¹ Maloko aRuben niGade yaahaana enama tjintji. Woonatjalyaaya wiira rlapo tja Jazer ni Gileade yaari assineene mihuwo, ² yaahorwaatja wa Moises, wanankuttho Eleazar naahooleli omunttettheni ni yaahowiirelatja: ³ Atarote, Dibom, Jazer, Ninra, Hesbom, Eleale, Seba, Nebo ni Beom. ⁴ Elapo tjaaphwanhale Apwiya munttettheni owiisrael, assineene mihuwo. Hi anantekweenhu nihaana mihuwo tjintji. ⁵ Yaahiiratja: Naphwanha n'nema nmeethoniwinhu, elapon'nhe avahye anantekweenhu, wiira avarele nteko. N'hinilapussihe Jordao. ⁶ Moises aahaakhula nloko na Gade ni Ruben: Assihimaayo yaahala orwaa okhottono akhalatjaka vaava? ⁷ Essiyani waalipihatjaka nrima atthu owiisrael wiira ahikele elapo aPwiya yaavahatjalyaaya? ⁸ An'nathumwaninhu apankatjale tjitjon'mo waarumalyaaka oGades-Barneia wiira yawehawehe elapo. ⁹ Warwaalyaaya npaka emuro Escol yoonatjaka elapo, yaahaalipihatja mirima atthu owiisrael wiira ahikelatje elapo aPwiya yaavahatjalyaaya. ¹⁰ Vano, orussiya waaPwiya waahopharela nen'ne nihukun'ne ni Yena aaoluphela iiraka: ¹¹ Weekhweeli, khaavo ntthu n'hala okhuma weegiipitu, niiyaakha siriini woorwaa ntjulu n'hala woona elapo eluphenlyaaka wa Abraao, Isaque, Jaco, kontha ayenatja khaakittharale weekhweeli. ¹² On'hiya Calebe, mwaana Jefone, nquenezeu, ni Josue, mwaana Naum. Calebe ni Josue, ahokittharatja. ¹³ Vano, orussiya waaPwiya waahipharela wiisrael. Yena aahaakhaliha anamakossa moothakoni woyaakha arupayini, npaka nlokon'ne nooteene naavarale tjoottheka vameethoniwawe tjikwanhuliye. ¹⁴ N'nava, n'hovussa mapuro an'nathumwaninhu, phanka nloko naanamakossa wiira mwintjenretho orussiya waaPwiya wiisrael. ¹⁵ Mun'nheelaka ontthara, yena naahala on'hiya Israel moothakoni ni n'naahala okwanhulatjiya naatthu ooteene. ¹⁶ Vano, yaahomwanttamenlatja Moises ni yaahiiratja: N;nitthunihe niteke matjitji eenamatjihu niipooma tjaamutjiihu. ¹⁷ Vano, ninaahala wiitthonkomaniha ni ninaahala orwaa naanakhotto wiisrael npaka wanon'hiyeehu wanipuroniwawe. Amutjiihu an'hala okhala epooma tjoolipihiya, mwaha waatthu ankhala elapo yeela. ¹⁸ Khanin'hokoleela n'mawan'nhihu npaka khula ntthu ophwanha yawawe. ¹⁹ Khanin'hala okhalana elapo yonphantte nkhwaawe wa Jordao, kontha yoohiyeriyeehu phivaava oJordao ²⁰ Vano, Moises aahowaakhulatja: Mwapankatjaka ehimyatjaleenhu, mwiitthonkomanihaka wokhotto yaaPwiya ²¹ ni wakhula ntthu wanhu mwanlapuwaka Jordao, n'niitthonkomanihale waaPwiya, paka yena waakumiha awananiinhu ooteene, ²² ni elapweeyo anari aPwiya, n'haana ohokolyaa. Ni khan'nohala okhala ninlattu ohoolo waaPwiya ni Israel. Elapweela en'hala okhala yawinhu ohoolo waaPwiya. ²³ Vano, mweehipankeke eyo, n'naahala waakossera aPwiya. Nkhale ootjuwela wiira tjootthekatjinhu tjinaahala woophwanhani. ²⁴ Ntekatje epooma tjaasimutjiinhu nimatjitji tjonamatjinhu ni npanke yeele ekhuluvelihaleenhu. ²⁵ Maloko aGade ni Ruben yaahomwiirela Moises: Ananteko ooteene an'hala ovara yeele en'himyeenhu. ²⁶ Assaaneehu, assaarihu, enamatjihu nimihuwotjihu tjin'hala ohala n'mapooma tjooGileade. ²⁷ Kontha, hi, anatekweenhu, nin'hala okhala okhottoni naaPwiya;wakhula nlopwana n'hala okhala ootthonhomanyaa wiira arwee okhottoni, phanka nhu, aPwiyehu, tjin'himyeenhu. ²⁸ Vano, Moises aahaalakiheratja wohissimaayatja mwaha wanankuttho Eleazar, ni Josue, mwaana Num, naahooleli omaloko aatthu okhalayi omahimo aatthu owiisrael. ²⁹ Moises aahowiirelatja: Maloko aGade ni Ruben yanlapuwaka Jordao ninhuuvaatja, nlopwana ooteene owiitthonkomaniha wokhotto yaaPwiya, ni yaphwanhiya elapweeyo naatthu akhwaawe, kinaahala waavahatja elapo yaGade. ³⁰ Vano, yeehinlapuwe Jordao nihuuvaatja, n'nohala ophwanha mapurweenhu elapo yooCanaa. ³¹ Maloko aGade ni Ruben yaahaakhulatja: Phanka aPwiya tjinihimeeryalyaaya, ninaahala opanka. ³² Ninaahala onlapuwa Jordao mwaha waaPwiya nirwaaka elapo yooCanaa, massi yoohiyeriyeehu en'hala okhala nphantte wooJordao. ³³ Maloko aGade ni Ruben ni nuussu nonihimo naManasses, mwaana Jose, Moises aahovaha omwene oSiom, omwene waamorreu ni omwene waOgue, mwene ooBasa. Yena aahaavahatja elapo, ni aahokawa epoomatjaya tjooteene, mwiinanotjaya niipooma tjowaarukureerya. ³⁴ Maloko aGade yaahotekatja Dibom, Atarote, Aroer, ³⁵ Atarote-Sofa, Jazer, Jogbea, ³⁶ Bete-Ninra ni Bete-Hara, epooma tjoolipihatjiya. Ohiya vaa, yaahotekatja matjitji tjonamatjaya. ³⁷ Maloko aRuben yaahotekatja Hesbom, Eleale, ni Quiriataim, ³⁸ Nebo, Baal-Meom ni Sibma. Ayenatja yaavahatjale matjina makhwaawe epooma tjaatekatjalyaaya. ³⁹ Maloko aMaquir, mwaana Manasses, yaahorwaatja oGileade ni yaahaaphwanhatja maamorreu yaakhalatja vaavale. ⁴⁰ Vano, Moises ahonvaha Gileade waMaquir, mwaana Manasses, ni malokwaawe yaahokhala vaavale. ⁴¹ Jair, mwaana Manasses, aahophwanha epooma tjiihanalyaawe Havote-Jair. ⁴² Noba aahophwanha Quenate ni mapuro yaakhalaawe ni aahiihana Noba, wonayeeli ntjinanawe.