimo naIssacar, n'hooleli Paltiel, mwaana aAza. ²⁷ Nihimo naAser, n'hooleli Aiude, mwaana aSelomi. ²⁸ Nihimo naNaftali, n'hooleli Pedael, mwaana aAmiude. ²⁹ Apwiya yaahowiirela atthwaala wiira akawanihe elapo yooCanaa ni yaavahe khula nihimo nowiisrael.