¹ Ala yaari meettelo aatthu owiisrael owkathi wahiyalyaaya elapo yowiigiipitu, wonayeeli waanakhottwaaya, ohoolela waMoises ni Arao. ² Moises aahantikha elapo tjaakhumaaya niilapo tjaarwaaya, phanka aPwiya tjaahimyalyaaya. Ala phaari phimeettelwaaya wakhula nkwaha. ³ Mweeri wowantjera yaahorwaatja oRamesses, akhumatjaka nihuku nonakhuumi nathanu. Orupossenliya wa paskowa, atthu owiisrael yaahokhuma noolipa nrima, ohoolo waagiipitu. ⁴ Tjiiranya owakathi meegiipitu waassikhaaya owantjera oyariya, yaale yaawiivalyaaya aPwiya, anaakussale aphuki nanlukwaaya. ⁵ Atthu owiisrael yaahokuma oRamesses ni yaahomaka oSucote. ⁶ Yaahokhuma oSucote ni yaahomaka oEta, nmwiinanoni moothako. ⁷ Yaahokhuma oEta ni yaahohokoleela oPi-Hairote, onkhala Baal-Zefom, waamakalyaaya waattaman'na oMigdol. ⁸ Yaahokhumatho oPi-Hairote eriyari epahari, arwaaka moothakoni. Yaaheettatja mahuku mararu moothakoni wooEta ni yaahomakatja oMara. ⁹ Yaahokhuma oMara ni yaahophiyatja oElim. Elim, yaahaavo mapuro khuumi nameeli ookhuma maatji. Wonwo phaamakatjalyaaya. ¹⁰ Yaahokhumatja oElim ni yaahomakatja waattamenla epahari yoosseerya. ¹¹ Yaahokhuma epahari oosseerya ni yaahomakatja moothakoni wooSim. ¹² Yaahokhuma moothakoni wooSim ni yaahomakatja oDofca. ¹³ Yaahokhuma oDofca ni yaahomoakatja oAlus. ¹⁴ Yaahokhuma oAlus ni yaahomakatja oRefidim, wahaaphwanhiye maatji oopheela owurya atthu. ¹⁵ Yaahokhuma oRedifim ni yaahomakatja moothakoni wooSinai. ¹⁶ Yaahokhuma moothakoni wooSinai ni yaahomakatja oQuibrote-Hataava. ¹⁷ Yaahokhuma oQuibrote-Hataava ni yaahomakatja oHazerote. ¹⁸ Yaahokhuma Hazerote ni yaahomakatja oRitma. ¹⁹ Yaahokhuma oRitma ni yaahomakatja oRimom-Perez. ²⁰ Yaahokhuma oRimom-Perez ni yaahomakatja oLibna. ²¹ Yaahokhuma oLibna ni yaahomakatja oRissa. ²² Yaahokhuma oRissa ni yaahomakatja oQueelata. ²³ Yaahokhuma oQueelata ni yaahomakatja omwaako Sefer. ²⁴ Yaahokhuma omwaako Sefer ni yaahomakatja oHarada. ²⁵ Yaahokhumatja oHarada ni yaahomakatja oMaquelote. ²⁶ Yaahokhuma oMaquelote ni yaahomakatja oTaate. ²⁷ Yaahokhuma oTaate ni yaahomakatja oTera. ²⁸ Yaahokhuma oTera ni yaahomakatja oMitca. ²⁹ Yaahokhuma oMitca ni yaahomakatja oHasmona. ³⁰ Yaahokhuma oHasmona ni yaahomakatja oMoserote. ³¹ Yaahokuma oMoserote ni yaahomakatja oBene-Jaaca. ³² Yaahokhuma oBene-jaaca ni yaahomakatja oHor-Gidgade. ³³ Yaahokhuma oHor-Gidgade ni yaahomakatja oJotbata. ³⁴ Yaahokhuma oJotbata ni yaahomakatja oAbrona. ³⁵ Yaahokhuma oAbrona ni yaahomakatja oEziom-Geber. ³⁶ Yaahokhuma oEziom-Geber ni yaahomakatja moothakoni wooZim, oCades. ³⁷ Yaahokhuma oCades ni yaahomakatja omwaako Hor, omwiinanoni yolapo Edom. ³⁸ Arao, nankuttho, aahowela omwaako Hor, mwaha wonlamulo naaPwiya, ni vaavale yena aahokhwa, mwaakha wonaarupayini, atthu owiisrael anakhumale elapo yowiigiipitu, mweeri woneethanu, nihuku noopatjera nomweeri. ³⁹ Arao aarina eyaakha emiya wossiriini natthaaru waakhwalyaawe omwaako Hor. ⁴⁰ Ncananeu, mwene oArade, aakhala nphantte owuuthakoni, elapo yooCanaa, aahiiwa owa waatthu owiisrael. ⁴¹ Yaahokhuma omwaako Hor ni yaahomakatja oZalmona. ⁴² Yaahokhuma oZalmona ni yaahomakatja oPunom. ⁴³ Yaahokhuma oPunom ni yaahomakatja Obote. ⁴⁴ Yaahokhuma Obote ni yaahomakatja oIje-Abarim, omwiinanoni Moabe. ⁴⁵ Yaahokhuma oIje-Abarim ni yaahomakatja oDibom-Gade. ⁴⁶ Yaahokhuma oDibom-Gade ni yaahomakatja oAlmom-Dibladaim. ⁴⁷ Yaahokhuma oAlmom-Diblataim ni yaahomakatja nmamwaakoni tjo Abarim, ohoolo Nebo. ⁴⁸ Yaahokhuma nmamwaako tjo Abarim ni yaahomakatja o Moabe, vanotja oJordao, oJerico. ⁴⁹ Yaamakatjale oJordao, oBete-Jesimote npaka Abel-Sitim, wa Moabe. ⁵⁰ Apwiya yaahomwiirela Moises wa Moabe vamotja oJordao oJerico ni yaahomwiirela: ⁵¹ Waahimeerye atthu owiisrael: Mwankuman'na Jordao nrwaaka elapo yooCanaa, ⁵² mwawoomole atthu ooteene onlaponin'mo. Mwatankulatje tjitthutjaya tjooteene. ⁵³ Mwakussatje elapweeyo, kontha elapo yoovahatjalyaakani. ⁵⁴ N'nohala okhala niiparakhatjinhu, phanka tjaahimiyaaya wakhula nihimo. Nihimo nuulupale mwaavaheke etthaya yintji, ni nihimo nankaani etthaya yanakaani. Wakhula nihimo en'hala onrimeela eparakha elapweeyo en'hala okhala yawaya. N'nohala okhana elapo mwaha womaloko aatthu okhalayi. ⁵⁵ Massi mweehiwoomoleke atthwaayo khamun'hala owiirihatja etthu. Khan'nohala okhalatja ratta. ⁵⁶ Vano, enuupuwelaaka ovara naatthu, phin'halaaka oweerihani.